Swětowe koparske mišterstwa roboterow wotměwaja so tele dny w Lipsku. Nimale 3 500 wobdźělnikow z 45 krajow tam we wšelakich hrajnych klasach wo titul wojuje. Dołhodobnje chcedźa nastroje tak wuwiwać, zo móhli w lěće 2020 amtěrowaceho čłowjeskeho swětoweho mištra přewinyć. Nimo kopańcu hrajacych roboterow na wikach RoboCup tež industrijne, domjace a wuchowanske robotery w Lipsku mocy měrja.

Kopica nahich šlinkow je na wujězdźe awtodróhi A 33 pola Paderborna njezbožo zawiniła. Młody šofer so wčera rano ze swojim Trabantom na šlipotatej čarje, kotruž běchu šlinki ze susodneje skłoniny zawostajili, wobsuny a přeći­sny. Na zbožo wosta njezranjeny. Policija bě hladajo na mnóstwo šlinkow a na sćěhi zadźiwana: „Tajke něšto njejsmy hišće dožiwili.“ Schadźace słónco čaru wusuši.

Berlin (dpa/K/SN). Ekstremne prawicarstwo w Němskej přiběra a je dale a namócniše. Po tym zo bě jeje čłonstwo dlěši čas woteběrało, dobywa prawicarska scena zaso přiwiska. Kónc 2015 přisłu­šeše jej něhdźe 22 600 wosobow, lěto do toho 21 000. Tole wuchadźa z rozprawy wo škiće­ wustawy. Zdobom tam konstatuja, zo je prawicarska namóc „njesměrnje rozrostła“.

Protestuja přećiwo brexitej

London (dpa/SN). Tysacy ludźi su we Wulkej Britaniskej přećiwo wustupej kraja z Europskeje unije demonstrowali. W Londonje protestowachu wčera wječor sta ludźi najebać dešć z chorhojemi EU a wotpowědnymi hesłami přećiwo wuslědkej historiskeho ludoweho wothłosowanja. Protesty samsneho razu wotměchu so w Bristolu, Cardiffje a Oxfordźe. Mjez demonstrantami bě wjele młodostnych, kotřiž staršej generaciji wumjetowachu, zo běchu za brexit hłosowali. Na mnohich transparentach steješe: „Waše zmylki su naš přichod.“

Wobchody swjate dny začinja