Hódnoty sfalšowane?
Wo brunych wodźiznach so na městnje informowali
Wjelcej (SN/BŠe). Škitarjo přirody wumjetuja šwedskemu předewzaću Vattenfall, zo sfalšuje měrjenske hódnoty wodźiznow we łužiskim brunicowym rewěrje wokoło Wjelceje. Tole běchu tež rešerše magacina Klartext sćelaka rbb wobkrućili. Wčera běchu sej zapósłanc Braniborskeho krajneho sejma Benjamin Raschke (Zeleni), předsydka wobswětoweho wuběrka Wjelcejskeho měšćanskeho zhromadźenstwa Hannelore Wodtke kaž tež jednaćel Wobswětoweho zwjazka Braniborska (BUND) Axel Kruschat poměry na městnje wobhladali. „Woda wokoło Wjelcejskeje brunicoweje jamy je přeco hišća bruna, byrnjež loni připrawu k čisćenju wody brunicowych jamow zarjadowali“, wujasni Benjamin Raschke. Předsydka wobswětoweho wuběrka měnješe, zo bě woda před dźesać lětami hišće jasna. Vattenfall pak bě zašłe lěta započał wodu z wuhloweje jamy přez wodźizny wotwodźować, tak zo je woda nětko masiwnje zanjerodźena.
Dalša kročel je předparlament
Njebjelčicy (SN). Iniciatiwna skupina za serbske ludowe zastupnistwo – Serbski sejm chce so na zakonskim zakładźe spěšnišo swojemu zaměrej zbližić: wutworić Serbski sejm. Kaž informuje rěčnik iniciatiwy Alfons Wićaz w nowinskej zdźělence, je cyłk na swojej sobotnej klawsurje w Njebjelčicach, na kotrejž so tež zapósłanc Sakskeho krajneho sejma Hajko Kozel (Lěwica) a předsyda Drježdźanskeho towarstwa „Stup dale“ dr. Andreas Kluge wobdźělištaj, wobzamknył, hač do lěća 2017 załožić předparlament. Žane dołhe powědanje hižo a čakanje na politiske rozsudy, běše měnjenje přitomnych.
„Wohidny akt“
Respekt Obamy
Jastwo dóstali
Schorlemmer hori so za bamža
Wittenberg (B/SN). Bamž Franciskus je za ewangelskeho teologu a něhdyšeho wojowarja za čłowjeske prawa w NDR Friedricha Schorlemmera „woprawdźity křesćan“. W interviewje nowiny Zeit wuzna Wittenbergski farar: „Někotři mje kritizuja, zo sym pjany za bamžom. Ja praju: Ně, ja so horju za bamža!“ Franciskus wukonja swoje zastojnstwo bjez nadutosće. „Tohodla respektuju bamža jako swojeho ,Romskeho biskopa‘.“ Bamž njeskutkuje jeno w zastojnstwje – wón je tež čłowjek a móže so tuž tež mylić. „My křesćenjo mamy zrozumić, zo njejsmy wěrnosć ze łžicami jědli.“
Zhromadnje wustupować
Lipsk (B/SN). W globalnych prašenjach měli cyrkwje po měnjenju Erfurtskeho starobiskopa Joachima Wanki doraznišo zhromadnje wustupować. „Ekologiske prašenja a prašenja za sprawnosću a měrom su za nas wšěch palace – to móhło nam wšěm tyć“, rjekny Wanke na Dnju katolikow w Lipsku. Wěste hospodarske modele njehodźa pak so křesćansce wujasnić. „Stary socializm je na ludźoch zaprajił – snano móhł so wón ze swjatymi zdokonjeć, ale nic z ludźimi herbskeho hrěcha, kaž my wšitcy smy.“
Lipsk za kadźidłom wonjał
To a tamne (14.06.16)
Na awtodróze přizemiło je małolětadło we Wuchodowestfalskej. Jednomotorowa propelerowa mašina měješe techniske problemy. 66lětny pilot so tuž rozsudźi, z nuzy na awtodróze A 2 pola Herzebrock-Clarholza přizemić. Při akciji so křidle mašiny nakładneho awta šmórnyštej a so snadnje wobškodźištej. Na to so lětadło zwjertny a wosta na prawej jězdni stejo. Nichtó so njezrani.
Šok za dźěda! Tón widźeše, kak jeho awto z třilětnym wnučkom za wodźidłom při domje nimo jědźeše. Pjerach bě sej w badensko-württembergskim Hambrückenje awtoklučiki wzał, wóz wotamknył a so za wodźidło stupił. Awto jědźeše na hłownu dróhu a tam do napřećo bližaceho so awta prasny. Při akciji so nichtó njezrani. Wšitcy wuńdźechu ze stróželemi.
Tójšto ćěkancow wuchowanych
Rom (dpa/K/SN). Na Srjedźnym morju bu wčera z rjadom pomocnych akcijow něhdźe 1 230 ćěkancow wuchowanych. Z gumijoweho čołma ze 133 migrantami su jednoho muža mortweho wućahnyli. Na pomocnych akcijach wobdźělichu so přibrjóžni stražnicy, namórnistwo, organizacija Lěkarjo bjez hranicow kaž tež španiske łódźe. Mjeztym zo je nawal ćěkancow do Grjekskeje w sćěhu dojednanja EU z Turkowskej hladajcy spadnył, přiběra spochi ličba ludźi, kotřiž spytaja z Afriki z čołmami po Srjedźnym morju do Italskeje so dóstać. Wot spočatka lěta zličichu jich hižo 49 000.
Dale wjele jadrowych bróni
Stockholm (dpa/SN). Woprawdźite atomowe wotbrónjenje na swěće njeje wotwidźomne. Wulke atomowe mocy kaž USA a Ruska drje składy tutych bróni wottwarjeja. Za to pak wjele pjenjez do modernizowanja a wuwiwanja nowych bróni inwestuja. Tole zwěsća Stockholmski měrowy slědźenski institut Sipri w swojej najnowšej rozprawje. Na swěće je tuchwilu 4 100 jadrowych bróni z nimale 15 400 jednotliwymi rozbuchadłami.
Pod škitom policije
