To a tamne (03.06.16)
Štó sćele jěd ze Singapura? Muž z Lipska je so chětro nastróžił, jako pakćik z napisom „Gift“ z aziskeho měšćanskeho stata do domu dósta. Policiji wón rozpjeršeny rozłoži, zo sej pakćik wočinić njezwěri. Ta pak jeho při telefonje změrowaše: Gift je jendźelske słowo a woznamjenja „dar“.
Sewjerna Irska budźe europski koparski mišter – znajmjeńša, dyrbjała-li najwjetša koparska fachowča Němskeje prawje měć. Elefantka Zella wěšćeše dźensa w Stuttgartskim zwěrjencu z oraklom wotběh europskich mišterstwow w Francoskej, kotrež so dźensa za tydźeń zahaja. Za Němsku derje njewupada: Hižo prěnju hru přećiwo Ukrainje 12. junija mustwo Joachima Löwa přěhraje. Partija přećiwo Pólskej skónči so njerozsudnje. 49lětna Zella dyrbješe bule z barbami jednotliwych krajow z koša brać.
Zetkanje w jara žiwej wosadźe
Ewangelscy Serbja swój 70. cyrkwinski dźeń minjeny kónc tydźenja z hosćimi w Slepom wotměli
Kóždolětny cyrkwinski dźeń je jedyn z wjerškow w žiwjenju ewangelskich Serbow. Lětuši jubilejny sydomdźesaty běchu zamołwići zaso do Slepoho zwołali, mjeztym pjaty króć. Něhdźe sto wobdźělnikow so tam minjenu njedźelu k swjedźenskej Božej słužbje zeńdźe.
Na reformu so dojednali
Berlin (dpa/SN). Unija a SPD stej so po informacijach powěsćernje dpa doskónčnje na reformu ekologiskeje miliny dojednałoj. Tak chcedźa přichodnje twar nowych wětrnikow na sewjeru Němskeje wobmjezować, zo njebychu milinowe syće přećežene byli. Dale spěchować maja so biopłunowe připrawy. To bě sej Bayerska žadała, hdźež maja wosebje wjele tajkich. Hač do kónca debaty knježachu w tym zwisku pječa najwjetše diferency.
Ćěkancow integrować
Drježdźany (dpa/SN). Integracija swójbow ćěkancow a młodych ćěkancow steji w srjedźišću lětneho zetkanja młodźinskich a swójbnych ministrow kraja a Zwjazka, kotrež su dźensa w Drježdźanach zahajili. „Wěmy, zo maja žony a swójby wosebje wulku integracisku móc“, rjekny sakska swójbna ministerka Barbara Klepsch (CDU) do spočatka konferency. Wona skedźbni na wosebitu zamołwitosć za njepołnolětnych ćěkancow. Ministrojo chcedźa lisćinu trěbnych naprawow zdźěłać a wobzamknyć.
Pomocny konwoj dojěł
Rezolucija Armenjanow dla schwalena
Žadaja sej wjace pomocy Zwjazka
Njewjedra sej wopory žadali
W čěskich Albrechticach rekord lětstotka registrowali
Berlin/Paris/Praha (dpa/K/SN). Nad Europu wobsteja tuchwilu tajke njewšědne poměry mjez wyšinami a nižinami, zo dochadźa k přewšo ćežkim njewjedram we wšěch móžnych regionach. Z powodźenjemi je tónkróć Bayersku najbóle potrjechiło. W delnjobayerskim Simbachu su so tři wosoby w swojim domskim zatepili – 56lětna žona, jeje 28lětna dźowka a 78lětna wowka. Tři dalše wosoby w městačku su zhubjene. W Julbachu zahiny jedyn čłowjek. Za wokrjesaj Rottal-Inn a Passau je katastrofowy alarm wuwołany. Přisłušnicy Techniskeho pomocneho skutka maja wšudźe połnej ruce dźěła, zo bychu ludźi z nuzy wuchowali. W gmejnomaj Tann a Triftern započachu mjeztym z rumowanskimi dźěłami. Tam je přibližnje 10 000 domjac- nosćow bjez miliny. Ludźo su namołwjeni, so potrjechenych kónčin zdalować.
To a tamne (02.06.16)
Jogger, kiž bě lac z přidatnymi ćežidłami woblečeny, je w Hamburgu wulkozasadźenje policije zawinił. Swědk bě muža z podhladnym lacom při dźěłowym zarjedźe wobkedźbował. Dokelž měješe jeho za atentatnika z rozbuchlinu při ćěle, alarmowaše policiju. Ta přijědźe z 30 awtami a cyłkownje 60 zastojnikami. Woni zwěsćichu, zo jedna so wo muža, kiž ma na dźěłowym zarjedźe swój běrow. Přidatne ćežidła měješe wón při ćěle, zo by sportowe wužadanje wjetše było.
13 000 eurow drohu skulpturu z lutych legoklockow je štyrilětny hólc w Chinje skóncował. Hólčk bě ze staršimaj wustajeńcu „Lego-expo“ na juhu kraja wopytał. Tam započa wón do figury, tak wulkeje kaž čłowjek, bić, na čož so konstrutk sypny. Twarcy wuměłskeje twórby su zamołwjenje staršeju akceptowali a sej žane wotškódnjenje nježadaja.
Nowe antiterorowe naprawy
Berlin (dpa/SN). W boju přećiwo terorizmej ma sej němska tajna słužba přichodnje wjace informacijow z partnerskimi wukrajnymi tajnymi słužbami wuměnjeć. To je zwjazkowe knježerstwo dźensa we wobłuku noweho antiteroroweho paketa wobzamknyło. Dalše noworjadowanje ludźi direktnje potrjechi: Přichodnje dyrbi kóždy swój wupokaz předpołožić, hdyž sej prepaid-kartu za mobilny telefon kupi. Dotal móža sej tež kriminelni a terorisća tajke karty anonymnje kupić .
DIW: Zakoń njeskutkowny
Berlin (dpa/SN). Před lětom zawjedźeny zakoń wo wobmjezowanju podruže we wulkoměstach njeje skutkowny. Tole je wuslědk přepytowanja Němskeho instituta za hospodarske slědźenje DIW, kotryž su dźensa w Berlinje předstajili. Hłowny problem je wulki nawal ludźi na bydlenja, štož přenajerjow pohnuwa podruž wobstajnje zwyšeć. Justicny minister Heiko Maas (SPD) ludźi namołwja, swoje prawo na wobmjezowanje podruže napřećo přenajerjam přesadźić.
Schäuble: CSU škara
Ze 57 kilometrami najdlěši železniski tunl swěta su dźensa ze ...
Zapósłancy namołwjeni
Zwjazkowy sejm chce jutře rezoluciju k morjenju Armenjanow schwalić
Berlin (dpa/SN). Bjezposrědnje do rezolucije Němskeho zwjazkoweho sejma k masakrej na Armenjanach w Prěnjej swětowej wójnje sćelu wodźacy politikarjo wulkeje koalicije w Berlinje signale wujednanja do Turkowskeje. „Njeńdźe wo to, nowu zwadu z turkowskim knježerstwom zahajić“, rjekny frakciski šef SPD Thomas Oppermann wčera nowinarjam. Podobnje formulowaše to frakciski jednaćel CDU/CSU Michael Grosse-Brömer (CDU): „Njewobskoržimy nikoho.“
Zwjazkowy sejm chce jutře rezoluciju unije, SPD a Zelenych wobzamknyć, z kotrejž masowe morjenje Armenjanow w Osmaniskim mócnarstwje 1915 jako ludomordarstwo zastopnjuje. Po trochowanjach je tehdy hač do 1,5 milionow čłonow křesćanskeje mjeńšiny žiwjenje přisadźiło. Turkowska jako naslědnica Osmaniskeho mócnarstwa morjenje Armenjanow wobžaruje. Zastopnjowanje jako ludomordarstwo pak raznje wotpokazuje.
