Zelenskyj za dalše sankcije
Ruske wójsko hotuje so wočiwidnje na ofensiwu na wuchodźe Ukrainy
Kijew (dpa/SN). Ukrainski prezident Wolodymyr Zelenskyj je sej razniše sankcije přećiwo Ruskej žadał. Wón namjetowaše embargo ruskeho zemskeho wolija a dospołne wuzamknjenje ruskeho bankoweho systema wot mjezynarodnych financnych wikow. Njedyrbjał-li so zapad na „woprawdźe bolostny paket sankcijow“ dojednać, móhła Ruska tole „jako dowolnosć za dalše wojerske nadpady“ wobhladować, rjekny Zelenskyj minjenu nóc we widejowym poselstwje.
Runočasnje warnowaše ukrainski prezident před wulkej ofensiwu ruskeho wójska na wuchodźe Ukrainy. Moskwa tam swoju bojowu móc natwarja, zo by swoje ambicije nastupajo kónčiny Donbassa zwoprawdźiła, wón rjekny. Knježerstwo w Kijewje je wobydlerjow kónčin wokoło Luhanska, Donjecka a Charkiwa hižo namołwjało, so tak spěšnje kaž móžno do wěsćišich kónčin podać. Kijew z tym liči, zo chce ruske wójsko wokoło Kijewa cofnjene wojerske jednotki nětko na wuchodźe Ukrainy zasadźić.
Zbožo měli
To a tamne (07.04.22)
Wjeselo nad woprawdźitym hrabnjenčkom mjez studowacymi w Nürnbergu njetraješe dołho: Zmylka dla běchu awtomaty tamnišeho bliskowobchada semestersku jězdźenku za 2,07 město 207 eurow předawali. Powěsć wo „rabaće“ bě so póndźelu spěšnje rozšěriła a nawal na awtomaty zbudźiła. Zamołwići su zmylk mjeztym skorigowali. Kelko studentow je sej tuni tiket kupiło, njewědźa.
Putin dóstanje nowe mjeno – znajmjeńša w parku dźiwiny w hornjej Frankskej. Tam bydli dźiwje swinjo z mjenom ruskeho prezidenta. Te pak chcedźa jemu wójny w Ukrainje dla sćazać, zamołwići parka dźiwiny w Mehlmeisel w Bayreuthskim wokrjesu zdźěla. Zwěrjo bě hižo jako proso do parka přišło a swojeho ruskeho nana dla tute mjeno dóstało. „Putin“ waži mjeztym 200 kilogramow a čuje so mjez 21 swinjemi jara derje, kaž zdźěleja.
Merz kritizuje Lauterbacha
Berlin (dpa/SN). Zwjazkowy minister Karl Lauterbach (SPD) žněje za swój rozsud, winowatosć swójskeje izolacije w padźe koronainfekcije tola zaso zawjesć, raznu kritiku. Předsyda CDU Friedrich Merz wumjetowaše jemu „krótkodobnu“ politiku. Rozsudy Lauterbacha nimaja ani 48 hodźin płaćiwosće, Merz w rozhłosu kritizowaše. Lauterbach bě spočatnje připowědźił, zo njetrjebaja so z koronawirusom natyknjeni hižo do izolacije podać a tole dwaj dnje pozdźišo cofnył.
USA: Zepěranišća na wuchodźe
Washington (dpa/SN). Hladajo na ruski nadpad na Ukrainu je so nawodnistwo wójska USA za to wuprajiło, krute a stajne zepěranišća we wuchodoeuropskich čłonskich statach NATO zarjadować, hdźež móhli wojacy USA na wěsty čas přebywać. Tole je šef generalneho staba Mark Milley w kongresu připowědźił. Ruske permanentne zaměstnjenje wojakow USA we wuchodej Europje raznje wotpokazuje, powołujo so na zrěčenje z NATO ze spočatka 1990tych lět.
Wjace Baföga studowacym
Bamž Franciskus je dźensa we wobłuku swojeje tydźenskeje ...
Za wjace ekomiliny
Berlin (dpa/SN). Zwjazkowe knježerstwo je dźensa wobšěrny zakonski paket za spěšniši wutwar ekomiliny z wětřika a słónca wobzamknyło. Tole ma Němskej pomhać, klimowe zaměry docpěć a kraj po ruskim nadpadźe na Ukrainu po móžnosći spěšnje wot ruskeho płuna, zemskeho wolija a wuhla njewotwisny sčinić. Wobnowjomne energije su so na prašenje narodneje wěstoty wuwili, z knježerstwowych kruhow rěkaše. Tak mjenowany „jutrowny paket“ je najwjetša energijopolitiska iniciatiwa minjenych lětdźesatkow. Hospodarski minister Robert Habeck (Zeleni) bě předewzaće hižo w januaru připowědźił a „jutrowny paket“ mjenował, dokelž chcyše knježerstwo planowane změny zakonja hišće do jutrow wobzamknyć.
Zelenskyj wumjetuje UNO
New York (dpa/SN). Ukrainski prezident Wolodymyr Zelenskyj je Bjezstrašnostnej radźe UNO w zwisku z wójnu w Ukrainje zaprajenje wumjetował. Přez widejo k wuradźowanju gremija přišaltowany Zelenskyj rjekny: „Je wočiwidne, zo njemóže centralna institucija swěta za škit měra efektiwnje dźěłać.“ Rozsudy bjezstrašnostneje rady pak su za měr w Ukrainje wažne, wón rjekny. Zelenskyj namjetowaše tři móžne rozrisanja: Pak rada dopokazuje, zo je k reformam kmana, pak rada Rusku, kotraž móže jako stajny čłon kóždy rozsud blokować, wuzamknje, pak so rada sama rozpušći. Ukrainski prezident připowědźi, zo wočakuje w Kijewje prezidentku komisije EU Ursulu von der Leyen a społnomócnjeneho EU za wonkowne naležnosće Josepa Borrella k wuradźowanjam.
Mjeztym je ruske zakitowanske ministerstwo nowe nadběhi přećiwo ukrainskim jednotkam w přistawnym měsću Mariupolu připowědźiło a jim wumjetowało, zo dojednany přiměr k wuchowanju ciwilistow z města stajnje zaso ranja. Ukraina ruskim wojakam wumjetuje, zo zaměrnje na ćeknjenych třěleja.
Nowa wotwisnosć
Ćišć na płaćizny wostanje wulki
To a tamne (06.04.22)
Ze zymskeho spara wotućili su tři mjedwjedźe Torgauskeho hrodu Hartenfels. Pěstowarske dźěći su je dźensa witali a smědźachu zhromadnje z hladarku tež za kulisy pohladać, prašenja stajeć a při picowanju mjedwjedźow z mjenom Bea, Benno a Jette přihladować. Dźerženje mjedwjedźow w Torgauwje ma dołhu tradiciju a saha hač do 15. lětstotka wróćo. Zwěrjata słušeja wokrjesej Sewjerna Sakska, hladarka je pola krajnoradneho zarjada přistajena.
Čakajo před fabriku plackow je muž w šwabskim Donauwörthće zasadźenje wohnjoweje wobory zawinował. 79lětny chcyše w zawodnym wobchodźe nakupować a bě so načakał. Tuž chcyše zaklinkać a na so skedźbnić. Město klinkačka pak stłóči muž na alarmowy knefl. Na to přijědźe 35 wohnjowych wobornikow a wohnjowy alarm zaso wotpinychu.
