Berlin (dpa/SN). Sobudźěłaćerjo strowotnistwa a hladarnjow mějachu oficialnje hač do dźensnišeho składnosć dopokazać, zo su přećiwo koronawirusej šćěpjeni abo zo su wotchorjeni, chibazo maja atest, zo njemóža so šćěpić dać. Wot jutřišeho płaći za nich šćěpjenska winowatosć. Strowotniske zarjady móža potom wotpowědne konsekwency sćahnyć. W praksy wšak móže hišće trać, doniž njewukazaja přećiwo nješćěpjenym pjenježnu pokutu, abo jim zakazaja w mjenowanych wobłukach dźěłać abo do objektow přińć. Po naprašowanju powěsćernje dpa chcedźa zwjazkowe kraje we wjacorych schodźenkach postupować. Z wupowědźenjom nichtó najprjedy raz ličić nje­trjeba.

Berlin (dpa/SN). Zwjazkowy financny minister Christian Lindner (FDP) widźi najebać kritiku dobre šansy, zo amplowa koalicija jeho namjetej nastupajo připłatk při tankowanju přihłosuje. Na prašenje we wčerawšim žurnalu telewizijneho sćelaka ZDF za wuhladami, rjekny wón, zo su „wulke“. Po jeho słowach je wažne, zo stat swójby, dojězdźowarjow a předewzaćelow z raznje stupacymi płaćiznami samych njewostaji. Rabat móhł po jeho měnjenju 30 do 40 centow wučinjeć a časowje wobmjezowany być. Płaćizny ćěriwa daloko nad dwěmaj euromaj su dotal na nihdy njeznatym niwowje. Liter diesela je so po spočatku wójny na Ukrainje wo 64 centow podróšił, bencina wo 45 centow.

Dippoldiswalde (dpa/SN). Drježdźanske krajne sudnistwo je disciplinariske jednanje přećiwo bywšemu zapósłancej AfD w zwjazkowym sejmje Jensej Maierej zahajiło. Tak wobsteji nuzny podhlad, zo je Maier swoje słužbne winowatosće nastupajo swěru k wustawje, politisku zdźeržliwosć kaž tež dostojne a dowěrliwe zadźerženje ranił, justicne ministerstwo zdźěli. Maier bě so wčera do sakskeje justicy nawróćił a swoju słužbu na hamtskim sudnistwje w Dippoldiswalde nastupił.

Sakska justicna ministerka Katja Meier (Zeleni) kročel krajneho sudnistwa wuraznje wita. Wona na to skedźbnja, zo dyrbja so ludźo na to spušćić móc, zo so sudnicy a wšitcy zastojnicy k demokratiskim zasadam wuznawaja. Sakske justicne ministerstwo chcyše Jensa Maiera na wuměnk pósłać. Wo tym pak njeje hišće rozsudźene. Wustawoškit ma jeho za prawicarskeho ekstremista.

Zmužita akcija w ruskej telewiziji – wjele ciwilnych woporow w Ukrainje

Kijew (dpa/SN). We woblěhowanym ukrainskim přistawnym měsće Mariupol ličba morjenych wobydlerjow ruskeho wobtřělenja dla dale přiběra. Po oficialnych informacijach je tam dotal 2 300 ludźi žiwjenje přisadźiło. Mjeztym dwacety dźeń ruskeje inwazije rozprawjeja tež w dalšich ukrainskich městach wo ruskim wobtřělenju. Wulku kedźbnosć zbudźiła je sobudźěłaćerka ruskeje telewizije, pokazowaca wčera we hłownych powěsćach plakat přećiwo wójnje.

Mariupol ze swojimi něhdźe 400 000 wobydlerjemi je mjeztym symbol ukrainskeho spjećowanja. Ukrainski prezident Wolodymyr Zelenskyj rjekny, zo zadźerža ruscy wojacy hižo tři dny transport ze sto tonami žiwidłow, wody a lěkow na kromje Mariupola. Knježerstwo w Kijewje chce wšitko za to činić ludźom pomhać. Poměry w měsće su po informacijach zamołwitych „nječłowjeske“. Tež wšitke pospyty ewakuacije su dotal zwrěšćili. Zelenskyj zdobom připowědźi, zo chcedźa dźensa dale ze zastupnikami Ruskeje jednać.