Biden wjećbu připowědźił
Wopačny swět w Kabulu
UNO prosy na wjeršk
Miliony eurow za nowe sireny
Drježdźany (dpa/SN). Swobodny stat Sakska chce ze Zwjazkom a tamnymi zwjazkowymi krajemi zrěčenje nastupajo pjenježnu pomoc k polěpšenju warnowanskeje infrastruktury wotzamknyć. Krajne knježerstwo je minjenu wutoru „hnydomny pomocny program za sireny wobzamknyło“. Nutřkowny minister Roland Wöller (CDU) ma program za wažny „hladajo na warnowanje wobydlerjow w padźe katastrofy“. Wón je za to, kóždy móžny warnowanski srědk wužiwać, dokelž móže kóžde warnowanje žiwjenje wuchować. Z cyłkowneho spěchowanskeho programa 88 milionow eurow dóstanje Sakska nimale 4,3 miliony. Z pjenjezami chcedźa nowe sireny kupić a wobstejace hladać. Za natwar noweje sireny na třěše přewostaja 10 000 eurow a za sirenu na sćežorje 17 000 eurow. Narunanje abo wudospołnjenje elektroniskeje sirenoweje techniki spěchuja z 1 000 eurami.
W Sakskej je tuchwilu něhdźe 3 000 sirenow. Po wulkej wodźe lěta 2002 bě swobodny stat komunam 1,3 miliony eurow za ponowjenje sirenow a za wutwar warnowanskeje syće přewostajił. Wot toho časa su 400 nowych sirenow zatwarili.
To a tamne (27.08.21)
Zwada wopačneje pizzy dla je so w badensko-württembergskim Waghäuselu namócnje skónčiła. Mějićel wobchoda biješe hosća z pizzowej łopaču na hłowu a skónčnje na zemi ležaceho z nožom mjezwoči zrani. Po wšěm zdaću njeje pizza hosćej hódź była.
Inscenacija dweju młodostneju za Instagram z wopačnej třělbu je w sewjerorynsko-westfalskim Bergheimje zasadźenje policije zawiniła. Žona bě policiju wo pozdatnje ćežko wobrónjenym poriku informowała. Zastojnicy přijědźechu z wjacorymi awtami a nańdźechu 14lětneho a 16lětnu při inscenowanju. Hrajkanska trělba bě mašinskej třělbje G36 chětro podobna. Młodostneju přepodachu staršimaj.
Liča z ćežkimi jednanjemi
Berlin (dpa/SN). Dosć wobćežne rozmołwy wočakuja dźěłarnistwa w přichodnym kole tarifowych jednanjow za přistajenych zjawneje słužby. Wšako su kasy zjawnych dźěłodawarjow koronakrizy a inflacije dla prózdne. Kaž dźěłarnistwo ver.di zdźěli, chcedźa w běhu dnja tarifowe žadanja wozjewić. Znate mjeztym je, zo chcedźa wurunanje za wobćežowanja korony dla wuwojować. Tarifowe jednanja su w oktobru a nowembru.
Incidenca snadnje přiběraca
Lipsk (dpa/SN). Sydomdnjowska incidenca w Sakskej snadnje přiběra. Po najnowšich informacijach Roberta Kochoweho instituta wučinja wona aktualnje 17,9 po wčerawšimaj 16,2. Strowotniske zarjady su institutej w běhu dnja 191 infekcijow a jedyn smjertny pad w zwisku z koronawirusom zdźělili. Na intensiwnych stacijach sakskich chorownjow lěkuja 20 pacientow. Po cyłym swobodnym staće maja 125 łožow na intensiwnych stacijach, hdźež na koronu schorjenych lěkuja.
Lědma zajim za paralympics
Zwjazkowy prezident Frank-Walter Steinmeier je dźensa we wobłuku ...
„Zasadźenje zełžane było“
Berlin (dpa/SN). Kritiski dźěłowy kruh wojakow „Darmstadtski signal“ hódnoći wobdźělenje Němskeje na zasadźenju w Afghanistanje jako „hoberski zmylk“. „Zasadźenje bě runje tak zełžane kaž bě překwapjenje kónca dla zludace“, praji rěčnik dźěłoweho kruha Florian Pfaff rozhłosownikam. „Su nas z kraja ćisnyli. Smy zepěranišća rozpušćić dyrbjeli, dokelž bě ćišć přewulki. Štóž nětko tak čini, jako by so na afghanisku armeju spušćał, njeje sprawny.“ Wójnje w Iraku a Afghanistanje mjenowaše Pfaff bjezzmyslnej a zełžanej.
Skerje lěwicarsce wusměrjeny kruh „Darmstadtski signal“ ma so za „jenički kritiski forum bywšich a aktiwnych oficěrow, podoficěrow, wojakow a ciwilnych přistajenych Zwjazkoweje wobory. Prěnje zetkanje kruha bě 1983. Wón nadawki, zakonje a moralku armeje kritisce přewodźa, rěka na jeho internetnej stronje.
Kónc lětow
Kopenhagen/Paris (dpa/SN). Danska je přestała sobudźěłaćerjow swojeho wulkopósłanstwa w afghaniskej stolicy Kabulu z wěstotnych přičin ewakuować, kaž zakitowanska ministerka Trine Bramsen medijam zdźěli. Poslednje lětadło je w Islamabadźe přizemiło. W nim běchu posledni přistajeni wulkopósłanstwa, wojacy a diplomaća z Kabula. Danska bě minjene dny něhdźe tysac ludźi z Afghanistana ewakuowała.
Francoska chce swoje ewakuaciske lěty jutře zakónčić. Kaž ministerski prezident Jean Castex w Parisu rjekny, reaguja tak na planowane cofnjenje poslednich wojakow USA z Afghanistana.
Merkel chce z talibanami jednać
Berlin (dpa/SN). Zwjazkowa kanclerka Angela Merkel (CDU) je so za jednanja z militantno-islamistiskimi talibanami wo času po cofnjenju mjezynarodnych jednotkow z Afghanistana wuprajiła. W swojej knježerstwowej deklaraciji w zwjazkowym sejmje wona wčera zdobom rjekny, zo pak dyrbjeli tajke jednanja mjezynarodnje dorěčane być. Dale kanclerka přizna, zo je zwjazkowe knježerstwo najnowše wuwiće w Afghanistanje wopak posudźowało. Runočasnje wšak wjele diskutowanu ewakuaciju bywšich afghaniskich sobudźěłaćerjow Zwjazkoweje wobory zakitowaše. „Wuwiće minjenych dnjow je surowe a hórke. Za ludźi Afghanistana je to jenička tragedija.“
Předsyda frakcije Lěwicy Dietmar Bartsch wumjetowaše zwjazkowemu knježerstwu we wčerawšej debaće njekmanosć jednanja a je sej wosobinske konsekwency žadał, mjenujo wonkowneho ministra Heika Maasa (SPD), zakitowansku ministerku Annegret Kramp-Karrenbauer (CDU) a nutřkowneho ministra Horsta Seehofera (CSU).
