Dehoga: Towaršnosć njepačić
Podstupim (dpa/SN). Zwjazk hotelownikow a hosćencarjow Braniborskeje (Dehoga) je w diskusiji nastupajo lěpšiny za šćěpjenych před „towaršnosći dweju klasow“ warnował. Zastopnjowanje do šćěpjenych a nješćěpjenych by jenož njeměr zbudźiło, rjekny prezident Dehoga Olaf Schöpe powěsćerni dpa. W branši dźe nětko najprjedy raz wo to, z móžnymi wolóženjemi dźěło scyła zaso zmóžnić a nic wo to, wo lěpšinach za šćěpjenych rěčeć. Najwažniši je tuchwilu plan wotewrjenja hosćencow a hotelow. Tam maja hižo wotpowědne schodźenkowe koncepty. Kóždy dyrbjał za swój dom wotpowědny koncept nastajić. Schöpe spušća so na kreatiwnosć branše.
Němska etikowa rada bě wčera wotradźiła, šćěpjenym porno nješćěpjenym lěpšiny spožčić. Wobmjezowanja měli so za wšitkich ludźi runočasnje zběhnyć. Nimo toho njeje hišće dopokazane, zo njemóža šćěpjeni koronawirus wjace dale dawać. W tym zwisku běchu zarjadowarjo koncertow připowědźili, zo předawaja zastupne lisćiki jenož hišće šćěpjenym.
Zhromadnje jednać
Liča z wjele sněhom
To a tamne (05.02.21)
Magdeburgska katedrala je na nowym dwueurowskim pjenjezu zwěčnjena, kotryž Zwjazkowa banka wudawa. Wurjadny motiw su składnostnje saksko-anhaltskeho prezidentstwa Zwjazkoweje rady wuzwolili. Ministerski prezident Reiner Haseloff (CDU) ma tajki pjenjez hižo w swojej móšni. Zwjazkowa banka chce cyłkownje 30 milionow eksemplarow zhotowić. Motiw dopomina na lońše 500. narodniny Božeho domu w Magdeburgu.
Do prěnjeho poschoda jednoswójbneho domu zrazył je 43lětny ze swojim wosobowym awtom njedaloko Hamburga. Do toho bě sej muž za wodźidłom wusnył. Jako jeho wóz z wulkej spěšnosću přez nasyp zajědźe, tón runjewon wotzběhny, do domu zrazy a w róštach tčacy wosta. Wohnjowa wobora na zbožo jeno snadnje zranjeneho šofera wuswobodźi. Policija wšak zwěsći 1,1 promil alkohola.
Proces njeje hišće wotzamknjeny
Serbscy křesćenjo Hodźijskeje wosady wojuja wo swoje prawa w sakskej krajnej cyrkwi
Hodźijska wosada ma za ewangelskich Serbow wosebity narodny wuznam. Tón zwisuje wusko ze skutkowanjom Wjacława Warichiusa w 16. lětstotku kaž tež ludoweho pěsnjerja Pětra Młónka a fararja Jaroměra Hendricha Imiša w 19. lětstotku. „W Hodźiju bě serbski prědarski seminar. Tajki swójski seminar naša krajna cyrkej dźensa žadyn wjace nima“, měni wyši krajny cyrkwinski rada dr. Thilo Daniel, decernent za teologiske zasadne prašenja w krajnym cyrkwinskim zarjedźe Ewangelsko-lutherskeje krajneje cyrkwje Sakskeje (EVLKS).
Žane lěpšiny za šćěpjenych
Berlin (dpa/SN). Němska etikowa rada poruča, wobmjezowanja koronawirusa dla za wšitkich ludźi runočasnje zběhnyć. Wuwzaća za přećiwo wirusej šćěpjenych njejsu tuchwilu zmysłapołne. Nimo toho dyrbjało najprjedy jasne być, hač njemóža šćěpjeni woprawdźe nikoho wjace z wirusom natyknyć, rjekny předsydka rady Alena Buyx dźensa w Berlinje. Prawidła a wotstawk dodźeržeć kaž tež nahubniki wužiwać je šćěpjenym tohorunja přicpějomne. Etikowa rada je poradźowacy gremij.
Dwěluja na nahubnikach FFP2
Stockholm (dpa/SN). W boju přećiwo koronawirusej budźi strowotniski zarjad Europskeje unije ECDC dwěle na přidatnej skutkownosći nahubnikow FFP2. „Wočakowana přidatna skutkownosć při uniwerselnym wužiwanju nahubnikow FFP2 w zhromadźenstwach je jara snadna“, zarjad w Stockholmje informuje. Tež kóšty a móžne njelěpšiny rěča přećiwo poručenju, tele škitne nahubniki w zjawnosći wužiwać. Nadrobnosće k móžnym njelěpšinam zarjad njemjenuje.
USA zrěčenje z Ruskej podlěša
Prěnju digitalnu připrawu za točenje piwa maja wot wčerawšeho w ...
Dalšu podpěru swójbam a firmam schwalili
Berlin (dpa/SN). Wulka koalicija chce negatiwne sćěhi koronakrizy za swójby, mało zasłužacych, hospodarstwo a kulturu z nowymi připłatkami wjacorych miliardow eurow pomjeńšić. Tak chcedźa swójbam kaž hižo loni dźěćacy bonus wupłaćić. Připłatk k dźěćacemu pjenjezej ma jónkrótnje 150 eurow wučinjeć, kaž su wodźacy zastupnicy CDU/CSU a SPD wčera wječor na posedźenju koaliciskeho wuběrka wobzamknyli. Jónkrótny připłatk 150 eurow dóstanu tež dorosćeni přijimarjo zakładneho zawěsćenja. Njejapcy w nuzy tčacy samostatni a přistajeni ze snadnej mzdu maja jednoriši přistup k zakładnemu zawěsćenju hač do kónca lěta 2021 dóstać.
Wulka koalicija chce tež předewzaćam pomhać, kotrež su koronapandemije dla straty poćerpjeli. Firmy móža je w dawkowej deklaraciji zapodać.
Pomhać chcedźa CDU/CSU a SPD dale wot lockdowna wosebje potrjechenej gastronomiji. Tak ma za jědźe w hosćencach a kofejownjach hač do kónca lěta 2022 znižena dawkowa sadźba sydom procentow płaćić. Poprawom bě to jenož hač do kónca junija předwidźane.
Žane woprawdźite wotputanje
Drježdźany (dpa/SN). Sakska ministerka za strowotnistwo Petra Köpping (SPD) njewidźi najebać woteběrace hódnoty incidency w koronapandemiji hišće „žane woprawdźite wotputanje“. Přiwšěm móžeše wona ze swojej wčerawšej rozprawu w krajnym sejmje polěpšenja zwěsćić. Tak je so ličba infekcijow na 100 000 wobydlerjow w běhu sydom dnjow na 119,8 pomjeńšiła. W decembru ležeše wona w Sakskej hišće pola wjace hač 400 a bě tak po cyłej Němskej najwjetša. Ličba smjertnych padow pak je přeco hišće wulka. Tež mutacije wirusa zamołwitych starosća. Dotal su w Sakskej 16 padow zwěsćili.
Ministerka Köpping pokaza hladajo na wobmjezowanja žiwjenja koronawirusa dla zrozumjenje za přiběracu njesćerpnosć w ludnosći. „To su napinace tydźenje.“ Zaměr je, wobmjezowanja krok po kroku zaso zběhnyć – ale stajnje wotwisnje wot ličby incidency. Nimo toho ma swobodny stat spěšnje reagować móc, dyrbjała-li ličba zaso přiběrać. Naprawy hygieny a wužiwanje nahubnikow wostanu tež w přichodźe centralna tema.
„Strašny demokratiski deficit“
Mjeńšinowa rada wo rozsudźe Europskeje komisije přesłapjena
Berlin (SN). Rada štyrjoch awtochtonych narodnych mjeńšin a ludowych skupin Němskeje namołwja zwjazkowe knježerstwo, sej z jasnym signalom wot Europskeje komisije wužadać, zo rozsud přećiwo europskej wobydlerskej iniciatiwje Minority SafePack cofnje. Komisija EU bě srjedź januara připowědźiła, zo mjeńšinopolitiske žadanja iniciatiwy do płaćiwych zakonjow Europskeje unije njepřetwori.
