Ničo rjeńše hač te lubosća, hdyž žeńtwa je so radźiła
napisała Annamaria Zahonowa
Kij w ruce a wačok na ramjenjomaj, třěchu jehlinowych hałzow nad sobu a kamjenjaty puć před sobu steješe Theja, kaž přihotowana za dalokoběh w startowej poziciji. Kós na hałzy pódla njeje machaše z křidleškomaj, prjed hač zaspěwa swój wosobinski rańši kěrluš. Hišće tři běrtlki hodźiny, a potom słónco schadźa. Theja znaješe někotre časy domjacych ptačkow, hdy započinachu ranje witać. Tři běrtlki hodźiny, a prěnje konje domjaceho procesiona budu gratowane. Theja přebywaše k jutram stajnje na domjacym statoku w přitulnej wjesce, kotraž sćeleše znajmjeńša tři pory křižerjow na wozjewjenje radostneho poselstwa po Łužicy. Hižo wot małosće sem pomhaše nanej w konjencu a maćeri na wysokim swjatym dnju. Tola lětsa wijachu so jutry po hinašich šćežkach. Lětsa padny datum jeje narodnin na jutrońčku. Nimo toho woswjeći tónkróć jutry z přećelom, Němcom. Katolskim drje, ale njenazhonitym we wašnjach a we wědomju, kak wažne katolskim Serbam je, kołowokoło koni a křižerjow k poradźenju wulkeho swjedźenja sobu skutkować.
Anton Nawka
4. jutrownika před 25 lětami zemrě spisowaćel, rěčewědnik a lawreat Myta Ćišinskeho 1995 Anton Nawka w Budyšinje. Wón bu na Mikławšku blisko nana Michała Nawki a jeho mandźelskeje pochowany. Wulka ličba přewodźerjow zanjese na pohrjebje wot njeho zbasnjeny kěrluš „Božo, Ty, Serbow wodźił sy a škitał“.
Što poprawom Saksku charakterizuje bě prašenje, z kotrymž bě so ...
Klip „Mróčele“ ze šansu na „Złoteho jěcharja“
Towarstwo Filmowa iniciatiwa Drježdźany hotuje so na lětuši 35. filmowy swjedźeń w stolicy Sakskeje. Tele dny wozjewichu dospołny program festiwala a zahajichu předpředań zastupnych lisćikow. Swjedźeń zahaji so 18. apryla, zakónčaca mytowanska ceremonija wotměje so slědowacu njedźelu.
Drježdźany (SN/bn). Program wopřijima cyłkownje 188 prezentacijow we wjacorych Drježdźanskich programowych kinach z dohromady 371 krótkofilmami, produkowanymi w 66 krajach. Prěni raz poskića na Hrodowym naměsće paralelnje darmotnu filmowu přehladku pod hołym njebjom. Dalša nowostka je rjad „Loto krótkofilmow“, w kotrymž publikum a připad slěd pokazanych paskow postajatej. Tematiske ćežišća festiwal wobrubjacych specifiskich zarjadowanjow su mjez druhim Yannej Gonzalesej wěnowana retrospektiwa, tworjenje litawskeho filmowca-disidenta Artūrasa Barysasa, baskiske kino a jeho wliw na tamnišu towaršnosć kaž tež katalanske filmowstwo w europskim konteksće.
„Smy pozitiwnje šokowani“
Drježdźany (SN/MG). W „padźe Mónika“ (SN rozprawjachu) dóńdźe wčera na wyšim krajnym sudnistwje k doskónčnemu wusudej. Po dołhim jednanju před sudnistwomaj w Zhorjelcu a Drježdźanach rozsudźichu sudnicy w sakskej stolicy nětko, zo smě wobsedźer modoweho labela LABA Gerhard Zschau T-shirt z linolorězom Hanki Krawcec z lěta 1974 předawać. Tak pisa sudnistwo w nowinskej zdźělence. Přećiwo tomu bě stara Serbowka skoržiła, kotraž bu w młodosći wot wuměłče zwobraznjena.
Swój wusud wopodstatnichu sudnicy z tym, zo njeje prawdźepodobne, zo ludźo mjeztym staru žonu přez motiw na T-shirće w zjawnosći spóznawaja. Tež argument Zschauwa, zo polěkuje z předawanjom produkta rozšěrjenju serbskeho wuměłstwa, sudnikow přeswědči. Wčerawši wusud je doskónčny a njehodźi so hižo na wyšej instancy wotprěć.
Po wozjewjenju wusuda wupraji so Gerhard Zschau našemu wječornikej: „Smy pozitiwnje šokowani. Jednanja njejsu signalizowali, zo móhli tak wuńć. Njemóžemy hišće prawje wěrić, zo směmy T-shirt skónčnje předawać.“
Monika a hra wo trón
„Wójna a měr“ nazwučowali
Herman Šleca
Nowe młode wobličo w redakciji
Maximilian Gruber (19) je hižo w młodźinskej redakciji Serbskich Nowin sobu skutkował. Ale tež za Katolski Posoł běše so wospjet pjera jimał. Něhdyši předsyda šulerskeje rady Serbskeho gymnazija a amtěrowacy rěčnik młodźiny biskopstwa Drježdźany-Mišno njeje jenož wjacore lěta na jewišću serbskeho młodźinskeho dźiwadła publikum we wšelakich rólach zwjeselał, ale hižo prěnje kročele na politiskim parkeće kročił: z mandatom Domowiny jako zastupjer serbskeje młodźiny w poradźowacym wuběrku za prašenja serbskeho ludu při zwjazkowym ministerstwje nutřkowneho.
Loni swoju maturu złožiwši rozsudźi so za swobodne socialne lěto we wobłuku biskopstwa za dekanatnu młodźinu we Worklecach a na farje w Chrósćicach. Hladajo na wosebite aktualne wužadanja serbskeho nowinarstwa je Maximilian Gruber rady zwólniwy był, spočatk jutrownika do redakcije Serbskich Nowin zastupić a dwulětny wolontariat započeć.
Z kóždeje larwy dźěłaćerki móže so kralowna stać
Budyšink (CS/SN). Hnydom w štyrjoch eksemplarach nowa wopomnjenska tafla za Hadama Bohuchwała Šěracha předleži. „Mać wšitkich taflow“ su wčera na kěrchowje w Budyšinku wotkryli. Na njej stej žiwjenje a skutkowanje serbskeho fararja, přełožerja, spisowaćela a slědźerja wo pčołkach runohódnje w němskej a serbskej rěči předstajenej. Druhu taflu su w Budyšinkskej cyrkwi poswjećili. Ju darja muzejej pčołkow we Weimarje, hdźež hač dotal wo wuznamnym hornjołužiskim wučencu ničo wědźeli njejsu. Krajny rada Udo Wićaz (CDU) bě tutu taflu sponsorował a ju tež sobu poswjeći. Třeću taflu chcedźa klětu w Nosaćicach pola Wósporka nastajić, hdźež bě so Šěrach dnja 5. septembra 1724 narodźił. Štwórta tafla skónčnje ma w słužbje „Pčólneje towaršnosće Šěrach z.t.“ „pućować.
