W dwěmaj, druhdy tež w třoch rynkach, stejachu njedźelu přihladowarjo při wubědźowanskej čarje dumperow w Hórkach na něhdyšim twjerdym kopanišću. Prěni raz přewjedźechu tam Lejnjanscy motorsportowcy wubědźowanje z dumperami, štož bě połny wuspěch. Wosebje njedźelu na hłownym běhu wo němske dumperowe mišterstwa steješe při čarje, kotruž bě Křesćan Grutka z pomocnikami natwarił, wokoło 500 přihladowarjow. Grutka naćisny spěšny a runočasnje naročny parcours z křiwicu 360 stopnjow a nasypom, kotryž natwarištej motorsportowcam Vćelichec a Wehnertec firmje. Tež dokoławokoło bě wšitko jara derje organizowane, tak zo móžachu přihladowarjo, zamołwići a akterojo dwaj wuspěšnej dnjej dožiwić. Pjate a zdobom poslednje wubědźowanje 2017 wo němske dumperowe mišterstwa doby Filip Kral z Róžanta (Dumperowy klub Lejno) před Marcusom Donatom z Baćonja (Dumperowy klub Lejno) a Frankom Domšom ze Zejic (Wubědźowanski team Adelsdorf/Quersa). Tež w mustwowym hódnoćenju móžachu domjacy triumf swjećić.