To a tamne (26.11.18)
Wutřěle ze samopasleneje płunoweje kanony na kwasu su w delnjobayerskim Bad Füssingenje zasadźenje policije zawinili. Do toho informowachu wjacori wobydlerjo policiju, zo bě něchtó w nocy třělał. Tomu drje zasadnje tak bě, ale wutřěle njeběchu strašne. Kwasna hosćina bě na priwatnej ležownosći na česć nowozmandźeleneju z kanonu třělała. Městna policija pak njebě informowana. Zastojnicy hotowostneje a zwjazkoweje policije móžachu woměrje zaso wotjěć. Štó ma akciju zapłaćić, hišće pruwuja.
Pytajo za pokładom je cłownica w Podstupimje drogi namakała. Zhromadnje ze swójbnymi bě wona we wobłuku moderneje nawigaciskeje hry geocaching po puću, jako jej podhladnej pakćikaj napadnyštej, kotrež zboka puća schowanej ležeštej. W nimaj bě cyłkownje 116 gramow marihuany. „Wjeselu so, zo njejsu dźěći drogi při hrajkanju našli“, rjekny žona a donjese pakćikaj policiji.
Štyrnaće kandidatow nominowali
Worklecy (SN/BŠe). Worklečanska skupina CDU so womłodźa. Na wčerawšej zhromadźiznje móžachu hnydom 14 kandidatow za wólby gmejnskeje rady klětu w meji nominować. Kaž lisćina přeradźa, su mjez nimi nětko nowi a młodźi zwólniwi.
Za Worklečansku wjesnu skupinu CDU kandiduja k wólbam gmejnskeje rady dr. Beno Wałda, Robert Šołta, Mathias Bjeńš, Florian Šołta, Sigrid Brücknerowa, Syman Bjarš, Enrico Hajna a Silvio Riedel (wšitcy CDU) kaž tež Jadwiga Richterowa, Pětr Brězan, Marcel Rjelka, Roman Mejgl, Chrystof Wulenk a Heide Šołćina, kotřiž CDU njepřisłušeja.
Znjewužiwanje znowa tema
Bonn (dpa/SN). Katolska cyrkej je so dźensa znowa ze studiju wo znjewužiwanju wjac hač 3 600 njepołnolětnych přez katolskich duchownych zaběrała. Tema steji w srjedźišću nazymskeje hłowneje zhromadźizny Centralneho komiteja němskich katolikow (ZdK) w Bonnje. We wšěch biskopstwach pady přepruwuja. Prezident ZdK Thomas Sternberg sej žada, zo ma cyrkej wo zrozumjenju seksuality a wo noworjadowanja klerikalnych nawodnych strukturow rozmyslować.
Klětu wjace pjenjez wudać
Berlin (dpa/SN). Zwjazkowy sejm chcyše dźensa wo klětušim etaće wothłosować. Koalicija CDU/CSU a SPD chce wjace pjenjez za socialny wobłuk, swójby, zakitowanje a wuwićowu pomoc wudać. Etat wopřijima cyłkownje 356,4 miliardy eurow, nimale 13 miliardow eurow wjace hač lětsa. Nowe zadołženje njebudźe dźakowano dawkowym dochodam žane trěbne. Nimo wolóženjow nastupajo popłatkow chorobnych kasow je wot julija tež předwidźane, dźěćacy pjenjez wo dźesać eurow měsačnje zwyšić.
Žane wupokazanja do Syriskeje
Merz so za prawo na azyl wuprajił
Halle (dpa/SN). Po masiwnej kritice je so kandidat za naslědnistwo předsydki CDU Angele Merkel, bywši frakciski šef Friedrich Merz, wčera na regionalnej konferency w Halle nad Solawu jasnje za zakładne prawo na azyl wuprajił. Wón pak wuzběhny, zo dyrbja wo jednotliwych rjadowanjach azyla hišće diskutować. Jenož tak móže so jednotna europska praksa wuwić.
Hižo nětko je wotwidźeć, zo budźe migracija tema na stronskim zjězdźe CDU spočatk decembra, hdźež wuzwola zdobom noweho předsydu/nowu předsydku. Nimo Merza kandidujetaj za zastojnstwo tež generalna sekretarka CDU Annegret Kramp-Karrenbauer a zwjazkowy minister za strowotnistwo Jens Spahn.
Debatu wo migraciskim pakće UNO je strona AfD nastorčiła a CDU chětro překwapiła. Annegret Kramp-Karrenbauer wčera rjekny, zo mamy z temu přichodnje sensibelnišo wobchadźeć. Wona wupraji so za pakt, dokelž wjace pomha hač škodźi. Po słowach wšěch třoch kandidatow měłoj křesćanskich demokratow nutřkowna a wonkowna wěstota wuznamjenjeć. Na tym njeměli dwělować.
To a tamne (23.11.18)
Runje 49 mjeńšin móžeše so šofer-započatkar nad swojej jězbnej dowolnosću za awto wjeselić, potom dyrbješe „papjery“ hižo zaso wotedać. 18lětny smaleše bjezposrědnje po pruwowanju z 95 km/h po sewjerorynsko-westfalskim Hemeru. Policisća při laserowym nastroju jeho zadźeržachu. Nimo pokuty 200 eurow a dweju dypkow w Flensburgu dyrbi młodostny drohe dalekubłanje na so wzać. Tež probowy čas su jemu podlěšili.
Chětro wunošne bě wulke rjedźenje domu do swjedźenja Thanksgiving za porik w zwjazkowym staće USA Louisiana. Při rumowanju namakaštaj wjacore loterijowe lisćiki. Při přepruwowanju zwěsćištaj, zo staj 1,8 mio. dolarow dobyłoj. Lisćik bě jenož hišće něšto dnjow płaćiwy.
Strukturna změna dlěje traje
Magdeburg (dpa/SN). Wuspěšna strukturna změna w brunicowych kónčinach traje po měnjenju saksko-anhaltskeho ministerskeho prezidenta Reinera Haseloffa znajmjeńša 30 lět. W knježerstwowej deklaraciji politikar CDU dźensa warnowaše, konkretny datum kónca zmilinjenja brunicy dočasnje postajić. „To by přemało było“, Haseloff hladajo na dźěło wuhloweje komisije rjekny. Wón sej zdobom žada, zo maja wo strukturnej změnje z wobydlerjemi rěčeć.
Na wusměšowanje reagował
Rom (dpa/SN). Hospodarski komisar EU Pierre Moscovici je z jasnymi słowami na wusměšowanje ze stron Roma do Brüssela reagował. „Njejsym rumpodich. Sym komisar EU za hospodarske naležnosće a wočakuju wotpowědny respekt“, rjekny Francoza na wuprajenje italskeho zastupowaceho ministerskeho prezidenta Matteja Salvinija. Tón bě po doskónčnym wotpokazanju naćiska italskeho etata přez komisiju EU rjekł, „zo tež na list rumpodicha čaka“. Moscovici žada sej wot Italskeje zwólniwosć k rozmołwje a nowy naćisk budgeta.
Na mjezy zaso kontroluja
Kandidaća CDU w Halle – Merz azyl narěčał
Halle (dpa/SN). Kandidaća za předsydstwo CDU přińdu dźensa hišće raz do wuchoda. Třo požadarjo z najlěpšimi wuhladami za naslědnistwo Angele Merkel předstaja so wječor na regionalnej konferency w Halle. Něhdźe 500 wobdźělnikow saksko-anhaltskeho a sakskeho krajneho zwjazka je so přizjewiło. Generalna sekretarka CDU Annegret Kramp-Karrenbauer, bywši frakciski šef Friedrich Merz a minister za strowotnistwo Jens Spahn chcedźa na prašenja wobdźělnikow wotmołwjeć. Noweho předsydu CDU wuzwola 7. decembra na zjězdźe strony.
Pólska zakoń zaso zběhnyła
Waršawa (dpa/SN). Sćěhujo wukaz Europskeho sudnistwa je pólske knježerstwo nanuzowane pensionowanje najwyšich sudnikow zaso zběhnyło. Knježaca narodnokonserwatiwna strona Prawo a sprawnosć je wčera w parlamenće wotpowědny naćisk zakonja předpołožiła. Ze zakonjom prawniski status nuzowje pensionowanych sudnikow změnja a jim dowola słužbu zaso wukonjeć.
Potrjecheni jurisća su so bjezposrědnje po wusudźe 19. oktobra zaso na swoje dźěłowe městna wróćili. Tehdy bě sudnistwo wukazało, dwělomne nanuzowane pensionowanje hnydom skónčić. Pozadk bě zakoń, z kotrymž bě narodnokonserwatiwne knježerstwo rentowu starobu najwyšich sudnikow wot 70 na 65 znižiło, chcyjo tak po informacijach kritikarjow wjace hač 20 njelubych juristow wotbyć. Komisija EU měješe njewotwisnosć justicy za wohroženu a je přećiwo zakonjej skoržiła. Nimo toho přepytuje ranjenja prawidłow EU dla.
Powołanscy šoferojo faluja
Film wo naročnym dźěle ma dalšich zajimcow wabić
Čorna Pumpa (JoS/SN). Njedostatk wodźerjow nakładnych awtow a busow w minjenych třoch lětach wobradźa spediciskim předewzaćam lěta wulke starosće. Po wšej Němskej pytaja tuchwilu 45 000 šoferow busow a Lkw-jow, w Braniborskej 2 000. Něhdźe pjećstow móhli nablaku přistajić, ći pak pobrachuja. Mjeztym přichadźa hižo 15 procentow šoferow z wukraja. Dołhodobne rozrisanje pak to njeje.
W Sakskej njeje połoženje lěpše. Wo tym su minjeny pjatk w Čornopumpskej Transportnej a spediciskej towaršnosći (TSS) informowali. Nastork k zarjadowanju dała bě Choćebuska Industrijna a wikowanska komora (IHK). Wona je wukubłansku ofensiwu zahajiła, zo by negatiwny trend zadźeržała. Prěnje wuspěchi pak su skromne. Tuchwilu je w komornym wobwodźe 15 wukubłanskich zawodow z cyłkownje 50 wučomnikami. Potrjeba pak je wo wjele wjetša.
Turizm we Łužicy jara wažny
Choćebuz (dpa/SN). W zwisku ze strukturnej změnu we Łužicy je turizm z wida braniborskeho hospodarskeho ministra Jörga Steinbacha (SPD) dale a wažniši. Najprjedy pak dyrbjeli so wohrožene industrijne dźěłowe městna z runohódnymi městnami narunać, rjekny Steinbach na wčerawšim Braniborskim turistiskim dnju w Choćebuzu. „Wuspěšny turizm nahladnosć regiona pozběhnje a twori nowe móžnosće identifikacije a žiwjenskeje kwality za ludnosć.“ Bohužel njemóžeše Choćebuz minjeny čas po rozestajenjach mjez domoródnymi a požadarjemi azyla z toho ničo wuzbytkować. Město dóstawa pomoc, zo móhło so prawicarskim mocam wobarać.
Łužiska jězorina zbudźa dźeń a wjetši zajim mjez dowolnikami. Z poskitkom móže sej Braniborska mjez druhim čěske wiki wotkryć, Jörg Steinbach wuzběhuje. Wón z toho wuchadźa, zo budu w přichodnej turistiskej sezonje Złokomorowski jězor a jeho přibrjohi turistisce zaso wužiwajomne. Dalši turistiski potencial ma Rański jězor ze swojim nowym přistawom. Ličba hosći a přenocowanjow w kraju dale přiběra.
