Meister: Signal wubudźenja
Rozprawa swětoweje klimoweje rady politikarjow k jednanju pohonja
Berlin (dpa/SN). Hladajo na najnowšu rozprawu swětoweje klimoweje rady žadatej sej wobswětowe a slědźenske ministerstwo Němskeje wjace iniciatiwy w boju přećiwo přiběracemu woćoplenju zemje. „Přichodne lěta budu rozsudne, zo njeby naš planet swoju runowahu zhubił“, zdźěla zwjazkowa ministerka za wobswět Svenja Schulze (SPD) z Berlina. Nastupajo škit klimy njeměli dalši čas brojić. Statny sekretar we wobswětowym ministerstwje Jochen Flasbarth měni: „Dopóznaće, zo by woćoplenje zemje wo dwaj stopnjej wo wjele hórše sćěhi za miliony ludźi měło hač wo połdra stopnja, dyrbjało nas stajnje zaso do dźěła pohonjeć.“
Staw Sprjewje dale stabilny
Choćebuz (dpa/SN). Najebać dale trajacu suchotu wostawa staw Sprjewje w Berlinje a Braniborskej dźakowano wody z brunicowych jamow a spjatych jězorow znajmjeńša hač do kónca oktobra konstantny. To zdźěli zamołwity wotrjadnik Podstupimskeho wobswětoweho ministerstwa Kurt Augustin na naprašowanje powěsćernje dpa. Zamołwići z toho wuchadźeja, zo nowy dešć přichodny čas rěki a jězory zaso napjelni. Nimo toho so hižo telko wody při wotběracych temperaturach njewupari. Prawdźepodobnje pak dyrbja staw wody w Grodkowskim spjatym jězoru přichodny čas snadnje znižić. Tam bě pegel po přehladce ministerstwa naposledk zaso přiběrał. Přiwšěm wjedrarjo přichodne dny žadyn dešć njewočakuja.
Porno tomu maja rěki a rěčki w Sakskej přeco hišće přemało wody. „Při měrjenjach zwěsćamy, zo ma něhdźe 70 procentow rěkow staw wody kaž w časach suchoty“, zdźěli rěčnica krajneho zarjada za wobswět, ratarstwo a geologiju. „Tak je po krótkim polěpšenju niski niwow, kajkiž mějachmy srjedź septembra, nimale zaso docpěty.“
Ekumeniski tachantski wobchod wobsteji dźesać lět
Budyšin (CS/SN). W Budyskej Pětrowej cyrkwi su minjeny pjatk dźesaćlětne wobstaće Ekumeniskeho tachantskeho wobchoda woswjećili.
Wobchod při Budyskich Mjasowych wikach běchu nazymu 2008, do reformaciskeho swjedźenja, wotewrěli. Tehdy staj wobchod ewangelski krajny biskop Jochen Bohl a katolski biskop Joachim Reinelt zhromadnje poswjećiłoj. Wša přičina tuž, róčnicu hódnoćić. Koncept wšak su mjeztym tróšku změnili. Dale njezměnjena pak je zasadna myslička, strachi před tamnej nabožinu přewinyć a wěrywuznaći mjez sobu zwjazać.
Ekumeniski wobchod ma wukładne wokno cyrkwinskeho žiwjenja a městno zetkawanja być. Swjedźeń k dźesaćlětnemu wobstaću su z teje přičiny w tachantskej cyrkwi zarjadowali. Mjez něhdźe 200 hosćimi bě mjeztym na wuměnku žiwy biskop Joachim Reinelt, kotrehož staj čłon předsydstwa towarstwa tachantskeho wobchoda Peter-Paul Straube a wjelelětna čestnohamtska sobudźěłaćerka Barbara Pohl wutrobnje witałoj.
To a tamne (09.10.18)
Sydło ćěšenka w kófrowym rumje awta je w durinskim Nordhausenje zasadźenje policije zawinowało. Swědk bě wobkedźbował, kak něhdźe 30lětny muž sydło z dźěsćom zady do kófroweho ruma staji a wotjědźe. Při hnydomnym zasadźenju nastupajo pytanje za dźěsćom dožiwichu zastojnicy překwapjenku: Šofer transportowaše klanku swojeje dźowki w sydle: Holčka kładźe wulku wažnosć na to, zo ma tež klanka swoje městno w awće.
Zabytych a zesmudźenych całtow w kachlach dla su w Crimmitschauwje wohnjowu woboru wołali. Susod 30lětneho, w kotrehož kuchni so paleše, bě wobornikow informował. Ći pak dyrbjachu durje zakurjeneho bydlenja namócnje wočinić a podružnika budźić. Tón ležeše pjany we łožu a na całty w kachlach scyła wjace njemysleše. Z wěstotnych přičin dowjezechu jeho do chorownje.
Interny dialog wažny
Berlin (B/SN). Generalny sekretar arcybiskopstwa Berlin pater Manfred Kollig pleděruje za to, so z nabožinskimi zhromadźenstwami a jich tuchwilnymi prudami sylnišo rozestajeć. Generalny wikar namołwja nabožinske zhromadźenstwa, zo bychu pruwowali, što je negatiwne a što pozitiwne na jich konfesiji. Mnohotnosć móhła tomu słužić, zo wšelakorym čłowjeskim potrěbnosćam a wuměnjenjam wotpowěduje.
Za zakaz wojerskich trutow
Freiburg (B/SN). Awtonomne wojerske systemy kaž wojerske truty měli po měnjenju teologi Eberharda Schockenhoffa zakazać. Morjenje čłowjeka njeměli rozsudźić kompjutery abo algoritmy, ale jeno čłowjek sam, kiž dyrbi so wusprawnić po etiskich/ludoprawniskich měritkach a ma za to zamołwitosć přewzać.
Wustajeńca wo klóštrje
Hišće njeje přepozdźe
Incheon (dpa/SN). Globalne woćoplenje swěta na 1,5 stopnjow wobmjezować je po nahledźe swětoweje klimoweje rady IPCC přeco hišće technisce móžno. Za to pak dyrbjeli na wšitkich polach spěšnje jednać, kaž rěka we wurjadnej rozprawje gremija dwaj měsacaj do přichodneje klimoweje konferency UNO w pólskich Katowicach. Globalny wustork škódneho wuhlikoweho dioksida ma so hač do lěta 2030 społojčić a w lěće 2050 nulu docpěć, sej awtorojo rozprawy žadaja.
Chorwaća poražku poćerpjeli
Sarajewo (dpa/SN). Při wólbach třiwosoboweho statneho nawodnistwa Bosniskeje-Hercegowiny su Chorwaća z Hercegowiny ćežku poražku poćerpjeli. To je jich dotalny zastupnik w gremiju Dragan Čović přiznał. Město Čovića budźe Chorwatow přichodnje ze Sarajewa pochadźacy Željko Komšić zastupować. Mjez bosniskimi muslimami je so zastupnik najwjetšeje strony SDA Šefik Džaferović přesadźił. Južni Serbja su přez swojeho wjelelětneho nawodu Milorada Dodika znowa zastupjeni.
Knježerstwo wjetšinu zhubiło
Zwjazkowa kanclerka Angela Merkel (CDU) je sobotu wšoněmski zlět ...
Woidke: Brunica znajmjeńšahač do lěta 2040
Berlin (dpa/SN). Braniborski ministerski prezident Dietmar Woidke sej žada, brunicu we Łužicy znajmjeńša hišće dwaj lětdźesatkaj wudobywać. „Brunica we Łužicy je kónčna, kaž to surowizny scyła su. Rěčimy tu wo 40tych lětach“, rjekny politikar SPD sobotu wječor we wusyłanju sćelaka ARD „Rozprawa z Berlina“. To je „porjadna perspektiwa za region. Ludźo trjebaja wěstotu, runje ći, kotřiž tam dźěłaja.“
Woidke potwjerdźi, zo njesměłoj so škit klimy a zachowanje dźěłowych městnow mjez sobu wuhrawać. „Diskusija zwonka potrjechenych kónčin je zasadnje wopačna. Dyrbimy w Němskej runje jako industrijnym kraju narok měć, škit klimy a dźěłowe městna zwjazać.“
Zwjazkowe knježerstwo je k mjenowanej temje wuhlowu komisiju zasadźiło. Gremij „Rozrost, strukturna změna a dźěło“ ma hač do kónca lěta strategiju za kónc zmilinjenja brunicy zdźěłać. Hišće w oktobru ma koncept wo strukturnej změnje we wuhlowymaj kónčinomaj Němskeje předležeć.
Altmaier: Wo poćahi wojować
Moskwa (dpa/SN). Hladajo na napjatosće mjez Němskej a Ruskej hospodarski minister Peter Altmaier (CDU) namołwja, nitku dialoga njepřetorhnyć. „Dyrbimy wo mjezsobne poćahi wojować“, rjekny wón sobotu wječor k zahajenju Pětrohródskeho dialoga w Moskwje. „Smy susodźa a mamy zhromadne stawizny. Wuchadźejo z toho dyrbitej wobaj krajej dialog pěstować. Jenož, hdyž mjez sobu rěčiš, móžeše problemy rozrisać.“
Altmaier rěčeše wo „njejednorych časach“ w poćahach mjez Němskej a Ruskej. Po přiswojenju połkupy Krim přez Rusku 2014 a konflikta na wuchodźe Ukrainy dla su němsko-ruske poćahi napjate. EU bě z hospodarskimi sankcijemi reagowała. Němski předsyda Pětrohródskeho dialoga Ronald Pofalla wumjetowaše ruskemu knježerstwu destruktiwnu politiku. Tež wón naspomni aneksiju Krimy a konflikt na wuchodźe Ukrainy.
Ruski předsyda Pětrohródskeho dialoga Wiktor Zubkow na to pokaza, zo njeje Ruska Krim anektowała, ale zo stej so wobě „znowa zjednoćiłoj“.
To a tamne (08.10.18)
Hodowne štomy za 260 eurow móža sej ludźo wotnětka w thailandskej stolicy Bangkoku skazać. Rjećaz kupnicow Villa skazanki za originalne štomy přijimuje. Předawać chcedźa je wot spočatka decembra, kaž rěkaše. Poskitk měri so na mnohich wukrajnikow ze zapadnych krajow, kotřiž z powołanskich přičin w Bangkoku bydla. Tući maja kóžde lěto wulke problemy, sej porjadny hodowny štom w stolicy wobstarać.
Pěši z koleskatymaj kófromaj na awtodróze po puću běštaj mužej sobotu njedaloko wotjězdki A 4 Budyšin-wuchod. Policistam wonaj rozłožištaj, zo staj po puću do swojeje ukrainskeje domizny. Wjacori šoferojo běchu zastojnikow alarmowali. Tući pěškow na přichodne parkowanišćo dowjezechu a powučichu, zo njesmětaj po awtodróze nóžkować. Zwotkel běštaj přišłoj, njeje znate.
