Němska w Mali komando přewzała

wutora, 28. julija 2015 spisane wot:
Bamako (dpa/SN). Zwjazkowa wobora nawjeduje wot dźensnišeho wukubłansku misiju Europskeje unije w zapadoafriskim Mali. Na swjatočnosći w stolicy Bamako wobdźěli so tež zwjazkowa zakitowanska ministerka Ursula von der Leyen (CDU). Němski brigadowy general Franz Pfrengle rozkazuje cyłkownje 600 wojakow ze 24 krajow, mjez kotrymiž je 160 přisłušnikow Zwjazkoweje wobory, zdźěla powěsćernja dpa. Kaž von der Leyen rjekny, je zaručenje wěstoty w Africe jedyn ze zakładow, zo njetrjebali ludźo z domizny ćěkać. W Mali bě po wojerskim puču 2012 chaos wudyrił, jako islamistiscy zběžkarjo móc na so storhnychu. Francoske jednotki kónčinu 2013 zaso­ wuswobodźichu. Wot toho časa tam EU maliskich wojakow wukubłuje.

dale čitać ...

Starosć nalětow dla

wutora, 28. julija 2015 spisane wot:

Ban Ki-moon namołwja wodźělenych k dialogej

Brüssel (dpa/SN/K). W belgiskej stolicy su so dźensa krótko do připołdnja wulkopósłancy­ z 28 statow NATO na próstwu Turkowskeje k wurjadnemu wjer­škej­ zešli. Turkowska powołuje so na artikl­ 40 zrěčenja wo NATO, po kotrymž su konsultacije předwidźane, čuje-li so někajki čłonski kraj wohroženy.

Přičina zetkanja je chutnosć situacije w Turkowskej po terorowych nadpadach zašłe dny, při kotrychž je wjele dźesatkow ludźi zahinyło. Ze swojeje strony Turkowska za to pozicije teroristiskeje milicy Islamski stat (IS) w Syriskej bombarduje a w sewjernym Iraku zdobom zepěranišća­ zakazaneje kurdiskeje Dźě­łaćerskeje strony PKK atakuje.

dale čitać ...

Talibanojo dalši wobwod zdobyli

wutora, 28. julija 2015 spisane wot:
Kabul (dpa/SN). Talibanojo su po informacijach knježerstwa dalši wobwod w sewjeroafghaniskej prowincy Kundus zdobyli a tam znajmjeńša 80 wjeskow wobsadźili. Do toho bě k wjacehodźinskim wojowanjam z wěstotnymi mocami dóšło. We wobwodźe Chan Abad su znajmjeńša 14 wobydlerjow, kotřiž běchu přećiwo talibanam wojowali, morili abo zranili. Sta wobydlerjow ćeknychu do susodnych wobwodow, kaž rěčnik prowincneho knježerstwa zdźěli. Hakle minjeny tydźeń bě so talibanam pora­dźiło, wobwod w sewjernej prowincy Sar-i-Pol zdobyć. Knježerstwo je mjeztym přidatne wěstotne mocy do kónčiny pósłało,­ zo bychu zběžkarjow zaso wuhnali. Talibanojo twjerdźa, zo maja kónčinu dale pod kontrolu a zo su wjacorych wojakow knježerstwa morili.

dale čitać ...

Přepytuja nadpad

wutora, 28. julija 2015 spisane wot:
Freital (dpa/SN). Po prawdźepodobnym nadpadźe z rozbuchadłom na awto komunalneho politikarja Lěwicy Michaela Richtera w Freitalu je za ekstremizm přisłušny operatiwny wotwobaranski centrum přepytowanja zahajił. Politisce motiwowany njeskutk njewuzamkuja, kaž dźensa zdźělichu. Nowe dopóznaća pak dotal nimaja. Richter sam rěči wo prawicarskim nadpadźe. W nocy na póndźelu bě jeho awto rozbuchnyło.

dale čitać ...

To a tamne (28.07.15)

wutora, 28. julija 2015 spisane wot:

Hižo cyły tydźeń čaka młody porik na parkowanišću awtodróhi A 8 pola Ulma na ćeknjeneho psyčka Fleckija. Muž a žona běštaj so póndźelu tydźenja z dowola w Chorwatskej nawróćiłoj. Psyčka bě jimaj znata hakle njedawno přewostajiła. Na parkowanišću so tón hary na bliskim twarnišću nastróži a ćekny do lěsa. Mjeztym pomocnicy młody porik zastaruja, kotryž nochce bjez Fleckija domoj jěć.

Rěznikej ćeknył je wurosćeny byk w badensko-württembergskim Hemmingenje. Ze swojimi 650 kilogramami móžeše byk, kotryž drje čuješe, što jemu hrozy, durje přetłóčić a twochnyć. Policisća za 18 měsacow starym skoćećom pytachu a jeho skónčnje na polu wuhladachu. Z dowolnosću wobsedźerja je zatřělichu.

dale čitać ...

Łužica (28.07.15)

wutora, 28. julija 2015 spisane wot:

BTU móže so profilować

Zły Komorow (SN/ch). Z jenož jednym hłosawzdaćom je rozšěrjeny załoženski senat Braniborskeje techniskeje uniwersity (BTU) Choćebuz-Zły Komorow minjeny kónc tydźenja za nowy wysokošulski wuwićowy program uniwersity hłosował. Koncept za strukturne a wobsahowe wuwiće BTU za lěta 2015 do 2020 je tuž jasny. Wysokošulski wuwićowy program je dalši wažny krok při hromadźe­zrosćenju kubłanskeju stejnišćow w Choćebuzu a Złym Komorowje. Prezident BTU prof. dr. ing. Jörg Steinbach bě w minjenym połlěće zhromadnje z prezidijom a fakultami koncept profilowanja a wutwara noweje uniwersity wuwił.

Hišće swobodne městna

dale čitać ...

Křesćenjo podpěruja Slepo

póndźela, 27. julija 2015 spisane wot:
Slepo (SN/CoR). List z Prahi je tele dny Slepjanska ewangelska wosada dóstała. Wobdźělnicy Europskeho biblijoweho dialoga „Jan Hus a (nimale) zabyta reformacija“ přiwobroćeja so hladajo na napjatu situaciju dalewjedźenja wudobywanja brunicy a z toho slědowaceho hrožaceho zničenja ewangelsko-serbskeje identity dla Slepjanskim křesćanam. Nawjazujo na žiwjenski skutk čěskeho reformatora woni w lisće pisaja, zo steji Jan Hus „za wobaransku móc wěry a zmužitosć k překwapjacym, nowym a nic přeco lochkim pućam cyrkwje w měnjatych časach. Přejemy tež wam tutu móc wěry a čujomny přewod Boha w angažemenće za wobchowanje swojeje wosady a za zachowanje stwórby.“ Wo lisće je nětko Slepjanska ewangelska wosada informo­wała. Biblijowy dialog wotmě so kónc junija­ w Praze. Zarjadowałoj běštej jón Unija Ewangelskich cyrkwjow w Němskej a Zhromadnosć ewangelskich cyrkwjow w Europje. Wobdźělnicy běchu z Němskeje, Čěskeje, Letiskeje, Pólskeje, Rumunskeje, Awstriskeje a Nižozemskeje.

dale čitać ...

Jednanja wo nowej pomocy jutře zahaja

póndźela, 27. julija 2015 spisane wot:
Athen (dpa/SN). Jednanja grjekskeho knježerstwa z fachowcami mjezynarodnych pjenjezydawarjow wo nowym pomocnym programje maja so po informacijach knježerstwa w Athenje jutře za­hajić. Zaměr je rozmołwy hač do 12. awgusta wotzamknyć, zo móhli je wšitke eurokraje doskónčnje schwalić. Tež ně­kotre narodne parlamenty dyrbja dojednanju hišće přihłosować. Grjekska dyrbi Europskej centralnej bance hač do 20. awgusta 3,2 miliardźe eurow wróćić. W tym zwisku je rěč wo pomocnym programje hač do 86 miliardow eurow za přichodne­ tři lěta. Mjeztym sej grjekske strony žadaja wujasnić rozprawy, po kotrychž­ měješe bywši financny minister Giannis Varoufakis plany za wustup Grjekskeje z europasma a za zawjedźenje něhdyšeje měny drachmy hižo spřihotowane. Varoufakis to prěje.

dale čitać ...

Burja zadźeržuja němske nakładne awta

póndźela, 27. julija 2015 spisane wot:
Strasbourg/Kehl (dpa/SN). Francoscy burja su minjenu nóc a dźensa rano wjacore namjezne přechody k Němskej ze swojimi traktorami blokowali. Hłowny zaměr bě zadźeržeć němske nakładne awta, kotrež ratarske wudźěłki do Francoskeje woža. Burja Němskej wumjetuja, zo z tunimi žiwidłami płaćizny w Fran­coskej tłóči, štož eksistencu francoskich ratarjow wohroža. Tak mjez druhim skorža, zo su dźěłowe kóšty w Němskej wuchodoeuropskich pomocnikow dla niše hač w Francoskej. Tole skomola fairne wubědźowanje. Na akciji wobdźěla so wjace­ hač tysac burow. Po informa­cijach jich dźěłarnistwa mějachu blokady dźensa­ dale trać.

dale čitać ...

Turkowska dale škara

póndźela, 27. julija 2015 spisane wot:
Ankara (dpa/SN/K). Turkowska pokročuje ze swojej strategiju boja na dwěmaj frontomaj. Jeje lětarstwo je znowa pozi­cije zakazaneje kurdiskeje dźěłaćerskeje strony PKK w sewjernym Iraku bombardowało. Turkowska artilerija je na sewjeru Syriskeje wobtřělała sydlišćo w terenje, kotryž kurdiske škitne jednotki kon­tro­luja­. Mjeztym zo USA postupowanje Turkowskeje podpěraja, přińdźe z Němskeje kritika. Ministerka za zakitowanje Ursula von der Leyen (CDU) ju namołwi, prócować so wo měrliwe dojednanje z Kurdami. W Syriskej su woni wažny partner w boju přećiwo Islamskemu statej­. Na próstwu Turkowskeje wotměje so jutře wurjadne zetkanje NATO.

dale čitać ...
strona 548 wot 559
e-paper-wudaće:06.06.2024

Kak w přichodźe twarić?

dźěłowe městna w LND

aktualne wupisanja

nowostki LND