Poslednja šansa
Dowěrje Serbow wotpowědować
Wo jeje prěnim lěće w sakskim krajnym sejmje je so z Elaine Jenčec (CDU), zastupjerku „serbskeho wólbneho wokrjesa“, Marcel Brauman rozmołwjał.
Što wotchila so najbóle wot toho, štož sće do toho wočakowała?
E. Jenčec: Pozitiwnje je, zo je frakcija moje přeće spjelniła, w financnym a kubłanskim wuběrku sejma skutkować. Nimo toho su mje tež do prezidija parlamenta powołali, hdźež postajeja wotběh posedźenjow. Wšelake procesy bych drje rady pospěšiła. Prěni raz ma Sakska mjeńšinowe knježerstwo, štož sej wjac wothłosowanjow a kompromisow wužaduje. Najebać to je knježerstwo jednanjakmane, kaž je wobzamknjenje krajneho etata pokazało.
Kotru rólu hraja serbske temy we Wašim wšědnym dźěle?
Spektrum kubłanja na serbskich šulach přewšo šěroki
Chrósćicy (SN/MiR). Na wšě 130 zajimcow a zajimčow je sobotu rano na 8. fachowy dźeń 2plus do wjacezaměroweje hale „Jednota“ do Chrósćic přichwatało. Mjez nimi běchu w prěnim rjedźe wučerki a wučerjo serbskich a serbšćinu wuwučowacych šulow kaž tež kubłarki a kubłarjo a studenća wučerstwa.
Na zarjadowanju předstaji so zjawnje prěni króć Syman Pawlik, nowy koordinator za serbske naležnosće regionalneho stejnišća krajneho zarjadnišća za šulu a kubłanje (LaSuB). Wón je přitomnych po programje wjedł a rjekny: „Fachowy dźeń 2plus je so w zašłych lětach na forum wuměny a diskusije wuwił. Wažne je, zo so njerěči jenož wo tym, kak wuspěšna je praksa, ale runje tež wo tym, hdźe su wužadanja. Tute mamy pomjenować, wo nich diskutować a zhromadnje za rozrisanjemi pytać.“
Rozsud derje přihotowali
Kotry napohlad městow chcemy?
Wosrjedź Drježdźan, w susodstwje kulojteho kina na Praskej dróze, je so zašłe lěta „arabska štwórć“ etablěrowała. Z wotpowědnymi hosćencami a wobchodami. Tule móžeš strowe chłóšćenki za přihódnu płaćiznu nakupować, a tež swójby z małymi dźěćimi njetrjebaja so bojeć, zo harowace pintlaški wulkim ludźom na čuwy du. Atmosfera je wotputana, kupcy, hosćo a tu bydlacy su jara wšelakeho pochada a tež žiwjenskeho wašnja.
Tudyši wobraz města so do aktualneje diskusije wo wuprajenju kanclera Merza hodźi, haj wšak, je tež poměrnje wjele žonow w islamskim rubišku, w hidźabje. Njesłušam do kruha ludźi, kotřiž maja tajki napohlad za wobohaćenje městow abo wuraz pisaneje towaršnosće. Wosebje w lěću, hdyž nimale kompletnje zababjene žony ze swojim połnahim mužom po měsće dundaja, spóznawaš zastarske potłóčowanje žonow. Přiwšěm pak tule tohorunja wjele žonow syriskeho pochada nadeńdźeš, kotrež bjez hidźaba modernje a sebjewědomje wustupuja. A pinčnicy w hidźabu, kotrež rozwólnje z hosćimi-mužemi žortuja.
Serbšćinu we wokrjesu sylnić
Wot spočatka měsaca skutkuje 38lětny Konječan Tomaš Korch w zastojnstwje społnomócnjeneho za serbske naležnosće na Budyskim krajnoradnym zarjedźe. Kak je so zažiwił a što je sej předewzał, wo tym je so Milan Pawlik z nim rozmołwjał.
Kak je k tomu dóšło, zo sće so na wupisane městno wokrjesneho społnomócnjeneho za serbske naležnosće požadał?
T. Korch: Sprawdu prajene běch so hižo před wjace hač dźesać lětami z tutej mysličku nosył. Wot lěta 2003 wšak na krajnoradnym zarjedźe dźěłam a předstawa, zo so na dźěle ze serbskimi temami zaběram, je so mi lubiła. Jako potom Regina Krawcowa městno přewza, sym ideju najprjedy raz spušćił. Hakle po tym, zo běše so jeje naslědnica Halena Jancyna jako serbska społnomócnjena ze zastojnstwa rozžohnowała, mi stare přeće zaso do mysli přińdźe. Jako městno internje wupisachu, sym so powabił.
Za to steji Wam 19,5 hodź. wob tydźeń k dispoziciji. Móžeće posudźować, hač tole za wšědne nadawki dosaha?
Knježerstwo nam přichilene
Změna wustawy: Wysokorjadny zastupjer mjeńšinowu radu přijał
Berlin (SN/mb). Je zwjazkowe knježerstwo zwólniwe, próstwu Zwjazkoweje rady spěšnje spjelnić a so wo přiwzaće štyrjoch domoródnych mjeńšin do zakładneho zakonja starać (SN su rozprawjeli)? Na to drje aktualna zdźělenka mjeńšinoweho sekretariata w nadawku mjeńšinoweje rady njewotmołwja. Ale je zajimawych indicow: Na wčerawšim wopyće zastupjerjow mjeńšin – mjez nimi běchu předsyda Domowiny Dawid Statik, jeho naměstnik Hartmut Leipner a hłowna jednaćelka třěšneho zwjazka Judit Šołćina – w nutřkownym ministerstwje Zwjazka běše Christoph de Vries (CDU) rozmołwny partner. Wón nutřkowneho ministra jako parlamentariski statny sekretar zastupuje a je za zwisk ze zwjazkowym sejmom zamołwity, kiž ma wo změnje wustawy rozsudźić.
Nimo njeho je so tež Hans-Leo Dirks, nawoda referata w ministerstwje a za narodne mjeńšiny zamołwity, na terminje wobdźělił. De Vries „zwurazni swoju sympatiju za naležnosće narodnych mjeńšin a hódnoćeše dźěło mjeńšinoweje rady“, so w zdźělence wjeselachu.
Žołdźe a kastanije su za dźiwje swinje, muflony, jelenje a sorny ...
Spěchuja wučersku praksu
Drježdźany/Budyšin (SN/MiP). Kabinet sakskeho knježerstwa je minjenu wutoru wobzamknył, zo chcedźa nowy pilotny projekt „Alternatiwny praktikum za wučerjow na šulach we wuchodnej Sakskej“ (ALSO) dale wjesć a samo rozšěrić. Tole je nowy format praktikuma za přichodnych wučerjow, kotryž su minjene šulske lěto zahajili.
„Projekt ALSO je kooperacija mjez Sakskim statnym ministerstwom za kultus, Krajnym zarjadom za šulu a kubłanje, Zhorjelskej wokrjesnej staršiskej radu kaž tež Drježdźanskej TU“, znazornja Clemens Arndt, nowinski rěčnik Krajneho zarjada za šulu a kubłanje (LaSuB), dźensa na naprašowanje našeho wječornika. Wón praji: „Z projektom damy studentam wučerstwa hižo sčasom wobstajnu móžnosć, praksu wučerstwa zeznać, swoje nazhonjenja pod fachowym nawodom systematisce wuhódnoćeć a z teoretiskimi pedagogiskimi konceptami přirunować“.
