Budyšin (ML/SN). „Kritiski wid na nětčiši wobraz wo NDR je jara trěbny, dokelž je w ludnosći dale jara rozdźělnje prezentny. Kóždy staćan měł sej wědomy być, zo je žiwjenje na swobodźe zbožo.“ Tole wuzběhny dźensa dopołdnja naměstnik sakskeho ministerskeho prezidenta a statny minister za hospodarstwo a dźěło Martin Dulig (SPD) w postrowje na 26. Budyski forum. Něhdźe 200 bywšich politiskich jatych w NDR a dalšich zajimcow, kaž politikarjo – mjez nimi zapósłanc CDU w Sakskim krajnym sejmje Marko Šiman –, stawiznarjo, wučerjo a šulerjo, běchu so k dwudnjowskemu schadźowanju Friedricha Ebertoweje załožby zešli. Jeho tema je „Wobraz wo NDR dźensa – wo wobchadźenju z SEDskej njeprawdu w zjednoćenej Němskej“.