Njebjelčicy (AW/SN). Iniciatiwa Serbski sejm přihotuje rozmołwy z čłonami frakcijow w Sakskim a Braniborskim krajnym sejmje kaž tež z komunalnymi politikarjemi w Hornjej a Delnjej Łužicy. Dialog ma słužić k wujasnjenju předwidźaneje próstwy prezidentomaj krajneju sejmow dr. Matthiasej Rößlerej (CDU) a Briće Stark (SPD) wo to, „zawjesć a přewjesć zakonjedawske jednanje, zo bychu so wutworili zakonske ramikowe wuměnjenja za demokratiske legitimowane ludowe zastupnistwo Serbow – Łužiskoserbskeho sejma“. Pod nawodom rěčnika dr. Měrćina Wałdy postajichu za to wčera w Njebjelčicach skupinu šěsć iniciatiwnikow, kotřiž rozmołwy z politikarjemi w blišim času dale powjedu. 23. septembra zetkaja so ze zapósłancom Sakskeho krajneho sejma Haraldom Baumannom-Hassku (SPD).