Kraje měli płaćić, hdyž ćěkancow njepřiwozmu

Brüssel/Berlin (dpa/SN/K). Dźiwajo na to,­ zo nawal ćěkancow njepopušća a wobćežnosće přiběraja, wuradźuja nutř­kowni ministrojo Europskeje unije dźensa w Brüsselu wo kompromisu nastupajo rozdźělenje migrantow. Kruta kwota njehodźi so najskerje postajić, do­kelž­ předewšěm kraje Visegrádskeje štyr­ki­ Čěska, Słowakska, Madźarska a Pólska ju zasadnje wotpokazuja. Nutřkownym ministram dźe wo rozdźělenje 120 000 ludźi. Zaměr je, zo so po móžnosći wjele krajow na tym wobdźěli. Za kóždeho přiwzateho ćěkanca ma kraj 6 000 eurow dóstać. Staty, kotrež so spjećuja, měli pak za kóždeho njepřiwzateho ćěkanca 6 500 eurow płaćić. Jutře chcedźa šefojo statow a knježerstwow čłonskich krajow na najwyšej runinje wo krizy ćěkancow dla jednać.­ Při tym póńdźe tež wo lěpši škit wonkownych hranicow zhromadźenstwa a wo financnu pomoc krajam z lě­h­wami migrantow kaž Jordaniskej, Li­banonej a Turkowskej.