Radworski wjesnjanosta ratarskemu ministerstwu zjawny list pisał
Radwor/Stróža (SN/MkWj). Radworski wjesnjanosta Wincenc Baberška (CDU) je so ze zjawnym listom na sakskeho ministra za wobswět a ratarstwo Thomasa Schmidta (CDU) wobroćił. W nim žada sej Baberška – zdobom předsyda rady biosferoweho rezerwata Hornjołužiska hola a haty, kotremuž přisłuša cyłkownje dwanaće gmejnow regiona –, wotmołwu na wjacore prašenja. Hłowna přičina su problemy mjez spěchowanskim towarstwom biosferoweho rezerwata a jeho zarjadnistwom, kotrež je hižo wěsty čas w rukach Sakskeho statneho lěsniskeho zawoda. Problemy su mjeztym k wjacorym personalnym změnam wjedli a wuskutkuja so přiběrajcy na dźěłowu atmosferu. „20lětne stawizny rezerwata su poprawom přewšo wuspěšne“, Radworski wjesnjanosta Serbskim Nowinam zdźěli. Wón pokaza w tym zwisku mjez druhim na znaty kolesowanski puć na slědach mórskeho worjoła, na produkciju biokarpow, na kóždolětne wuspěšne wiki přirody a nic naposledk na twar noweho Domu tysac hatow w Stróži, kotryž kóžde lěto tójšto ludźi přiwabja.