Kalawa (SN). Serbski dźeń frakcijow Lěwicy Sakskeho a Braniborskeho krajneho sejma wotmě so pjatk 11. raz ze zastupjerjemi krajneje a komunalneje politiki kaž tež ze zastupjerjemi Serbow w Kalawje. Dlěje hač lětdźesatk wuhódnoćatej frakciji podpěru serbskeho ludu a mjezy přesahowace spěchowanje Łužicy.
Na posedźenju wěnowachu so přitomni mjez druhim serbskorěčnemu a/abo bilingualnemu kubłanju we woběmaj krajomaj, zwoprawdźenju noweho braniborskeho Serbskeho zakonja a nadběham přećiwo Serbam, wuchadźa z nowinskeje zdźělenki Lěwicy. Předsyda Domowiny Dawid Statnik witaše wuprajenje statneje sekretarki Podstupimskeho financneho ministerstwa Daniele Trochowski, zo budźe nowe financne zrěčenje Braniborskeje, Sakskeje a Němskeje za Załožbu za serbski lud bórze podpisane.
