Budyšin (CK/SN). Swobodny stat Sakska je nowy integraciski paket we wobjimje wjacorych milionow eurow nastajił. Tón wopřijima spěchowanske programy runje tak kaž naprawy integracije ćěkancow a požadarjow azyla. Tole je Petra Köpping (SPD), statna ministerka za runostajenje a integraciju, wčera wječor na forumje „Budyske rozmołwy“ připowědźiła. Runje 14 měsacow w zastojnstwje a do toho jako wjesnjanostka a krajna radźićelka skutkowaca wě wona ze swójskeho dožiwjenja, zo su komuny w krizy ćěkancow dla dawno swoje hranicy docpěli. Loni nazymu schwaleny spěchowanski program bu tohodla widźomnje rozšěrjeny. Jeničce za 3,5 milionow eurow wopřijace integraciske naprawy mějachu próstwy we wobjimje 35 milionow eurow, Köpping rozłoži. Tak su nětko wjace pjenjez přizwolili.