Podstupim (SN/MkWj). Połny program měješe Rada za serbske naležnosće Braniborskeje na swojim wčerawšim zetkanju w Podstupimskim krajnym sejmje na dnjowym porjedźe. Tole zdźěli předsyda gremija Torsten Mak na naprašowanje Serbskich Nowin. Na posedźenje přeprosyli běchu sej noweho direktora Załožby za serbski lud Jana Budarja, přechodneho direktora Budyskeho Serbskeho instituta dr. Hauke Bartelsa a nawodu Choćebuskeho měšćanskeho muzeja Steffena Krestina, zo bychu jich zeznali.
Čłonojo rady zaběrachu so tež z planowanym komunalnym wubědźowanjom „Rěči přichilena gmejna – serbska rěč je žiwa“. W tym zwisku so dojednachu, zo měło so wubědźowanje w Braniborskej hakle klětu nazymu zahajić. Hłowna přičina je tuchwilny proces, w kotrymž móža gmejny wo to prosyć, zo by so jich přisłušnosć k serbskemu sydlenskemu rumej zwěsćiła. Wuslědki toho měli so wočaknyć. W Sakskej chcedźa wubědźowanje hižo nalěto zahajić.
