Wospjet horce lěća, pod suchotu ćerpjacy ratarjo, woćoplenje zemje a lěpšiny ekologiskeho ratarjenja runje w tym času jimachu wobdźělnikow, so z politikarku Zelenych Katrin Göring-Eckardt w Budyšinje rozmołwjeć.
Budyšin (SN/at). Na „domizniski wječork z Katrin Göring-Eckert“, frakciskej předsydku strony w Zwjazkowym sejmje Němskeje přeprosy wokrjesny zwjazk Budyšin Zwjazka 90/Zelenych minjeny pjatk do Garbarskeje bašty w sprjewinym měsće. Budyski měšćanski radźićel Zelenych Claus Gruhl namołwi w bohatej ličbje přichwatanych, „wšitko, štož w najwobšěrnišim zmysle z domiznu činić ma“, narěčeć, wšako chcychu ze zapósłanču do rozmołwy přińć.
Horcota na žurli tomu sobu polěkowaše, zo stejachu prašenja klimoweje změny w srjedźišću. Tak chcyše młodźenc wědźeć, na kotre lěća so Katrin Göring-Eckardt w swojim dźěćatstwje dopomina. „Njejsmy telko ekstremow wjedra měli“, wona wotmołwi, skedźbnjejo na to, zo „dožiwichmy w zašłych 15 lětach dźesać najhorcyšich lěćow“.