Wjelča problematika sakskeho premiera do Róžanta wjedła
Róžant (JK/SN). Sakska je po dobrym puću, starosće wobydlerjow nastupajo wjelki rozrisać. To zwurazni wčera na Róžeńčanskim gmejnskim zarjedźe ministerski prezident Michael Kretschmer (CDU) w rozmołwje z něhdźe 40 starosćiwymi wobydlerjemi z wokoliny, wowčerjemi, zastupnikami iniciatiwy k wobmjezowanju wjelčeho wobstatka a fachowcami wšelakich sakskich institucijow. Na turje po kraju bě Kretschmer přilubił, po wopyće Kamjenskeje Boršće so w Róžeńće aktualnym prašenjam a problemam nastupajo wjelki we Łužicy wěnować. Moderaciju přewza zapósłanc Sakskeho krajneho sejma Alojs Mikławšk (CDU).
Iniciatoraj peticije k wobmjezowanju wjelčeje populacije Gabriela a Jurij Lebzec z Koslowa rozłožištaj staw dotalnych wot wjelkow zawinowanych škodow w Delanach a prócowanja iniciatiwy. Wobaj kritizowaštaj komunikaciju a nastajenje zarjadow a instancow, kotrychž nadawk wšak je so z wjelkom rozestajeć.