Wědu wo župach šěrić a pohłubšić

pjatk, 21. awgusta 2020
artikl hódnoćić
(0 )
Axel Arlt

Župy pod třěchu Domowiny su wažna organizatoriska struktura za narodne skutkowanje na městnje, we wokrjesach a komunach. Telko, kaž su za čas NDR wobstali, hižo wot 1991 njeje. Tehdy běchu sej zastupjerjo wšitkich delnjoserbskich župow Choćebuz, Gubin-Baršć, Kalawa-Lubin a Grodk přezjedni, zo maja jenož hromadźe w nowowutworjenym kraju Braniborskej trěbnu móc, z jednym hłosom za delnjoserbske zajimy wojować. Podobnje myslachu w mjeztym sakskimaj župomaj Běła Woda a Niska. Tež wonej so 1991 zjednoćištej a tworještej předchadnicu dźensnišeje župy „Jakub Lorenc-Zalěski“. Wšitke tele cyłki buchu po Druhej swětowej wójnje załožene.

Hdyž wotměwa Domowina klětu „Lěto župow“, měri wona kedźbnosć na prěnje tajke struktury, kotrež buchu na delegatnej konferency serbskich towarstwow 24. julija 1921 we Wojerecach dozałožene: Wojerowska župa „Handrij Zejler“ ze sydłom, Budyska „Jan Arnošt Smoler“, Kamjenska „Michał Hórnik“ a hlej, Choćebuska župa „Hendrich Jordan“. Wone skutkowachu tehdy w pruskim a w sakskim dźělu Łužicy, byrnjež wo tutej takrjec prěnjej delnjoserbskej župje přewjele znate njebyło. A zo maja župy dźensa swoje sydło we Wojerecach, Budyšinje, Choćebuzu a – w padźe Chrósćic zaso – tam, hdźež bu to 1921 wobzamknjene, swědči wo tehdyšim prawym rozsudźe.

Wotpohladana wuměna mjez regionami, kotruž je předsyda Domowiny Dawid Statnik tele dny we wobłuku skonstituowanja přihotowanskeho wuběrka jako jedne ćežišćo „Lěta župow“ mjenował, zawěsće tomu polěkuje, zo jednotliwe kónčiny wjace wot tamnych zhonja. Njedosaha pak, so mjez sobu jenož wuměnjeć. Skerje je z planowanym lětom přiležnosć data, wědu wo jednotliwych župach šěrić a pohłubšić, sej z nimi zwisowace aspekty stawiznow Domowiny zbližić a runočasnje wjele lět zanjechanemu kubłanskemu dźěłu w narodnym angažemenće wočiwidniše městno přicpěwać. To měło tež dalšim towarstwam pod třěchu Domowiny na wužitk być.

„Lěto župow“ je hódna přiležnosć, hišće wobstejace běłe blaki w stawiznach Domowiny a Serbow wosebje mjez swětowymaj wójnomaj z wobsahowymi mozaikowymi kamuškami pjelnić. Z wědy wo zašłosći wurosće směr za přichod.

wozjewjene w: Rozmyslowane
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND