Pokład sej dale wažić

pjatk, 28. awgusta 2020
artikl hódnoćić
(0 )
Bianka Šeferowa

Zawěsće je kóždy z nas hižo podobnu situa­ciju dožiwił. Rozmołwješ so z někim zwonka Łužicy serbsce a bórze prašeja so tamni ludźo, kotru rěč to nałožujeće. Tak dźěše so našej swójbje lětsa tež zaso w dowolu. Serbšćina je naša maćeršćina. Naju dźěći wopytaja samozrozumliwje serbsku šulu, so serbsce alfabetizuja, spě­wa­­ja, sej z tamnymi hrajkaja, serbske na­łož­ki a tradicije pěstuja ... Naša wotmołwa wubudźi w žonje, bydlacej w Hannoveru, rudźace a njespokojne začuće. A na to nam wona powěda, čehodla. Z 18 lětami staj so z mandźelskim hnydom po kwasu z Kazachstana do Němskeje po­dałoj, wšako bě wón potomnik Němcow w Ruskej. Staj so wo lěpši přichod swo­jeju dźěsći w jim cuzym kraju nadźijałoj a chcyštaj jónkrótnu šansu wužić. W Kazachstanje wšak bě hospodarska situa­cija přewšo špatna. Město toho zo byštaj pak dźěsćomaj kazachske korjenje po­srědkowałoj a jimaj tež rušćinu spři­stupniłoj, staj po hinašim puću kročiłoj. Rěčeštaj z hólcomaj němsce, wšako dyrbještaj do němskeje pěstowarnje a šule chodźić, hdźež rušćina tema njebě.

Wuslědk toho je, zo mandźelskaj mjez sobu­ rusce rěčitaj, ale dźěsći so na rozmołwje wobdźělić njemóžetej, dokelž maćeršćinu staršeju njewobknježitej. W běhu jenož jedneje generacije je so rěč w swójbje zhubiła.

Kubłanje dźěći je wězo nadawk star­šeju a wonaj mataj rozsudźić, što swojim dźěćom spřistupnitaj a sposrědkujetaj. Sym swojimaj staršimaj jara dźakowna, zo staj mi zmóžniłoj serbsku pěstowarnju a šulu wopytać. Samozrozumliwje to njebě, wšako je mać němskeho pochada. Přiwšěm staj so staršej ze wšěmi ćežemi hladajo na spjelnjenje šulskich nadawkow atd. na to zwažiłoj. Před 40 lětami wšak njebě ze stron kubłanskich towarstwow abo zwjazkow hišće telko podpěry. Ćim bóle zrudźa mje dźensa wotmołwa staršich, zdźěla samo ze serbskorěčnym pozadkom, zo swoje dźěći za přewažnje němskorěčne rjadownje přizjewja. Škoda, zo njezrozumja, kajke bohatstwo swojim dźěćom zawěraja. Kak spěšnje so rěč zhubi, pokaza přikład swójby z Hannovera. Serbšćina je pokład, kotryž měli sej wažić. Za to wšak dóstawamy dźensa ze stron institucijow wulku podpěru, kotraž njeje přirunujo z tamnymi mjeńšinowymi rěčemi samozrozumliwa.

wozjewjene w: Rozmyslowane
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND