SPD, Zeleni a FDP so na koaliciske zrěčenje dojednali – Lěwica kritiska

Berlin (dpa/SN). Po dojednanju wodźacych zastupnikow SPD, Zelenych a FDP na koaliciske zrěčenje wo wutworjenju po wšej Němskej prěnjeje tak mjenowaneje amploweje koalicije su nětko čłonojo a delegaća na rjedźe. Hižo dźensa chcychu so Zeleni swojich čłonow prašeć, hač koaliciskemu zrěčenju a personalnym planam nowe knježerstwo nastupajo přihłosuja. Wothłosowanje ma dźesać dnjow trać a digitalnje abo z listom móžne być. Za přihłosowanje dosaha jednora wjetšina. We wobłuku SPD a FDP maja delegaća spočatk decembra na stronskimaj zjězdomaj koaliciske zrěčenje wotžohnować.

Byrnjež w koaliciskich jednanjach wšitke tři strony kompromisam přizwolić dyrbjeli, je sej přichodny zwjazkowy kancler Olaf Scholz (SPD) wěsty, zo wšitke tři strony zrěčenju přihłosuja. „To sym jara optimistiski. Je to dobry wuslědk z wida wšitkich třoch stron“, rjekny wón wčera wječor w telewiziji ARD.