FV Biskopicy 08 II – DJK Sokoł Ralbicy/Hórki 7:0 (2:0)

Zestawa Ralbic: Chr. Gloxyn – Woko, Al. Wałda, Schultz, Heidorn, Ki. Hrjehor, ­Rachela, Mjechela, D. Šołta, P. Šołta, ­Domaška

Předznamjenja za hru njeběchu runjewon dobre. Dowola, zranjenjow a tež chorosće dla pobrachowaše tójšto nazhonjenych hrajerjow w rjadach Sokoła. A to pola načolnika tabulki! Tuž běše jasne, zo móže jenož kruta defensiwa jasny cil być. To so drje w prěnim połčasu derje poradźi, ale w druhim docyła nic.

Biskopičan rezerwa wot wšeho spočatka derje kombinowaše a daše bul w swójskich rjadach běžeć. Po běrtlk hodźinje běše sokołski škit tež prěni raz wuhraty. Bul bu rjenje do haski tyknjeny a nadběhowar z wóčkom přetwori. Na hrě so tež w dalšim wotběhu ničo njezměni. Sokoljo zakitowachu a Biskopičenjo čakachu na zmylk. Tutón so tež 43. min. sta. Bul so w nadběhu Ralbičanow zhubi a hosćićeljo hrajachu spěšnje přez prawu stronu. Niska flanka bu preciznje dosrjedźa hrata a hižo steješe 2:0.