To a tamne (02.03.18)
Chětro njelepje je so šofer awta při tankowanju w durinskim Bad Liebensteinje počinał. Najprjedy raz bě so tak špatnje stupił, zo při tankowanju display njewidźeše. Je tuž meter doprědka zajěł, njemyslo na to, zo honač hišće w jězdźidle tči. Wustróžany 71lětny wróćo storči – a zrazy do za nim stejaceho awta. Jako znowa doprědka zajědźe, je tež hišće bencinowu staciju wobškodźił. Cyłkowna škoda wučinja 4 000 eurow.
W policajskim awće do šule přijěł je šěsćlětny w Mnichowje. Mały sonjer bě w busu zastanišćo šule zaspał a dale hač ke kónčnej staciji jěł. Tam napadny wón busowemu šoferej, kiž je wobsadku policajskeho awta wo pomoc prosył, dokelž so šěsćlětny tam njewuznaješe. Adresu šule w tobole hólca namakawši zastojnicy jeho tam dowjezechu.
Nowy premier wuzwoleny
Saarbrücken (dpa/SN). Politikar CDU Tobias Hans je nowy ministerski prezident Posaarskeje. Wón naslěduje Annegret Kramp-Karrenbauer, kotraž póńdźe jako generalna sekretarka CDU do Berlina. W Saarbrückskim krajnym sejmje hłosowaše dźensa 40 z cyłkownje 51 zapósłancow za 40lětneho Hansa. Wón je nětko najmłódši ministerski prezident Němskeje. Hans je tak hłós mjenje dóstał, hač ma čorno-čerwjena koalicija zapósłancow. Nimo CDU a SPD sedźa tež zapósłancy Lěwicy a AfD w krajnym sejmje.
Dyrbi na čas žiwjenja do jastwa
Hamburg (dpa/SN). Smjertneho nadpada z nožom w Hamburgu-Barmbecku dla su 27lětneho k jastwu na čas žiwjenje zasudźili. Hamburgske wyše krajne sudnistwo winowaše Palestinjana Ahmada A. dźensa mordarstwa, pospytaneho mordarstwa a ranjenja ćěła dla w šěsć padach. Nimo toho zwěsćichu sudnicy wosebitu ćežu złóstnistwa. Tuž je tak derje kaž njemóžno jeho po 15 lětach dočasnje pušćić. Wotpokazany požadar azyla bě 28. julija 2017 w předawarni Edeka z nabožnych přičin kupca zakłół a šěsć ludźi zranił.
Přepytuja zmylki a misnjenja
Ruscy wojerscy policisća wobstražuja městno, z kotrehož móža ...
Ministerka prosy wo namjety
Stawiznar Gross: Idiotiski zakoń
Kretschmer: Dobre styki wažne
Drježdźany/Wrócław (SN). Ministerski prezident Sakskeje Michael Kretschmer (CDU) bě dźensa na politiskich rozmołwach w pólskim Wrócławju. Tam witaštaj jeho maršal delnjošleskeho wojewódstwa Cezary Przybylski kaž tež wicewojewoda Kamil Krzysztof Zieliński. Na planje steješe tež wopyt tamnišeho kontaktneho běrowa Sakskeje.
Je to prěni oficialny wopyt sakskeho premiera Kretschmera we Wrócławju. Wobrěčeć chcychu mjez druhim dlěje hač lětdźesatkaj wobstejace regionalne partnerstwo, přezmjezny železniski wobchad, staw a přichod spěchowanja přez Europsku uniju kaž tež mjezy přesahowace projekty. „Dobre a wuske styki k susodam wosrjedź Europy su wažne za wobě stronje. Je mi wosobinski narok, lětdźesatki zrosćene kontakty runje tež do Delnjeje Šleskeje spěchować a pohłubšić. Direktne zetkanja a wuměna měnjenjow kaž tón tydźeń móhli k tomu přinošować“, rjekny Kretschmer do wotjězda.
Kontaktny běrow Sakskeje we Wrócławju běchu lěta 2012 wotewrěli.
Čerwjena nitka?
Podijowa diskusija temy narěznyła, ale njerozjimała
Budyšin (SN/bn). Z prěnim z cyłkownje třoch zarjadowanjow zahaji Friedricha Ebertowa załožba předwčerawšim na połnje wobsadźenej małej žurli Budyskeho Dźiwadła na hrodźe forum „Wróćo abo přichod? Kak chcemy w Budyšinje žiwi być“. Pod hesłom „Kak budźemy rěčeć?“ diskutowachu Silke Klewin, nawodnica Budyskeho wopomnišća, swobodny awtor Rico Grimm z Berlina a Budyski wyši měšćanosta Alexander Ahrens (SPD) wo prašenjach kołowokoło komunikacije dźensa a přichodnje. Moderator wječora bě redaktor a korespondent dźenika Süddeutsche Zeitung Cornelius Pollmer.
To a tamne (01.03.18)
Rukajcy kradnyłoj staj mužej w kupnicy w Braunschweigu, prawdźepodobnje kruteho zmjerzka dla. Wšako pokazowaše termometer pod minus dźesać stopnjow. Kupnicowy detektiw bě wobkedźbował, kak pakostnikaj rukajcy do nachribjetnika tykataj, a zawoła policiju. Při kontroli nachribjetnika 18lětneho namakachu nimo toho grat za wotstronjenje wěstotnych etiketow. Paduch chětro wokoło so biješe, jeho kumpan móžeše ćeknyć.
Klawn je zhromadnje z policiju w Ludwigshafenje dwaj ćeknjenej cirkusowej cebraj přesćěhał a skónčnje zaso popadnył. Wobydlerjo běchu policiju informowali, zo zwěrjeći po měsće běhatej. Tak přijědźe pjeć policajskich awtow. Zhromadnje z klawnom namakachu zastojnicy cebraj při haćiku, hdźež so paseštej. W kolonje policajskich jězdźidłow přewodźachu jej wróćo do cirkusa.
