„Lady Gaga“ je swoje mjeno jako najrjeńša kruwa Nižosakskeje a Sakskeje zakitowała a třeći raz „přehladku najlěpšich“ dobyła. Wona je so wčera w 45. lětniku wubědźowanja přećiwo konkurentkam na čerwjenym přestrjencu w hali Delnjeje Sakskeje we Verdenje přesadźiła. Nimale 3 000 ludźi sej spektakl wobhlada. Orga­nizacija Masterrind, kotrejež plahowanski teren so po Nižosakskej a Sakskej wupřestrěwa, přehladku wuhotuje.

Rěbl při sćěnje domskeho měješe kedźbliwy muž w Hornjofrankskej za pokazku na zadobywanje a informowaše radšo policiju. Sćěhujo pokiw skontaktowa so ta z mějićelom chěže w Steinweisenje. Pozdatneho zadobywarja spěšnje zwěsćichu: Zastojnicy „lepichu“ młodeho muža, kiž chcyše po rěblu do jstwy swojeje přećelki zalězć. W Bayerskej tajke něšto­ tež „fensterln“ mjenuja.

Wjacore měsacy zběraja Domowina, jeje­ pomocnicy a dalši dobrowólnicy hižo podpisma za europsku wobydlersku iniciatiwu Minority SafePack, kotruž bě Federalistiska unija europskich narodnych mjeńšin (FUEN) nastorčiła. Dotal su zamołwići po wšej Europje něšto­ wjac hač 600 000 podpismow zezbě­rali. Byrnjež pak zastupnicy Domowiny a serbske medije, mjez nimi tež Serbske Nowiny, sylnje za iniciatiwu wabili a mnohe składnosće wužiwali rozkładować, što za wobydlerskej inicia­tiwu tči, so ludźo tež w Hornjej a Delnje­j Łužicy stajnje zaso prašeja: „Što je poprawom Minority SafePack a što to našemu ludej přinjese?“ Serbske Nowiny spytaja swojim čitarjam tróšku swětła do ćmy přinjesć a na někotre bytostne prašenja wokoło woby­dlerskeje iniciatiwy wotmołwić.

Što europska wobydlerska iniciatiwa poprawom je?

Berlin (dpa/SN). Šef frakcije Lěwicy Dietmar­ Bartsch zwjazkowu kanclerku Angelu Merkel (CDU) wótrje kritizuje, zo nje­je w zwjazkowym sejmje wustupiła – loni w juniju posledni raz. „Je nimale třištwórć lěta, zo njejsće so ani před parlamentom, před gremijom, hdźež so to słuša, ani před ludnosću wuprajiła“, rjekny­ Bartsch dźensa po wozjewjenju Merkel­ wo jutřišim informelnym wjeršku Europ­skeje unije w Berlinje.

Wužiwanje konopje legalizować

Berlin (dpa/SN). Zwjazkowy sejm de­batuje dźensa wo krokach, po kotrychž hodźi so canabis legalnje wužiwać. Němski konopjowy zwjazk je wo wotpowědnu wjetšinu w parlamenće wabił. Mo­delowe projekty za wužiwanje canabisa w komunach móhli prawy puć być, rje­kny jednaćel Georg Wurth powěsćerni dpa. FDP chce z namjetom tajke modelowe projekty zmóžnić. Strona Lěwica chce konop za swójsku potrjebu wotkriminalizować. Zeleni chcedźa wšitko we wobšěrnym zakonju rjadować.

Po hidźe žane chłostanje

Drježdźany (SN/at). Dźeń a wjace wobchada na sakskich awtodróhach žada sej dalše naprawy za wjetšu wobchadnu wěsto­tu. Z wida ministerstwa za hospodarstwo, dźěło a wobchad zasłuža sej wotrěz­k awtodróhi A 4 mjez třiróžkomaj Drježdźany-sewjer a Drježdźany-zapad wosebitu kedźbnosć. Tam so na dwanaće kilometrach wobchad – hladajo na wšitke sakske awtodróhi – najbóle kopi. W lěće 2016 zličichu tam wšědnje přerěznje 97 207 wozydłow, lěto pozdźišo hižo 100 128, ministerstwo zdźěla. „Wuměnjenja wotrězka trasy, kaž su to krótke wotstawki mjez wotbóčkami a wulke wobchadne poćežowanje wosebje dale a wjac nakładnych awtow a busow dla, wuskutkuje přiběracy wobchad mjez jednotliwymi jězdźenskimi čarami“, wobchadny minister Martin Dulig (SPD) rozłožuje. Wot­rězk je tohodla tež njezbožowe ćežišćo.