Skóržba wotpokazana
Delegacija z Ruskeje Łužicu wopytała
Grodk (SN). Delegacija pod nawodom Aleksandera Kriwolapowa z ruskeho regiona Kursk je njedawno Grodk a gmejnu Sprjewiny Doł wopytała. Dalši politikarjo kaž tež zastupjerjo z hospodarstwa a kultury wužiwachu štyri dźěłapołne dny we Łužicy za rozmołwy, za skontaktowanje a wodźenja.
Towaršnosć za hospodarske spěchowanje a projektowy přewod (ASG) organizowaše rozmołwy k přichodowemu projektej „Čorna Pumpa II“ mjez druhim z ruskim předewzaćom. Wone zaběra so z industrielnym zhotowjenjom proteinow z pšeńcy.
Koncern Łužiska energija a milinarnje (LEAG) pokaza wulki zajim na kooperaciji ruskeje firmy Metaloinwest, mjez druhim we wobłukach inženjerotechniske posłužby, mašinotwar, geologija, wodowe hospodarstwo a rekultiwowanje.
Nimo hospodarstwa je so delegacija z Ruskeje tež dalšim temam wěnowała. Někotři hosćo wopytachu na powołanje orientowacu wyšu šulu, hdźež běchu wot wuwučowanskich metodow a wuknjenskich wuměnjenjow zahorjeni. Hižo klětu planuja šulersku wuměnu mjez gymnazijom města Železnogorsk a Erwina Strittmatterowym gymnazijom Grodk.
To a tamne (01.09.17)
Pjeć złoćanych ručnych wobručkow w hódnoće 4 000 eurow we wobwjazach schowałoj stej mać a jeje dźowka. Cłownikam Mnichowskeho lětanišća pak ćežkej tobołce napadnyštej. Žonomaj w starobje 20 a 47 lět tuž ničo druhe njezby hač 800 eurow dawkow zapłaćić. Bjez wulkeho wobaranja to tež činještej. Přiwšěm matej wonej nětko z chłostanskim jednanjom ličić.
Ze spěšnosću jenož 15 kilometrow na hodźinu po puću bě njedawno Lkw. Wodźerjo dalšich awtow na awtodróze w Francoskej wołachu tuž policiju. A ta zwěsći pola šofera nakładneho awta při kontroli w kreji wjac hač dwaj promilej alkohola. Nimo toho nańdźechu hišće wjacore bleše alkohola w kabinje 52lětneho, kiž pochadźeše z Litawskeje
Britiske papjery njespokojeja
Brüssel (dpa/K/SN). Za papjery, kotrež je Wulka Britaniska dotal nastupajo wustup z EU předpołožiła, ma prezident komisije EU Jean-Claude Juncker zaničacy posudk. „Wšitke papjery (…) sym sej z trěbnej dokładnosću přečitał, ale žana jenička mje prawje njespokoja.“ Wjele prašenjow je hišće wotewrjenych, rjekny Juncker w Brüsselu. Wot Britow stajene žadanje, zdobom wo brexiće a wo zrěčenju wo přichodnych poćahach jednać, wón wotpokaza.
Fabrika móhła rozbuchnyć
Washington (dpa/K/SN). Chemiskej fabrice w sydlišću Crosby, ležanym něhdźe 40 kilometrow sewjerowuchodnje texaskeho města Houston, hrozy hladajo na powodźenja přez wichorisko Harvey rozbuch. W fabrice wužiwane chemikalije su so woćoplili, po tym zo je chłódźernja po wupadźe miliny dźěłać přestała. Organiski produkt peroksid, kiž w tworni zhotowjeja, dyrbja při niskich temperaturach składować. Tole hižo móžno njeje, tuž su ludźi, bydlacych w bliskej wokolinje fabriki, do wěstych kónčin přeměstnili.
Diskusija přeniskich mzdow dla
Bywši nawoda dźěłarnistwa Solidarność a něhdyši statny ...
Prawa Makedonjanow škitać
Tirana (SN). Sobustaw Federalistiskeje unije europskich narodnych mjeńšin (FUEN), makedonske zjednoćenstwo Ilinden z Tirany, chce škitać prawa Makedonjanow bydlacych w Albanskej. Zjednoćenstwo sej wot albanskich zarjadow žada, dokumenty identity w makedonšćinje wuhotować.
Kaž FUEN nětko zdźěli, je předsyda zjednoćenstwa Ilindow Nikola Gjurgaj wotpowědnu próstwu generalnemu direktorej za porodowy register Bledarej Doracajej posrědkował, zo bychu přichodnje mjezynarodne dokumenty, kaž porod, kwas a dalše, w makedonšćinje zhotowjeli. Móžne su hižo přidatne grjekske, italske, jendźelske a němske dokumenty k albanskim.
Po słowach Nikole Gjurgaja by mnohim albanskim wobydlerjam pomhane było přidatne kóšty wobeńć, hdyž trjebaja woni wosobinske dokumenty, přełožene z albanšćiny do makedonšćiny dać.
Hłowu zhubili?
Wolf Biermann w Choćebuzu był
To a tamne (31.08.17)
„Łužicu jako region chutnje brać“
Ze zapósłanču zwjazkoweho sejma Lěwicy Caren Lay w rozmołwje
Caren Lay je zapósłanča Němskeho zwjazkoweho sejma Lěwicy, zastupowaca předsydka frakcije kaž tež rěčnica za wobłuk přenajenje, twarsku a bydlensku politiku. Nětko kandiduje wona znowa za Budyski wólbny wokrjes.
Što sće w zastojnstwje dotal docpěła?
C. Lay: Myslu sej, zo sym k tomu přinošowała, zo je bu financowanje Załožby za serbski lud zwyšene. To su pjenjezy, kotrež su w regionje trěbne, zawěsćeja dźěłowe městna w serbskim wobłuku a přinošuja k zachowanju serbskeje rěče a kultury. Hladajo na strukturnu změnu Łužica podpěru z Berlina nuznje trjeba. Dale sym wo to wojowała, zo so łužiska železniska syć hišće dale njepomjeńši. Tež swójbna kasa Budyskeho wokrjesa ma wjac dźěłowych městnow. Swójby dóstawaja město dołheho čakanja nětko skónčnje spěšnišo swój dźěćacy pjenjez. Z angažementom a ćišćom móžeš tež w opoziciji něšto docpěć.
Čehodla znowa kandidujeće?
