To a tamne (16.08.17)
Přećelnosć napřećo předawarjej we wobchodźe so wudani. Tole su awstriscy wědomostnicy z wulkopospytom dopokazali. Z małej chwalbu na spočatku dóstanje kupc na přikład wjace lodu do wafle abo tež wjetši dejner. Wědomostnicy běchu wobdźělnikow do lodownjow a předawarnjow dejnera słali. Po komplimentach bě dźesać procentow wjace lodu we wafli. Tež pola dejnera bě rozdźěl wočiwidny, kaž zwěsćichu.
Kěrchowski zwóń je w nocy na wutoru mnohim wobydlerjam Tübingena spar rubił. Po třoch hodźinach jón sobudźěłaćer kěrchowa skónčnje z dalokoposłužowakom hasny. Policija njemóžeše pomhać, dokelž bě kapałka zamknjena. Mjeztym znaja přičinu. Dalokoposłužowak za wrota garaže dźěła ze samsnej frekwencu. Nětko chcedźa system pruwować, zo njeby so pana wospjetowała.
EU móhła zaskočić
Brüssel (dpa/K/SN). Dokelž su někotre pomocne organizacije z wuchowanskimi akcijemi na centralnym Srjedźnym morju nachwilnje přestali, ma komisija EU rozšěrjenje operacije EU „Triton“ za móžne. By-li trjeba było, móhli plan zasadźenja hraničneje a pobrjóžneje straže wotpowědnje přiměrić. Italske medije rozprawjeja, zo w nutřkownym ministerstwje w Romje rozwažuja łódźe NGO narunać z jednotkami „Tritona“.
Cłowna unija namjetowana
London (dpa/K/SN). Britiske knježerstwo je Europskej uniji časowje wobmjezowanu cłownu uniju namjetowało. Přechodna perioda móhła hospodarstwu Zjednoćeneho kralestwa a zhromadźenstwa wjace wěstoty skićić. Hižo njedźelu běštaj financny minister Philip Hammond a minister za mjezynarodne wikowanje Liam Fox za to rěčałoj, po wotchadźe z EU zawjesć interimnu fazu. W měrcu 2019 jeju kraj Europsku uniju doskónčnje wopušći.
Znajmjeńša 19 mortwych
Wulki woheń je wobornikow dźensa w nocy na Kamjenskim ...
Trump so tola powučić dał?
Gabriel warnuje před wójnu
USA a Sewjerna Koreja sej dale mjezsobnje hroža
Berlin (dpa/SN). Zwjazkowy wonkowny minister Sigmar Gabriel (SPD) nowe hroženja prezidenta USA Donalda Trumpa přećiwo Sewjernej Koreji raznje zasudźa a warnuje před hrožacej wójnu. Donald Trump wužiwa w konflikće „njesměrnu wójnsku retoriku“. Wobsteji wulki strach, zo so tajka eskalacija z drastiskej rěču započina a z wojerskim zasadźenjom kónči, rjekny němski wicekancler nowinarjam w Kölnje. Europa wšak ma z tajkim strachom swoje nazhonjenja, Sigmar Gabriel potwjerdźi. „Před sto lětami smy z wójnskej retoriku kaž spicy do Prěnjeje swětoweje wójny maršěrowali. Z toho smy w Europje wuknyli. Nětko je hodźina diplomatow a nic wójnskeje bjakańcy“, wón rjekny.
Za wólby so modlić
Drježdźany (B/SN). Štóž ma wolić, ma so bědźić – ně wšak! Miliony žonow a muži bychu so wjeselili, bychu-li scyła swobodnje wolić móhli. Bórze wotměja so wólby Němskeho zwjazkoweho sejma. Přičiny dosć za hłowny pastoralny wotrjad wozjewjenjow našeho biskopstwa, přeprosyć k „modlitwje do wólbow.“ W tajkej mjez druhim rěčnik Drježdźansko-Mišnjanskeho biskopstwa Michael Baudisch prosy: „Ty Božo wšěch časow ... Dźakujemy so Ći za měr a swobodu a za wšo, štož naše towaršnostne žiwjenje zmóžnja ... Prosymy Će, skrućuj našu wolu, zo w zjawnosći a politice swoju zamołwitosć jako křesćenjo spóznawamy.“
Bamž Franciskus je šansa
Dortmund (B/SN). Prezident Němskeho ewangelskeho cyrkwinskeho dnja 2019 w Dortmundźe Hans Leyendecker je křesćanske cyrkwje namołwjał dźělenje přewinyć. Lajske hibanja w katolskej kaž tež w ewangelskej cyrkwi su k tomu dawno zwólniwe, jenož klerus drje trjeba hišće chwile, rjekny žurnalist na wokrjesnym cyrkwinskim dnju w Dortmundźe. Runje nětko móhło jara wuspěšne być wo jednotu so prócować. Přetož „tajkeho bamža kaž Franciskusa tak spěšnje wjace njezmějemy“.
To a tamne (15.08.17)
Wulke zbožo mějachu zawčerawšim pasažěrojo ćaha w Słowakskej. Tam bě so lokomotiwa spěšnika wotpowěsnyła a sama dale jěła. Awtomatiski system pak je ćah borzdźił, kotryž skónčnje zasta. Přiwšěm dyrbjachu pasažěrojo dlěje hač dwě hodźinje čakać, prjedy hač bu narunanska lokomotiwa pósłana. Jako přičinu njewšědneho podawka mjenowaše rěčnik železniskeje towaršnosće, zo drje bě material přetrjebany.
Připowěšak nakładneho awta połny šokolody, kotryž běchu njeznaći minjeny kónc tydźenja pola Marburga pokradnyli, je dale zhubjeny. Z připowěšakom pobrachuja tež 20 tonow šokolodźanych jejkow, nutella a dalše słódkosće. Hódnota rubizny wučinja 50 000 do 70 000 eurow. Nětko pyta policija za swědkami. W bjezposrědnjej bliskosći je so nimo toho dalše nakładne awto zhubiło.
Mortwi při nadpadźe
Ouagadougou (dpa/K/SN). Njedźelu w pózdnich nócnych hodźinach su třo njeznaći wobrónjeni mužojo w stolicy Burkina Faso Ouagadougou hosćenc „Istanbul“ nadpadnyli a tam z awtomatiskich bróni na hosći třěleli. Při tym je 18 ludźi žiwjenje přisadźiło a 15 wosobow zranjenja poćerpjeło. Mjez smjertnymi woporami staj jedyn Francoza a jedyn Turka. Dwaj nadpadnikaj buštaj zatřělenaj. Atentat su prawdźepodobnje dźihadisća skućili.
Wuradźuja wo Sewjernej Koreji
Brüssel (dpa/SN). Społnomócnjena EU za wonkowne naležnosće Federica Mogherini je krizy Sewjerneje Koreje dla wurjadne posedźenje za wěstotne prašenja zamołwitych wulkopósłancow Europskeje unije zwołała. W rozmołwje chcychu wo „móžnych dalšich kročelach“ EU wuradźować, kaž jeje rěčnica zdźěli. Kriza bě so minjene dny přiwótřiła, po tym zo bě prezident USA Sewjernej Koreji masiwnje hrozył. Ta bě připowědźiła třěleć rakety na pacifisku kupu Guam, na kotrejž maja USA wojerske zepěranišćo.
Přepytuje politiku Chiny
