Moskwa (dpa/K/SN). Knježerstwo Ruskeje je znowa cyle raznje na parlamentnje wobzamknjene a wot prezidenta USA Donalda Trumpa z podpismom schwalene rozšěrjenje sankcijow přećiwo njej reagowało. Ministerski prezident Dmitrij Mjedwjedew ma za to, zo su nadźije na lěpše wzajomne poćahi nětko spušćene. „Nowe sankcije runaja so připowědźenju hospodarskeje wójny“, wón zwurazni, zdobom sudźo, „Trumpowe knježerstwo je swoju dospołnu njezamóžnosć z tym pokazało, zo swoje eksekutiwne kompetency na najfatalniše wašnje přewostaja kongresej.“

Najnowše postupowanje USA kritizujetej tež němske zwjazkowe knježerstwo a komisija Europskeje unije. Wonej so bojitej, zo móhli sankcije za europske předewzaća negatiwne sćěhi měć. Nowe sankcije měrja dźě so přećiwo wažnym hałzam ruskeho hospodarstwa, tak na přikład na sektor energije, na kotrymž Ruska ze zapadom wusko kooperuje.

Strony kritizuja wuslědki dieseloweho wjerška jako njedosahace

Berlin (dpa/SN). Na wčerawšim tak mjenowanym dieselowym wjeršku přilubjene polěpšenja k pomjeńšenju mnóstwa škódnych maćiznow we wotpłunje dieselowych awtow zbudźeja wótru kritiku a nowe žadanja. „Awtomobilowa branša ma ze swojeho wysokeho konja zlězć a dyrbi swojej zamołwitosći za towaršnosć a kupcow awtow wotpowědować“, rjekny frakciski šef CDU/CSU w zwjazkowym sejmje Volker Kauder nowinarjam.

Němscy awtotwarcy běchu wčera přilubili, z nowej software wustork jědojteho dusykoweho oksida pola 5,3 milionow awtow pomjeńšić. Žadanja za techniskimi polěpšenjemi motorow woni jako „njemóžne“ wotpokazachu. Kupcam nowych čistych awtow chcedźa twarcy premije poskićeć.

Přihoty na wólby zwjazkoweho sejma docpěwaja horcu fazu. Zwjesela, zo je tudyšim stronam dźeń a wažniše serbskich wolerjow w jich maćeršćinje narěčeć. Wčerawša prezentacija plakata Lěwicy „Kubłanje. Rěč je přichod“ bě zdobom nowosć: Sakski a braniborski krajny zwjazk stej prěni raz ćišćane serbskorěčne wólbne materialije zhromadnje wudałoj. Dalšu premjeru skići SPD: Sakscy socialdemokraća podadźa so dźakowano zasakłosći direktneje kandidatki dr. Uty Strewe ze serbskim plakatom do wólbneho boja. A Młoda unija Budyšin, dorostowa organizacija CDU, dźěła hišće na serbsko-němskim wólbnym flajeru. Dwurěčny z jenakej wulkosću pisma je plakat direktneho kandidata Zelenych Jensa Bitzki. Ženje dotal njeje so hesło „Serbska rěč je žiwa“ w zjawnostnym wólbnym boju tak šěroko wotbłyšćowało. Strony su sensibilizowane, derje­ tak! Axel Arlt

Pos bě wina, a zo dyrbješe wohnjowa wobora přijěć. Jako wobsedźerka runje doma njebě, skoči jeje lubušk w durinskim Altenburgu na kuchinske kachle a je při tym zaswěći. Na kachlach ležaca papjera so na to zapali. Jako alarmowani wohnjowi wobornicy dojědźechu, bě najhórše hižo nimo: Papjera drje so hišće dymješe, hewak pak so ničo njepaleše. Tež pos so na zbožo zranił njebě.

Z mjezwočom basista rockoweje skupiny Kiss je so ćelatko w zwjazkowym staće USA Texasu narodźiło. „Genie“ wupada kaž Gene Simmons z pomolowanym mjezwočom na koncertach skupiny. Předewšěm hdyž skoćatko jazyk pokazuje, je podobnosć na hudźbnika wočiwidna. Gitarist­ bě w 70tych lětach z tajkim čorno-běłym pomolowanym mjezwočom wustupował. Ćelo „Genie“ je so minjeny pjatk narodźiło.