Kraj a swět

To a tamne (01.08.17)

wutora, 01. awgusta 2017 spisane wot: dpa/Serbske Nowiny

Z awtom do swimmingpoola zajěła je 18lětna započatkarka w bayerskim Niederwinklingu we wokrjesu Straubing. Do toho bě so na křižowanišću druheho awta nastróžiła a wodźidło nabok storhnyła. Wona zajědźe na ležownosć, přerazy kerčinu a padny do poola. Ludźo z tamneho awta přichwatachu jej na pomoc, mjeztym zo so awto we wodźe podnuri. Šoferka a 17lětny sobujěducy so snadnje zraništaj. Škoda na awće: 40 000 eurow.

Prěnich 15 000 hosći lětušeho 28. heavy-metal-spektakla w schleswigsko-holsteinskim Wackenje je wčera dojěło. Najpozdźišo štwórtk wočakuja tam 75 000 wobdźělnikow. Hač do njedźele prezentuje so potom 150 rockowych hudźbnikow. Najwjetši festiwal tohole razu na swěće pak zahaja zajutřišim tradicionelnje z dujerskim koncertom Wackenskeje dobrowólneje wohnjoweje wobory.

dale čitać ...

Prezident Maduro spokojom

póndźela, 31. julija 2017 spisane wot: dpa/Cyril Kola; dpa/Serbske Nowiny

Caracas (dpa/K/SN). Referendum wo wustawnej zhromadźiznje ma prezident Venezuele Nicolás Maduro za wuspěch. Po informacijach wólbneje komisije je 41,5 procentow wólbokmanych wothłosowało. Přewodźany bě podawk wot namócnych protestow. Zražki mjez opozicionelnymi demonstrantami a policiju su sej znajmjeńša wosom smjertnych woporow žadali. Někotre južnoameriske staty, kaž Argentinska a Peru, runja USA wuslědk wothłosowanja njepřipóznawaja.

Wjacori Palestinjenjo zajeći

Jerusalem (dpa/SN). Po krawnych namócnosćach w zwisku z podawkami wokoło Temploweje hory w Jerusalemje je Israel minjenu nóc 33 Palestinjanow zajał. Wobydlerjam přewažnje wot Arabow wobydleneje štwórće wumjetuja, zo su so na namócnych rozestajenjach z israelskimi wěstotnymi mocami wobdźělili, kaž rěčnik policija zdźěla. Mjez zajatymi je tež sydom młodostnych w starobje 13 do 17 lět. Při namócnosćach běchu Palestinjenjo mjez druhim kamjenje, bleše a palace předmjety na israelskich policistow mjetali.

Wulkopósłanstwo nadpadnyli

dale čitać ...

Wopory krawneje bitwy wopominali

póndźela, 31. julija 2017 spisane wot: dpa/Cyril Kola

Brüssel (dpa/K/SN). Na kěrchowje wojakow njedaloko belgiskeho města Ypern wotmě so dźensa wopomnjenska swjatočnosć składnostnje třećeje Flandernskeje bitwy 1917. Ta bě so k jednej z najkrawnišich bitwow Prěnjeje swětoweje wójny rozwiła, a w njej zahinychu statysacy ludźi wobeju stron. Na wopominanju wobdźělichu so zastupnicy něhdyšich wójnskich njepřećelow. Němsku zastupowaše zwjazkowy wonkowny minister Sigmar Gabriel (SPD). Na wopory Flandernskeje bitwy dźiwajo rěkaše jeho poselstwo: „Nihdy hižo njesmě diplomatija tak zaprajić kaž 1914.“ Wulkobritaniski princ William a belgiski kral Philippe połožištaj při Meninskich wrotach wěncaj.

dale čitać ...

Diplomaća USA dyrbja Rusku wopušćić

póndźela, 31. julija 2017 spisane wot: dpa/Cyril Kola

Moskwa (dpa/K/SN). Wotpohladej USA, sankcije přećiwo Ruskej rozšěrić, Moskwa změrom njepřihladuje. Prezident Wladimir Putin je 755 ameriskich diplomatow namołwił z Ruskeje wotjěć. „Zastupnicy USA dyrbja ze swojimi aktiwitami w Ruskej přestać a kraj wopušćić“, rjekny wón w interviewje ze sćelakom Rosija 24. Ameriske knježerstwo rozsud prezidenta Putina kritizuje. „To je wobžarujomne a njewoprawnjene postupowanje“, rěka z wonkowneho ministerstwa USA. Nětko pruwuja móžne wuskutki. Putin ze swojeje strony liči z tym, zo budu poćahi přichodnje wobćežniše. „Nadźija na polěpšenje njeje so bohužel spjelniła.“ USA běchu minjeny tydźeń nowe sakcije přećiwo Ruskej wobzamknyli.

dale čitać ...

IG metal: Ekopremija za starše diesele

póndźela, 31. julija 2017 spisane wot: dpa/Serbske Nowiny

Frankfurt n. M./Berlin (dpa/SN). Dźěłarnistwo IG metal a zawodne rady wulkich němskich awtotwarcow žadaja sej hladajo na tak mjenowany „dieselowy wjeršk“ zajutřišim, srjedu, rjad hnydomnych naprawow, dokelž maja dieselowe motory tež dale za njeparujomne. Najwažniše su po jich měnjenju bórzomne techniske polěpšenja, zo bychu tež awta z wotpłunowej normu „pjeć“ nowym žadanjam wotpowědowali, rěka w dźensa wozjewjenej zhromadnej deklaraciji. Wjeršk měł wotpowědne směrnicy, zaměry a časowe plany zdźěłać.

dale čitać ...

Moja stara kara

póndźela, 31. julija 2017 spisane wot: Marko Wjeńka

Wuznawam: Tež ja słušam k tym, kiž wužiwaja dieselowe awto a kotřiž běchu z nim dotal spokojom. Na tym so tež po wonym skandalu manipulowaneho wotpłuna dla ničo změniło njeje. Wot dźensnišeho pak wěm, zo słuša moje awto ze swojimi runje třomi lětami a z wotpłunowej normu štyri k „staršim modelam“, kotrež měli so najspěšnišo wuměnić. To dyrbju drje wotnětka z hinašimaj wočomaj na swoju staru karu zhladować. Dopominaće so hišće na podawk w měrcu lěta 2011? Tehdy bě po zemjerženju a tsunamiju w jadrowej milinarni Fukushima w Japanskej k hawariji dóšło. Bjezposrědnje po tym je zwjazkowa kanclerka Angela Merkel připowědźiła wšitke němske jadrowe milinarnje, kotrež bě krótko do toho hišće jako najmoderniše a najwěsćiše swěta chwaliła, wotpinyć. K dieselowym awtam so wona dotal wuprajiła njeje, hišće nic .... Marko Wjeńka

dale čitać ...

Wobchod wotewrjeny

póndźela, 31. julija 2017 spisane wot: dpa/Serbske Nowiny

Hamburg (dpa/SN). Po smjertnym nadpadźe z nožom w Hamburgskim wobchodźe žiwidłow je potrjechena wotnožka předewzaća Edeka wot dźensnišeho zaso wotewrjena. Tam bě 26lětny wotpokazany požadar azyla minjeny pjatk 50lětneho muža zakłół a sydom ludźi zdźěla ćežko zranił. Wón sedźi w přepytowanskej jatbje. Sobudźěłaćerjo wobchoda dóstanu psychologisku pomoc.

dale čitać ...

To a tamne (31.07.17)

póndźela, 31. julija 2017 spisane wot: dpa/Serbske Nowiny

Kokošace a howjaze mjaso z bleše pić budźe wot septembra móžno. Peter Klassen, rězniski mišter z Triera, je napoj wuwił a chce jón po wšej Němskej rozšěrjeć. Móhło to napojowa jědź za ludźi być, kotřiž su wjele po puću, rjemjeslnikow, šoferow nakładnych awtow, ale tež pućowarjow abo sportowcow. Klassen je sej wědomy, zo změje napoj tež přećiwnikow. Přiwšěm hodźi so do časa smoothiejow a spěšnojědźow, wón rjekny.

Na ilegalnu technoparty je so wjace hač 5 000 přewažnje młodych ludźi sobotu njedaloko čěskeho Nymburka zhromadźiło. Policija jich bjez wuspěcha namołwješe teren wopušćić. Tójšto rejwarjow steješe pod wliwom alkohola a drogow. Tuž móžachu hakle wčera domoj jěć. Policija bě prezentna, njetrjebaše pak zapřimnyć. Wona zaraći dróhi, zo njebychu so dalši přidružili.

dale čitać ...