Domjacy porod telefonisce přewodźała je wohnjowa wobora w Münsteru, dokelž nochcyše mała Luisa dlěje čakać. Staršej wołaštaj w 2 hodź. nuzowu słužbu, dokelž so porod bližeše. Nuzowy lěkar bě po puću a do chorownje bychu dwanaće mjeńšin trjebali. Luisa pak bě spěšniša. Wohnjowy wobornik staršimaj tuž telefonisce radźeše, što měłoj činić. Mać a dźowčička stej wšitko derje přetrałoj. Wobornicy na to twitterowachu: „Wšo dobre, Luisa“.
Wołanje wo pomoc je w Regensburgu policiju alarmowało. Pěšcy běchu wołanje słyšeli a wobsadku nimo jěduceho policajskeho awta na to skedźbnili. Zastojnikaj wołaštaj dalšich policistow na pomoc a móžachu skónčnje zubnolěkarsku praksu jako žórło žałosćenja zwěsćić. Chutnje wohroženy pak nichtó njebě: Wo pomoc wołało bě šulske dźěćo, kotrež so zubneho lěkarja boješe.
Berlin (dpa/SN). Zwjazkowy minister za strowotnistwo Jens Spahn (CDU) je přeswědčeny, zo njezměje dočasne šćěpjenje wučerjow a kubłarjow časowe njelěpšiny za skupiny ludźi, kotřiž předschorjenjow dla na šćěpjenje čakaja. „Mnóstwo šćěpiwa, kotrež nětko mamy, tónle krok zmóžnja“, rjekny Spahn dźensa w rozhłosu. „Němska ma nětko wjele wjace šćěpiwa k dispoziciji hač hišće před tydźenjemi.“ Kraje běchu zas a zaso twjerdźili, zo maja dosć personala, zo pak serum pobrachuje.
Zaso na piwowe zahrody
Berlin (dpa/SN). Zwjazkowy financny minister Olaf Scholz je w koronakrizy nadźiju budźił, zo smědźa so ludźo w lěću zaso na piwowych zahrodach zetkawać. „Wuchadźam toho, zo w lěću zaso na piwowej zahrodźe sedźimy a kopańcu w stadionje sćěhujemy“, rjekny politikar SPD nowinarjam. „Wokomikne połoženje njeje za nikoho jednore. Mamy pak wšu přičinu k nadźiji.“ Wotewrjenja hodźeli so ze spěšnotestami zwjazać, „dokelž nas wirus hišće chwilu přewodźa“.
Kurz za „zeleny wupokaz“
Podstupim (dpa/SN). Braniborska kubłanska ministerka Britta Ernst (SPD) z toho wuchadźa, zo budu hač k jutram zaso wšitke šule w kraju wotewrjene. „Derje, zo su zakładne šule zaso wotewrjene“, rjekny Ernst wčera w aktualnej hodźinje krajneho sejma. Nětko měli dalše kročele slědować. „Nadźijam so, zo budu w měrcu tež dale wjeduce kubłanišća w změnach znowa přistupne a młodźinske poskitki za sport pod hołym njebjom zaso móžne.“
Lěwica w Braniborskej bě sej aktualnu hodźinu k zmištrowanju sćěhow koronakrizy za dźěći a młodostnych žadała. Wšelake studije dopokazuja, zo su w tej skupinje depresije, psychosocialne defekty a sćěhi pobrachowaceho pohibowanja dla wosebje přiběrali, kaž rěčnicy wšěch frakcijow potwjerdźichu. Zapósłanča Kathrin Dannenberg žadaše sej za Lěwicu kulojte blido kubłanskich fachowcow, wědomostnikow a zastupjerjow zwjazkow, zo bychu najlěpše koncepty zdźěłali, kak móhli kubłanske zastatki a dalše problemy přewinyć. Koalicija SPD, CDU a Zelenych pak to wotpokazuje.
Düsseldorf/Drježdźany (dpa/SN). Hač MediaMarktSaturn, Obi abo Deichmann, dźeń a wjace wikowarjow w Němskej su na kóncu swojeje sćerpnosće a chcedźa sudnisce přećiwo wukazanemu zawrjenju wobchodow postupować. Při tym demonstruja dotal njeznatu přezjednosć. „Smy skóržbu na zarjadniskich sudnistwach w Badensko-Württembergskej, Hessenskej, Sewjerorynsko-Westfalskej, Durinskej a Sakskej zapodali – wšudźe tam, hdźež mamy swoje domy. Zaměr je, naprawy lockdowna dla hnydom skónčić, dokelž su nadměrne a dokelž wunjesu nam njelěpšiny porno wikowarjam žiwidłow“, informuje rěčnik modoweho wikowarja Breuninger. Alternatiwnje žadaja sej předewzaća wotrunanje. „Kóždy dźeń, kotryž su naše domy zawrjene, płaći porjadnje wjele pjenjez.“
Mjeztym wobdźěla so wjace hač 300 wikowarjow na zhromadnej sudniskej skóržbje a žada sej wotškódnjenje. Předewzaće, kotrež kóšty procesow financuje, chce jim milion eurow za přichodne juristiske kročele přewostajić.
Rozhłosowy sćelak za žony chcedźa srjedź lěta po wšej Němskej na runinje DAB+ zarjadować. Ideju za to měješe Lipšćanska firma Teutocast. Statistisce je dopokazane, zo žony časćišo a dlěje rozhłós słuchaja, zdźěli jednaćel firmy. Chcedźa tuž z wosebitym programom žonam „medialnu domiznu“ skićić. Program ma tež internetnje přistupny być. Nawodnicu za njón hišće pytaja.
Tři tydźenje za swojim awtom pytał je muž w Osnabrücku. 62lětny z wjesneje kónčiny bě 3. februara termina dla do města přijěł a awto chwatnje w jednym z parkowanskich domow wotstajił. Pozdźišo pak wjace njewědźeše, hdźe. Zhromadnje z dźowku je wjacore razy do Osnabrücka jěł, zo byštaj wšitke parkowanske domy w bliskosći – cyłkownje 15 – přepytałoj. Hakle po namołwje w nowinje su awto našli.
Bonn (dpa/SN). Zwjazkowy institut za lěki a medicinske wudźěłki je prěnje tři wurjadne dowolnosće za sebjetesty na koronawirus přizwolił. Pola wšitkich třoch testow bjerješ sej sliny z prědnjeho dźěla nosa. Test móže kóždy lajk sam přewjesć, kaž institut zdźěli. Zakład je zrozumliwa přiručka, kak nastroj wužiwać. W zwjazkowym instituće bě hač do 12. februara nimale 30 próstwow wo wurjadne přizwolenje sebjetestow dóšło.
Pólska připowědźa kontrole
Waršawa (dpa/SN). Pólske knježerstwo planuje kontrole na mjezy k Čěskej a Słowakskej. Hladajo na epidemiologiske połoženje chcedźa nadróžny wobchad na južnej hranicy Pólskeje wobmjezować, informuje minister za strowotnistwo Adam Niedzielski. Naprawy maja wot soboty płaćić. Do kraja směš potom jenož hišće z negatiwnym koronatestom. Přiběraceje ličby infekcijow dla chcedźa nimo toho před tydźenjomaj wobzamknjene wolóženja cofnyć a hotele kaž tež sněhakowanske areale zaso zawrěć.
Pragmatisce postupować