Prěnje tarifowe koło zahajene
Podstupim (dpa/SN). Dźěłarnistwa a dźěłodawarjo su dźensa w Podstupimje wo mzdach něhdźe 2,5 milionow přistajenych zjawneje słužby w Zwjazku a komunach jednali. Tak žadaja sej dźěłarnistwa za nich 4,8 procentow wjace pjenjez. Snadne mzdy maja znajmjeńša wo 150 eurow postupić. Druhe koło jednanjow je za 19. a 20. september předwidźane, třeće koło za 22. a 23. oktober.
Zaso wjace bjezdźěłnych
Nürnberg (dpa/SN). Ličba bjezdźěłnych w Němskej je w awgusće znowa rozrostła. Wina na tym pak njeje koronapandemija. Kóžde lěto w samsnym času zwěsća Zwjazkowa dźěłowa agentura w Nürnbergu sezonalny zjaw, zo do lětnich prózdnin mnohe dźěłowe zrěčenja wuběža. Po informacijach dźěłoweje agentury njeměješe minjeny měsac 2,95 milionow ludźi žane dźěło. To bě 45 000 wjace hač w juliju a 636 000 wjace hač loni. Bjezdźěłnostna kwota wučinješe 6,4 procenty.
Puigdemont ze strony wustupi
Na mrětwu njezabyć
Drježdźany (dpa/SN). Sakska ministerka za strowotnistwo Petra Köpping (SPD) wobydlerjow namołwja, pomhać w boju přećiwo afriskej swinjacej mrětwje. „Najebać to, zo je nastupajo koronapandemiju wjele mocy trjeba, njesměmy strach mrětwy zabyć“, Köpping wčera w Drježdźanach zwurazni. Ludźo njeměli žane zbytki žiwidłow do přirody mjetać abo na zastanišćach podłu dróhow zawostajić. Zahinjene dźiwje swinje dyrbjeli zarjadam přizjewić. Plahowarjo swini měli na wulku wěstotu w swojich chlěwach dźiwać.
Z informaciskej kampanju, kotraž měri so mjez druhim na šoferow, pućowarjow a hajnikow, chce sakske strowotniske ministerstwo na problem skedźbnić. Za ludźi je mrětwa njestrašna, plahowarjo skotu pak měli z ekstremnymi wuskutkami ličić. Tak njemóhli swoje wudźěłki eksportować, a jich eksistenca by wohrožena była.
Před měsacami bě afriska swinjaca mrětwa na zapadźe Pólskeje wudyriła, ale njeje mjezu do Němskeje na zbožo přewinyła. Tuchwilu njejsu žane pady mrětwy blisko hranicy.
Dźensa po cyłym kraju stawkuja
Minsk (dpa/SN). Opozicija w Běłoruskej chce z cyłokrajnym stawkom ćišć na statneho šefa Aleksandera Lukašenka wukonjeć. Dźensa njeměł tam nichtó na dźěło hić, rěkaše w připowědźenju. Organizatorojo mjenowachu masowy stawk najwjetši w stawiznach kraja.
Runočasnje je demokratiske hibanje wokoło Marije Kolesnikoweje wozjewiło, zo su nowu stronu za wobnowjenje kraja załožili. Strona z mjenom Wmjestje (Zhromadnje) měła ludźi, kotřiž chcedźa něšto změnić, podpěrać, 38lětna wčera zdźěli. Předewšěm dźe wo to, zamołwitosć za natwar noweje towaršnosće přewzać, kaž Kolesnikowa wuzběhny.
Hižo něhdźe tři tydźenje w Běłoruskej protestuja a stawkuja. Wuchadźišćo su manipulacije při wólbach. Z 80 procentami hłosow wolerjow bu Lukašenko znowa šef stata. Demokratiske hibanje pak ma Swjetlanu Tichanowskaju za dobyćerku. Wona je z eksila w Litawskej tohorunja k stawkej namołwjała, a to ze słowami: „Pokazajće, zo Lukašenko žadyn šulski direktor njeje.“
Wabja za wulke wobdźělenje
Iniciatiwa ciwilna kuraža Wojerecy wšěch namołwja njedźelu wolić hić
Wojerecy (AK/SN). Iniciatiwa Ciwilna kuraža Wojerecy wabi za wobdźělenje na wólbach Wojerowskeho wyšeho měšćanosty přichodnu njedźelu, 6. septembra. „Kóždy měł zamołwiće rozsudźić, komu při wólbach načolnika města swój hłós da. Dźe wo naše město, wo sylne Wojerecy“, podšmórnje sobudźěłaćerka koordinaciskeho městna kubłanje a koordinatorka za politisko-historiske projekty města Wojerec Cindy Paulick.
Šulske lěto zahajene
To a tamne (01.09.20)
Jedna-li so wo woprawdźiteho krokodila, ma wón w Němskej relatiwnje dobre šansy přežiwić, zdźěli wčera slědźer Oliver Wings z Martina Lutheroweje uniwersity Halle-Wittenberg. Prašała bě so za tym powěsćernja dpa. W rěce Unstrut pytaja za krokodilom, kotrehož běchu tam wuhladali. Wings wšak skedźbnja na riziko, kotrež měli sej ludźo wuwědomić. Wšako jedna so wo strašne zwěrjo. Wone drje pomałe a spłóšiwe skutkuje, ale móže spěšnje kaž błysk metry daloko z wody skočić.
Chětro hłódny drje bě paduch minjeny pjatk we Würzburgu. Tak njemóžeše 41lětny dočakać a je ćelace medaljonki hnydom syre w kupnicy zjědł. Jako policija přijědźe, njeje wón spontany přikusk zapłaćić móhł, dokelž njeměješe žane pjenjezy při sebi, za to pak konop.
Lukašenko kritizuje cyrkej
Minsk (B/SN). Prezident Běłoruskeje Aleksander Lukašenko je so zjawnje hóršił, zo podpěruja cyrkwje demokratiske hibanje w swojim kraju. „Mje zadźiwa stejišćo našich konfesijow“, pisa Lukašenko na swojej internetnej stronje. „Duchowni njeměli opozicionelnych podpěrać. Stat njebudźe tomu přihladować. Cyrkwje měli so hańbować. Politika nima w cyrkwi ničo pytać.“ Nimo druhich nabožinow tež EU wólbny wuslědk z 9. awgusta njepřipóznawa. Knježerstwo bě wozjewiło, zo je 80 procentow Běłorusow za Lukašenka hłosowało, štož prawdźepodobnje njetrjechi. Wosebje katolska cyrkej žada sej narodny dialog. Wjetšina wobydlerstwa Běłoruskeje su prawosławni křesćenjo, něhdźe 15 procentow su katolskeje wěry.
Ličba hłód tradacych stupa
Nowy parlament wolili
Podgorica (dpa/SN). Po dotalnych wuslědkach wčerawšich wólbow noweho parlamenta w Montenegru je knježaca demokratiska strona socialistow (DPS) z prezidentom Milom Djukanovićom wjele hłosow wolerjow zhubiła. Z 35 procentami a 29 mandatami drje je hišće najsylniša, proruska demokratiska fronta pak je jej z 33 proc. hłosow a 28 mandatami na pjatach. Djukanović kraj hižo nimale 30 lět we wjacorych zastojnstwach nawjeduje. Nětko móhła so jeho doba po wšěm zdaću tola kónčić.
Kipping a Riexinger dźetaj
Berlin (dpa/SN). Předsydka Lěwicy Katja Kipping a kopředsyda Bernd Riexinger staj kónc tydźenja připowědźiłoj, zo nawodnistwo wotedataj. Po wosom lětach, tak kaž je we wustawkach zakótwjene, chcedźa tuž na stronskim zjězdźe Lěwicy 30. oktobra do 1. nowembra w Erfurće nowe předsydstwo wolić. Najwjac šansow matej frakciskej předsydce w Hessenskej a Durinskej Janine Wissler a Susanne Hennig-Wellsow.
Tematizuja naprawy hygieny
Zhromadne kontrole nahubnikow dla
Berlin (dpa/SN). Wobchadne předewzaća w Němskej njemóža winowatosć, wužiwać škitny nahubnik w busach a železnicach, po swójskich wuprajenjach same přesadźić. Kontrolu a pokutu njesměli jeničce zawodam přewostajić, rjekny Oliver Wolff, hłowny jednaćel Zwjazka wobchadnych předewzaćow, minjeny pjatk w Berlinje. „To nas personelnje přežada. Naši sobudźěłaćerjo njejsu za to wukubłani, ze zdźěla agresiwnymi spjećowarjemi nahubnika wobchadźeć. To je jeno z personelnej podpěru policije a porjadniskich zarjadow móžno.“
Za prawicarjemi njeběhać
Berlin (dpa/SN/JaW). Wulke njezrozumjenje je sobotny nadběh demonstrantow na Berlinski Reichstag zbudźił. Nimale wšitcy předsydźa politiskich stron Němskeje a dalši politikarjo akciju, při kotrejž mějachu nadběhowarjo reichsku chorhoj při sebi, raznje zasudźeja.
„Reichske chorhoje a prawicarskoekstremne škaranja před Němskim zwjazkowym sejmom su njeznjesliwy nadběh na wutrobu našeje demokratije“, rjekny zwjazkowy prezident Frank-Walter Steinmeier. Nutřkowny minister Horst Seehofer (CSU) ma Reichstag za symboliske srjedźišćo swobodneje demokratije. „Zo je chaoća a ekstremisća za swoje zaměry znjewužiwaja, njeje znjesliwe.“ Wonkowny minister Heiko Maas (SPD) zwurazni, zo maja wšitcy prawo, swoje měnjenje rjec a demonstrować. Wón pak namołwješe, zo njeměli za to za prawicarjemi běhać.
Dźensa dopołdnja bě nadběh tema w nutřkownym wuběrku zwjazkoweho sejma, hdźež měještaj Berlinski nutřkowny senator Andreas Geisel a nawodnistwo policije na prašenja wotmołwjeć.
