Pjenjez w płucach pacienta namakali su lěkarjo we westfalskim Hammje. Muž bě centowy pjenježk w januaru při darće mylnje spóžěrał. Fachowcy za płuca su jemu cuzy předmjet wuspěšnje wuoperowali, po tym zo bě so z kašelom a zahorjenymi płucami lěkarjej předstajił. Muž bě sej při hrě ze centom w hubje hrajkał, jako jemu towarš na ramjo klepny a wón pjenjez na to do so srěbny.
Z gumijowym čołmom Ryn přeprěčił je muž w Bonnje. Pěšk bě wohnjowu woboru informował, zo jědźe po rěce čołm w formje flaminga. W nim leži muska wosoba, kotraž na wołanje njereaguje. Centrala pósła 45 wobornikow a helikopter. „Po intensiwnym pytanju“ su muža skónčnje na tamnym brjohu Ryna čiłeho našli. Wobornicy wšak dyrbjachu jeho powučić, zo je rěku z tajkim „jězdźidłom“ přeprěčić přewšo strašne.
Rom (B/SN). Wudawki za wobrónjenje su loni po cyłym swěće tak jara rozrostli kaž minjene dźesać lět nic. Tak inwestowachu USA jeničce loni cyłkownje 732 miliardow dolarow do swojeho wojerstwa, zdźěli slědźerski institut za měr Sipri w Stockholmje. Nimo Ameriki mějachu najwjetši wojerski etat China, Indiska, Ruska a Sawdi-Arabska, štož wučinješe 62 procentow wšěch swětowych wojerskich wudawkow. Němska ležeše loni za Francoskej na 7. městnje a suny so tak porno lětu 2018 wo dwě městnje doprědka. Wot časa globalneje financneje krizy 2008 je so trend wobrónjenja strašnje pospěšił, informowachu měrowi slědźerjo w powěsćach Vatikana.
Kak dale po synodalnym puću?
Berlin (dpa/SN). Po zběhnjenju warnowanjow před pućowanjemi do druhich europskich krajow je dźensa rano zaso wjace ludźi na Tegelske a Schönefeldske lětanišćo w Berlinje přišło. Na kóždym z lětanišćow pak bě jenož jedyn terminal za wotlěty a přizemjenja k dispoziciji. Cyłkownje planowachu 80 wotlětow a přizemjenjow w Berlinje, hewak je jich wšědnje něhdźe tysac.
Brexit nětko wěc šefow
Brüssel (dpa/SN). Wjerškowe zetkanje Europskeje unije z Wulkej Britaniskej měješe dźensa nowy rozmach do dlijacych so rozmołwow wo wikowanskim zrěčenju po brexiće přinjesć. Na widejowej konferency z premierministrom Borisom Johnsonom wobdźělichu so za EU prezidentka komisije Ursula von der Leyen, prezident Rady EU Charles Michel a prezident parlamenta EU David Sassoli. Fachowcy njeběchu wot měrca najebać intensiwne jednanja ničo docpěli.
Policajskej kulce wina byłoj
Berlin (dpa/SN). Němski zwjazk Industrijnych a wikowanskich komorow (DIHK) wočakuje po wotewrjenju nutřkoeuropskich mjezow Europskeje unije pozitiwny efekt na globalne hospodarstwo. „Wot wotewrjenych mjezow móhli po wšej Europje impulsy wuchadźeć, zo by so mjezynarodne wikowanje wožiwiło a derjeměće kaž tež dźěłowe městna zaručene byli“, rjekny prezident DIHK Eric Schweitzer nowinarjam. Wosebje wažne jemu je, zo su němske wudźěłki a posłužby po wšěm swěće zaso prašane. „Dźensa wotewrjene mjezy móhli na němske hospodarstwa kaž dalši konjunkturny program skutkować, kotryž stat ničo njepłaći“, měni prezident DIHK.
Starosće Schweitzerej wobradźa, zo dale před jězbami do 160 krajow warnuja, mjez druhim do USA, Chiny a Ruskeje, wažnym hospodarskim wikam Němskeje.
Podstupim (dpa/SN). Braniborski ministerski prezident Dietmar Woidke (SPD) ma po nimale tři měsacy trajacym zawrjenju mjezy k Pólskej wuše wothłosowanje ze susodom za trěbne. Społnomócnjeny němskeho zwjazkoweho knježerstwa za styki k Pólskej rjekny rozhłosownikam hladajo na dołhe rynki čakacych nakładnych awtow po zawrjenju mjezy: „Tajkim problemam bychmy zadźěwać móhli, bychmy-li do toho ze sobu rěčeli. To njeje so w turbulentnych časach na spočatku koronakrizy bohužel stało.“ Najebać to je jemu sobotne wotewrjenje mjezy „wulke wjeselo“.
Narodnokonserwatiwne Waršawske knježerstwo bě srjedź měrca swoje mjezy k tamnym krajam Europskeje unije zawrěło, zo by dalšemu rozpřestrěću koronawirusa zadźěwało. To je powołanskich dojězdźowarjow, kotřiž běchu mjezu wšědnje přeprěčili, wosebje trjechiło.
Braniborski ministerski prezident rjekny, zo je tydźensce z koordinatorom na pólskim boku Bartoszom Grodeckim telefonował, a styki su mjeztym „jara dobre“.
Lednice/Brüssel (dpa/SN). Čěska, Pólska, Madźarska a Słowakska žadaja sej změny při rozdźělenju srědkow z planowaneho fondsa Europskeje unije za nowonatwar hospodarstwa po koronakrizy. „Njesmě być, zo dyrbja chude kraje za bohate kraje płaćić“, rjekny čěski ministerski prezident Andrej Babiš po zetkanju tak mjenowaneje Visegrádskeje štyrki na hrodźe Lednice sćelakej ČT. Jara wažna je wulke fleksibilita w prašenju kriterijow rozdźělowanja, wudospołni pólski ministerski prezident Mateusz Morawiecki. Za srjedźoeuropski region su inwesticije do infrastruktury, kaž awtodróhow abo železniskich čarow, wosebje wažne.
Madźarski knježerstwowy šef Viktor Orbán njewočakuje, zo so kraje EU bórze dojednaja. Na naćisku komisije EU je „hišće wjele dźěła“, wón rjekny. „Chcemy signal wusyłać, zo njeje wobstejacy kompromis fairny“, potwjerdźi słowakski ministerski prezident Igor Matovič. Z kreditami financowany fonds 750 miliardow eurow ma čłonskim statam EU pomhać, wot pandemije zawinowanu hospodarsku krizu přewinyć. Najwjace pjenjez matej Italska a Španiska dóstać.
Rom (dpa/SN). W Italskej su započeli koronapandemiju juristisce předźěłać. Wona je sej po cyłym kraju 34 000 smjertnych woporow žadała. Statne rěčnistwo wosebje potrjecheneho města Bergamo je minjeny pjatk w Romje italskeho ministerskeho prezidenta Giuseppu Conteho w naležnosći přesłyšowało. Tež strowotniski minister Roberto Speranza a nutřkowna ministerka Luciana Lamorgese běštaj jako swědkaj wotběhow po wudyrjenju wirusa skazanaj, kaž medije kraja rozprawjeja.
Italska přeco hišće njewě, čehodla je so chorosć na hospodarsce sylnym sewjeru kraja tak spěšnje rozšěrić móhła a što je tomu polěkowało. Při tym dźe tež wo prašenje, čehodla njejsu zamołwići gmejnje Alzano Lombardo a Nembro w prowincy Bergamo hnydom zawrěli. Kónčina bě w měrcu wot pandemije sobu najbóle potrjechena. Wobrazy wojerskich nakładnych awto z ćěłami zemrětych běchu swój čas ludźi po cyłym swěće zludali. Přiwuzni zemrětych su mjeztym něhdźe połsta skóržbow zapodali, dokelž na zaprajenje zarjadow tukaja. Premier Conte njeje sej žaneje winy wědomy.