Pod sylnym wliwom drogow stał je 35lětny muž, jako bě ze swojim awtom na awtodróze 57 pola Dormagena do směra na Köln po puću. Jědźeše tajku seklojtu čaru, zo dyrbjachu druzy šoferojo zas a zaso borzdźić. Nadobo wón zasta, wulěze napoł nahi z awta a přeprěči awtodróhu. Nawróćiwši so muž zaso wotjědźe. Wosrjedź Kölna policija jeho skónčnje zadźerža a sobu wza.

Wopačneho policista su při wobchadnej kontroli w Bayerskej lepili. Zastojnicy běchu 42lětneho ze Sakskeje zadźerželi, dokelž bě jeho awto w chětro špatnym stawje. W awće namakachu samopasleny słužbny wupokaz, trašawku, municiju, nóž a policajsku čapku ze sakskim woponom. Hač bě čapka originalna, policija njewě. Wupokaz „sakskeje wěstotneje straže“ to na žadyn pad njebě. Nimo toho njebě awto scyła přizjewjene.

Znowa demonstracije přećiwo wobmjezowanjam koronapandemije dla

Drježdźany (dpa/SN). Sakski ministerski prezident Michael Kretschmer (CDU) je rozsudy w boju přećiwo koronawirusej zakitował a wo zrozumjenje za nje wabił. 45lětny poda so kónc tydźenja za to k demonstrantam, kotřiž su w Drježdźanach přećiwo naprawam koronawirusa dla protestowali. Tam so něhdźe 200 ludźi zhromadźi – mjez nimi tež tajcy, kotřiž sej dźěło ministerskeho prezidenta chwalachu. Druzy porno tomu prějachu, zo koronawirus scyła eksistuje, a wumjetowachu politikarjam, zo chcyli z „korona-łžu“ ludźom strach načinić. Někotři běchu přeswědčeni, zo je koronakriza skutk „ćěmnych mocow“. Kaž Michael Kretschmer rjekny, je wón „wjesoły, zo njetrjebachmy w Sakskej žane ćěła mortwych z nakładnymi awtami wotwjezć“ a zo njeby za tajku situaciju zamołwity być chcył. Někotre rozsudy běchu hórke a su tež jemu bjezsparne nocy wobradźili, kaž přizna. Spočatnje wšak njebě ani znate, kak so wirus rozpřestrěje. „Nětko pak smy mudriši a tuž je nětko tež wjace móžno.“

Hannover (B/SN). Předsyda rady Ewangelskeje cyrkwje w Němskej (EKD) Heinrich Bedford-Strohm je wšěm muslimam w Němskej postrowy přeća žohnowanja k ramadanej po­srědkował. „Zhromadne dźěło z druhimi w modlitwje kaž tež w nabožinskej praksy křesćanki a křesćanow z muslimkami a muslimami wjaza“, Bedford-Strohm wujasni. Ramadan je 9. měsac po islamskej protyce. W tym času maja so muslimki a muslimojo po předpisach ko­rana wot schadźenja słónca hač k jeho chowanju posćić. Tak słuža woni Bohu a sej zdobom ćěło a duch wučisćeja. Za muslimow w Němskej započina so póstny měsac ramadan 24. apryla a kónči so 24. meje.

Pomha w chorowni

Podstupim (B/SN). Krajna předsydka braniborskeje Lěwicy Anja Mayer pomha za čas koronapandemije w Podstupimskej katolskej chorowni swj. Józefa. W ćežkich chwilach korony dla je chorownja wo po­moc prosyła. Wjacori pomocnicy z medicinskim wukubłanjom so při­zjewichu, mjez nimi politikarka Anja Mayer. Wukubłana lěkarska pomocnica je hač do lěta 2006 w tym powołanju dźěłała. Nětko wukonja 41lětna rady słužbu we wotrjedźe za nuzowe přiji­manje.

Budyšin (SN). W Budyšinje, Biskopicach, Kamjencu, Běłej Wodźe a Bukojnje, gmejna Malešecy, wotměchu so kónc tydźenja najwšelakoriše akcije přećiwo wobmjezowanjam koronapandemije dla.

Najwjace wobdźělnikow zličichu po medijowych rozprawach sobotu w Budyšinje, hdźež je na dwěmaj zarjadowanjomaj přibližnje 200 ludźi demonstrowało. Kaž hižo tydźeń do toho wotmě so připołdnju tak mjenowane „wuchodźowanje“ wot Žitnych wikow přez Bohatu hasu na Hłowne torhošćo. Wobdźělnicy pokazowachu mjez druhim Zakładny zakoń. Přizamkny so manifestacija AfD z Wojerowskim zapósłancom zwjazkoweho sejma Karstenom Hilsu a z krajnym předsydu AfD Jörgom Urbanom.

Prěni raz běchu Budyscy měšćanscy radźićeljo přećiwny protest organizowali. Nimo Wobydlerskeho zwjazkarstwa a AfD běchu tam wšitke dalše frakcije měšćanskeje rady zastupjene.