Berlin (dpa/SN). Bjezposrědnje do prěnjeho posedźenja dźěłoweje skupiny koalicije CDU/CSU a SPD na temu zakładna renta sej FDP žada dotalne plany předźěłać. Fachowc za wobłuk renty frakcije FDP w zwjazkowym sejmje Johannes Vogel měni, zo njeje potrjechenym ludźom z modelom pomhane, wšako jeničce ći z njeho profituja, kotřiž su znajmjeńša 35 lět přinoški płaćili. Po trajacej rozkorje wokoło zakładneje renty, chce koalicija dźensa za rozrisanjom­ pytać.

Gabriel mandat spušći

Berlin (dpa/SN). Bywši šef strony SPD Sigmar Gabriel chce swój mandat w zwjazkowym sejmje 1. nowembra wotedać, kaž wón wčera wječor připowědźi. Přičiny toho su wosobinskeho razu. Hakle w septembru swjećeše wón 60. narodniny, štož je jeho k rozmyslowanju wo swójskim přichodźe pohnuło. Mjez druhim wuwučuje Gabriel na uniwersitomaj w Bonnje a Harvardźe, je rěčnik na zarjadowanjach a předsyda towarstwa mjez USA a Němskej Móst Atlantika, štož jeho dale a bóle wužaduje.

Pućowacych podpěrać

Berlin (dpa/SN). Zwjazkowy sejm je wčera­ prěni raz wo naćisku zakonja wuradźował, kotryž ma kónčiny sylnić, hdźež brunicu wudobywaja. Cyłkownje chce Zwjazk potrjechenym regionam, ke kotrymž tež Łužica słuša, 40 miliardow eurow přewostajić. Pjenjezy su za na­prawy strukturneje změny předwidźane. Hač do lěta 2038 chcedźa w Němskej přestać milinu na zakładźe wuhla pro­dukować.

Zapósłanc zwjazkoweho sejma Thomas Jurk (SPD) ma zakoń za nuznje trěbny. „Předewšěm dyrbimy srědki za rozrost hospodarstwa zasadźeć“, wón wčera w emocionalnej narěči wuzběhny a skedźbni na to, zo měli najprjedy dźěłowe městna zaručene być, prjedy hač zakónča brunicu wudobywać. Principielnje ma Thomas Jurk w naćisku zakonja zakótwjene namjety brunicoweje komisije za spomóžne, ale přeco hišće za „njedosahace. Dalše naprawy su nuznje trěbne“, wón podšmórny.

Prjedy hač smědźa so baby a psychoterapeuća přichodnje tež oficialnje tak mje­nować, maja so wone/woni po woli zwjazkoweho sejma akademisce za to kwalifikować. Nowej studijnej směraj změjetej „sylny praktiski podźěl“, kaž w zakonskim teksće rěka; wukubłanje traje maksimalnje wosom semestrow a kónči so ze schodźenkom bachelora. Zajimcam přisteji w tym času financne wurunanje. Špak pak je, zo nastanu z reformu tež nowe zadźěwki: Dotal­ dosahaše za wukubłanje wotzamknjenje realneje šule, nětko trjebaš abituru – chibazo sy so hižo na polu hladanja powołansce wuwučować dał. Hač so tak nje­dostatk předewšěm babow woprawdźe wotstroni? Wosebje zwonka městow aktualnje kaž tež přichodnje swobodnje skutkowacym pomocnikam při porodach by zawěsće bóle pomhało, by-li so zakonjedawar wo reformu za nich eksorbitantnje droheho rukowanskeho winowatostneho zawěsćenja postarał. Bosćan Nawka

Njekorektnych powěsćow dla chcyše muž z Oldenburga zawčerawšim radijoweho rěčnika wukrajneho sćelaka policiji přizjewić. A je to tam nimale 40 razow pod nuzowym čisłom spytał. Na kóncu je chětro nerwowany zastojnik k mužej domoj jěł a jemu handy sćazał. Nětko přepytuja přećiwo 51lětnemu znjewužiwanja nuzoweho telefonoweho čisła dla.

Na sanitetnej staciji Mnichowskeho oktoberskeho swjedźenja bywa lětsa wjele lubosćinskich mjetelčkow po puću. Po tym zo bě sanitetarka hakle minjeny kónc tydźenja wot hosća prašenje wšěch prašenjow dóstała, je nětko dalši pacient kłok amora začuwał. Jako Jendźelčana Johna­ zranjenja dla runje zastarachu, dósta wón lubosćinski list Awstralčanki. Nablaku měješe John njesměrnje nuzne, byrnjež wulke bolosće měł, zo móhł swoju najlubšu na lětanišću hišće dosćahnyć.