London (dpa/SN). Britiski premierminister Boris Johnson chce próstwu wo nowowólby zapodać, jeli jemu zapósłancy zadźěwaja, za brexit bjez zrěčenja so zasadźić. Johnson chce tak mjenowany no-deal-brexit na zakładźe zakonja zakótwjeny měć. Chaos je nětko perfektny, dokelž započa parlament wčera bjez při­zwolenja knježerstwa wo zakonju jednać, na zakładźe kotrehož móžno njeje hač do 31. oktobra EU wopušćić, njepředleži-li EU žane zrěčenje. Planowany zakoń předwidźi, zo ma Johnson próstwu wo přesunjenje brexita zapodać, njeje-li hač do 19. oktobra wotpowědne zrěčenje ratifikowane. Próstwje měło potom wšitke tamne 27 statow EU přihłosować. Johnson pak nochce dalše dlijenje a nadźija so nowowólbow. Hišće dźensa wječor móhli zapósłancy parlamenta wo próstwje britiskeho premiera wothłosować, štož budźe ćežko. Wčera wječor je konserwatiwny zapósłanc Phillip Lee z pro­testa přećiwo politice Johnsona brexita dla frakciju knježerstwa demonstratiwnje wopušćił a so opoziciji přizamknył.

Debata wo wobchadźenju z prawicarskopopulistiskej stronu

Berlin (dpa/SN). Po wólbnych wuspěchach AfD w Braniborskej a Sakskej jewja so přiběrajcy hłosy w druhich politiskich stronach, kotrež maja za wopačny puć, wot wolerjow a sympatizantow tuteje strony so raznje wotmjezować. Městopředsyda FDP Wolfgang Kubicki rjekny, zo „njebudźe hižo dosahać, AfD wumjezować a wočornić“. Frakciska předsydka Lěwicy Sahra Wagenknecht wobžaruje wotcuzbnjenje swojeje strony wot teje woršty wolerjow a dawa Lěwicy sobuwinu na sylnym rozmachu AfD.

CDU a SPD běštej při wólbach krajneju sejmow masiwnje hłosy zhubiłoj, móžetej pak we wšelakich konstelacijach zaso ministerskeho prezidenta stajić, socialdemokraća w Braniborskej a křesćanscy demokraća w Sakskej. AfD bě so we woběmaj krajomaj z wulkim wotstawkom jako druha najsylniša móc etablěrowała. Wot toho časa debatuja, kak z prawicarskimi populistami wobchadźeć.

W tym padźe je słowo „kuzłać“ přiměrjene. Štóž z maturantow so mjenujcy bjez ćežow internetnje wo studijne městno požada, tón móže – tak znajmjeńša so zda – kuzłać. Přizjewjenske portale so požadarjej hakle krok po kroku wotwěraja. Za tych, kotřiž serbsce rěča a chcedźa so na přikład z wučerjom stać, su zadźěwki wyše. Wšako maja namakać přidatny kašćik, w kotrymž nakřižikuja, zo serbšćinu wobknježa. Derje je, zo móža maturanća přerězk matury wo 1,0 zwyšić, hdyž poprawny za numerus clausus njedosaha. Poskitk sakskeho knježerstwa, kotryž pomha sej kwalifikowany serbskorěčny dorost zdobyć. Zabyć pak njeměli na to, zo trjebamy w Serbach při wšěch mjenowanych lěpšinach dobrych fachowcow. Z mjenowanej pomocu stata stanu so na te wašnje tež młodźi ludźo wučerjo, kotřiž maja wučerjenje w kreji, tež hdyž censury wo tym njeswědča. A tež to mam za ku­zło. Na dobro wšěch! Milenka Rječcyna

Gumijowa atrapa hłowy krokodila drje přińdźe bórze do měšćanskeho muzeja badensko-württembergskeho Kirchheima unter Teck. Atrapa symbolizuje dny trajacy wopačny alarm srjedź junija. Te­hdy je město wjacore jězory we wokolinje zawrěło, po tym zo běchu ludźo twjerdźili, zo su krokodile we wodźe. Tež jako so jedyn tajki jako atrapa wukopa, ludźo dale wo nich rěčachu. Gumijowy krokodil je tuž jako „dźěl měšćanskich stawiznow“ wažny za muzej města.

Noweho sobuwobydlerja na swojim dźěłowym městnje ma wot najnowšeho britiski premierminister Boris Johnson. Na Downing Street čisło 10 w Londonje bydli wotnětka młody Jack-Russell-terrier. Johnson bě 15 tydźenjow stareho psa ze swojej přećelku Carrie Symonds ze zwěrjatownje přiwzał. Pos ma wšak so nětko z kocorom Larryjom jako dawnym wobydlerjom Downing Street 10 aranžować.