Wo integraciji potrěbnych rěčeli
Berlin (dpa/SN). Zwjazkowy minister za dźěło Hubertus Heil (SPD) je dźensa na wjerškowym zetkanju z dźěłodawarjemi a dźěłarnistwami wo praktiskich prašenjach integracije ukrainskich ćěkancow na dźěłowych wikach wuradźował. „Smy so hižo wo to postarali, zo bychu ludźo z prawom přebywanja tež prawo na dźěło měli“, rjekny Heil nowinarjam. „Zo by tole tež woprawdźe móžne było, dyrbimy nětko spěšnje a pragmatisce cyle praktiske prašenja rozrisać.“ Rěčeć chcychu wo rěčnych kursach za ćěkancow, wo připóznawanju powołanskich kwalifikacijow a wo dalekubłanjach. Nimo toho chcychu wo spušćomnym wothladanju dźěći wuradźować, dokelž wšak předewšěm žony z dźěćimi do Němskeje přińdu. Na zarjadowanje přeprošeni běchu šef dźěłarnistwa DGB Reiner Hoffmann, prezident zwjazka dźěłodawarjow Rainer Dulger a prezident zwjazka industrijnych a wikowanskich komorow Detlef Scheele kaž tež zastupnicy zwjazkowych krajow.
Zwjazkowy zarjad za migraciju a ćěkancow je sej wěsty, zo maja ćěkancy dosć móžnosćow, so na rěčnych a integraciskich kursach wobdźělić.
Spodźiwna swoboda
Ćeknjene dźěći spěšnje do šule
Berlin (dpa/SN). Fachowcy konferency kultusowych ministrow Němskeje radźa, z Ukrainy ćeknjenych dźěći a młodostnych spěšnje w pěstowarnjach a šulach Němskeje zaměstnić. „Wšitke dźěći a wšitcy młodostni dyrbjeli bórze po přichadźe pěstowarnju abo šulu wopytać“, rjekny městopředsyda stajneje wědomostneje komisije Olaf Köller wčera nowinarjam. Tam móhli dźěći němčinu nawuknyć, swój dotalny kubłanski puć dale wjesć, kontakty k runje tak starym nawjazać a pomoc k přewinjenju trawmatiskich dožiwjenjow namakać. Köller je tež wědomostny direktor Leibnitzoweho instituta za pedagogiku přirodnych wědomosćow a matematiki.
Komisija, kotraž je ze 16 kubłanskimi slědźerjemi najwšelakorišich disciplinow wobsadźena, je wčera stejišćo k integraciji dźěći a młodostnych z Ukrainy předpołožiła. Gremij běchu loni załožili, zo bychu zwjazkowe kraje při dalšim wuwiću kubłanskeho systema poradźowali. Naposledk běchu wo tym diskutowali, hač měli dźěći a młodostnych do němskeho kubłanskeho systema integrować abo po ukrainskim přikładźe kubłać.
Mnozy so do domizny wróća
Waršawa (dpa/SN). Po ruskim nadpadźe na Ukrainu je sej nimale 2,35 milionow ludźi do Pólskeje wućeknyło. Tole zdźěli pólski pomjezny škit we wčerawšej informaciji. Jeno póndźelu su po tym 21 000 ludźi z Ukrainy zličili. To je 22 procentow mjenje hač dźeń do toho. Z Pólskeje do směra na Ukrainu je po zahajenju wójny 24. februara něhdźe 364 000 ludźi mjezu překročiło. Pola tutych pućowacych jedna so po informacijach pomjezneho škita přewažnje wo ukrainskich staćanow, kotřiž so do swojeje domizny nawróća. Mužojo, ale tež žony, chcedźa so tam ukrainskemu wójsku přizamknyć a přećiwo ruskim wojakam wojować. Druzy so nawróća, zo bychu so tam wo dźěći a hladanja potrěbnych starali.
Tuchwilu njeje žanych oficialnych informacijow, kelko wójnskich ćěkancow je w Pólskej wostało a kelko je hižo do druhich krajow EU dale jěło. Ukraina – po płoninje najwjetši kraj Europy, měješe do spočatka ruskeho nadpada 44 milionow wobydlerjow. Pólsku a Ukrainu zwjazuje wjace hač 500 kilometrow dołha statna mjeza. Nawal ćěkancow je w Pólskej hobersku žołmu pomocliwosće zbudźił.
To a tamne (30.03.22)
Dalše jednanja Ukrainy dla
Mjezynyrodne mustwo ma móžne wójnske złóstnistwa přepytować
Kijew (dpa/SN). Do nowych jednanjow mjez Ukrainu a Ruskej wo wjacore ukrainske města dale wojuja. Prezident Wolodymyr Zelenskyj rěčeše minjenu nóc wo napjatym połoženju najebać někotre wojerske wuspěchi ukrainskich wojowarjow. Po jeho słowach su ukrainske jednotki ruskich wojakow z města Irpina, wo kotrež su tydźenje dołho wojowali, wuhnali. Najebać to maja ruske jednotki sewjerne dźěle Kijewskeje kónčiny dale pod kontrolu. Ruscy wojacy spytaja, rozbite jednotki znowa natwarić a přerjadować. Za to maja wotpowědne materielne rezerwy a mocy, Zelenskyj rjekny. Tež w kónčinach wokoło druhich městow wostanje połoženje „jara ćežke“. Zelenskyj žadaše sej znowa razniše sankcije přećiwo Ruskej před dobrym měsacom zahajeneho wojerskeho nadpada dla.
Hans jako předsyda wotstupi
Saarbrücken (dpa/SN). Předsyda posaarskeje CDU Tobias Hans je po poražce při wólbach krajneho sejma zastojnstwo krajneho předsydy złožił. Na zjězdźe strony spočatk meje měło so wo personalnej zestawje předsydstwa znowa rozsudźić, rjekny Hans wčera wječor po posedźenju krajneho předsydstwa w Saarbrückenje. Hans přizna, zo je hórka poražka CDU předwčerawšim, njedźelu, z jeho wosobinu zwjazana.
Faeser za zhromadnu kwotu
Berlin (dpa/SN). Zwjazkowa nutřkowna ministerka Nancy Faeser (SPD) ma zawjazowace rjadowanje za rozdźělenje milionow ukrainskich ćěkancow w krajach EU dale za trěbne. „Čim wjace ćěkancow přińdźe, ćim bóle budźe tajke rjadowanje trěbne“, rjekny wona wčera wječor w sćelaku ARD. Při zetkanju nutřkownych ministrow EU wčera w Brüsselu bě so wona za wotpowědnu kwotu zasadźowała, njemóžeše pak so přesadźić. EU wostanje dale při principje dobrowólnosće.
Schröder dotal njewotmołwił
Móhli so tež europskich wikow wzdać
Moskwa (dpa/SN). Ruska chce spadowace dodawanje nafty do europskich krajow z eksportami do Aziskeje narunać. Tak su tež wiki „w južnej Aziskej a na wuchodźe“, zdźěli rěčnik ruskeho knježerstwa Dmitrij Pjeskow po informaciji agentury Interfax wčera w Moskwje. Swětowe wiki su mnohostronske a njewobsteja jeno z Europy. „Najebać to su europske wiki premium“, rěčnik ruskeho prezidenta Wladimira Putina wobkrući.
Předewšěm reaguje Pjeskow na připowědźenja zwjazkoweho kanclera Olafa Scholza (SPD), kiž chce „relatiwnje spěšnje“ njewotwisnje wot ruskich energijowych importow być a so dowožowanja wuhla a wolija wzdać. Po dotalnych wuwjedźenjach zwjazkoweho hospodarskeho ministra Roberta Habecka (Zeleni) zamóže Němska ruski import wolija hač do lěća wo połojcu pomjeńšić.
Přiwšěm pak Pjeskow na to skedźbni, zo Ruska na tym wobsteji, zo maja europske kraje přichodnje zličbowanki za zemski płun w ruskej měnje rubl zapłaćić. Jelizo so kraje spjećuja, njebudźe Ruska swój płun darmotnje do Europy dodawać. Hladajo na tuchwilnu situaciju njeje to za kraj „móžne a zmysłapołne“
Kritizuja ćežišćowe rjadowanja
Berlin (dpa/SN). Zwada wo tak mjenowane ćežišćowe rjadowanje za daloko sahace naprawy přećiwo koronawirusej dale traje. Ze stron CDU/CSU po wšej Němskej płaćiwe rjadowanja kritizuja. Tola tež komunalne zwjazki maja wobmyslenja.
Zwjazkowym krajam su wot minjeneje njedźele jenož hišće snadne škitne naprawy za wužiwanje nahubnikow a testow dowolene. Woni pak móža naprawy w kónčinach z wosebje wjele infekcijemi w swójskej zamołwitosći wukazać. Wjacore kraje skorža, zo pobrachuja za to prawniske zakłady. Mjeztym je zwjazkowy minister za strowotnistwo Karl Lauterbach (SPD) potwjerdźił, zo njebudźe nowe prawniske rjadowanja změnić.
Rěčnik frakcije CDU/CSU za strowotniske naležnosće w zwjazkowym sejmje Tino Sorge rjekny nowinarjam, zo měli centralne wurazy kaž „hotspot“ w zakonju jasnje definowane być. Tež hłowny jednaćel zwjazka městow a gmejnow Gerd Landsberg kritizuje, zo njeje zakonjedawar jasne kriterije za ćežišćowe kónčiny postajił a to krajam přewostajił.
Direktnje do New Yorka lećeć
Schönefeld (dpa/SN). Wot Berlina direktnje do New Yorka lećeć je wot wčerawšeho z lětanišća Berlin-Braniborska (BER) móžno. Předewzaće United Airlines poskića zwisk k tamnišemu lětanišću Newark. Wšědnje přizemi a wotlěta mašina w Schönefeldźe. „Wobě metropoli Berlin a New York měłoj so zwjazać“, airline wčera zdźěli. Poskitk je prěni zwisk přez dołhu čaru do USA z noweho lětanišća. Ze Schönefelda lětaja mašiny nimo toho do Singapura, Doha a w zymje tohorunja do Dubaja. Wčera su lětadło Boeing 767 do směra na New York oficialnje rozžohnowali, při čimž pryskaše lětanišćowa wohnjowa wobora wodowe fontany. Berlinska knježaca měšćanostka Franziska Giffey (SPD) a Berlinski hospodarski senator Stephan Schwarz (njestronjan) běštaj na rozžohnowanje přišłoj.
Zastupjerjo z politiki a hospodarstwa sej hižo lěta tajke zwiski přez dołhu čaru z noweho lětanišća žadaja. Hižo na bywšim lětanišću w Tegelu bě tajkich zwiskow jara mało. Často maja pasažěrojo z Berlina a Braniborskeje zwiski wot Frankfurta nad Mohanom abo Mnichowa wužiwać a tam přelězć.
