Planuja wolóženja energije dla
Berlin (dpa/SN). Jako reakciju na spochi přiběrace płaćizny energije je wicekancler Robert Habeck (Zeleni) nowy pomocny paket zwjazkoweho knježerstwa připowědźił. Podróšenja w cyłym energijowym wobłuku mnohich ludźi poražeja, rjekny minister za hospodarstwo a škit klimy powěsćerni dpa. „Ekstremne kóšty za tepjenje, ekstremne płaćizny miliny a ekstremne płaćizny bencina domjacnosće poćežuja, čim snadniše maja dochody, ćim bóle.“
Habeck planuje na jednym boku wolóženja pola miliny, ćopłoty a mobility. Nimo toho dyrbjało so na polu eficientnosće a lutowanja miliny a přetrjeby bencina něšto činić, mjez druhim z ponowjenjom starych tepjenskich připrawow.
Zwjazkowy financny minister Christian Lindner (FDP) je so za statny připłatk při tankowanju wuprajił. Kak wulki rabat budźe, njeje dotal hišće znate. Suma hodźała so při zapłaćenju wotćahnyć. Generelne zniženje nadhódnotoweho dawka na bencin, kaž sej to mnozy žadaja, Lindner dale wotpokazuje.
Za měr w Ukrainje demonstrowali
To a tamne (14.03.22)
Protestujo přećiwo horendnym płaćiznam bencina a swarjacych šoferow dla je wobhospodarjer tankownje w Francoskej tankownju zawrěł. „Spjećuju so liter ćěriwa za 2,50 eurow předawać, njepodpěruju padustwo“, napisa tankownik Oliver Thomas na papjerku, kotruž je na tankowni we wsy Saint-Paulien wupowěsnył. „Njemóžu produkt za 2,47 eurow předawać, derje wědźo, zo sam wjace hač 0,04 centy na liter njezasłužam“, wón doda.
Krej na sćěnje wjaceposchodoweho domu je w Erfurće zasadźenje wohnjoweje wobory zawiniła. Wobydlerjo so starosćachu, dokelž njebě 22lětna wobydlerka durje wočiniła. Na to wohnjowi wobornicy durje namócnje wotewrěchu a naležnosć rozrisachu: 22lětna bě na balkonje krawe nutriny za swoje psy w dźěratym sudobju składowała. Zasadźenje wobornikow a nowe durje dyrbi wona nětko zapłaćić.
Wopory terora wopominali
Berlin (dpa/SN). Zwjazkowy justicny minister Marco Buschmann nochce pačenje towaršnosće přez terorizm akceptować. „Njemdrosći a błudej so spjećujemy, hdyž hromadźe stejimy“, rjekny politikar FDP składnostnje dźensnišeho narodneho wopominanskeho dnja za wopory teroristiskeje namocy. Chorhoje na twarjenjach Zwjazka wisaja dźensa połwysoko. Dźeń běchu po islamskich teroristiskich nadpadach w Madridźe lěta 2004 ze 191 smjertnymi woporami pomjenowali.
Rěča wo biologiskich brónjach
New York (dpa/SN). Bjezstrašnostna rada UNO zaběraše so dźensa po woli Ruskeje z biologiskimi brónjemi, kotrež USA pječa w Ukrainje produkuja. Wurjadne posedźenje měješe so popołdnju zahajić. Dotal njeje Ruska za wone chemiske labory w Ukrainje žane dopokazy předpołožić móhła. Tež UNO ničo wo biologiskich brónjach njewě. USA maja twjerdźenja Ruskeje za propagandu a zamylenski manewer.
Wuradźuja wo sćěhach wójny
Ruske jednotki měrja so při swojej inwaziji w Ukrainje přiběrajcy ...
Wobkružeja ukrainske města
Žadyn spěšny přistup k EU
Schröder pola Putina w Moskwje
Berlin (dpa/SN). Bywši zwjazkowy kancler Gerhard Schröder (SPD) přebywa w Moskwje, zo by z ruskim prezidentom Wladimirom Putinom wo wójnje na Ukrainje rěčał. Wotpowědne informacije wjacorych medijow su mjeztym wobkrućene. Prěnja rozmołwa mjez woběmaj spřećelenymaj politikarjomaj je pječa hižo wčera wječor była. Hač su dalše planowane, njeje dotal znate.
Zwjazkowe knježerstwo zdźěli, zo njebě wopyt Schrödera w Moskwje z nim wotrěčany. Zwjazkowy kancler Olaf Scholz (SPD) nochcyše na kromje wjerškoweho zetkanja EU we Versaillesu jězbu Schrödera komentować. Sobupředsyda SPD Lars Klingbeil porno tomu je so w telewiziji ZDF kedźbliwje optimistiski hladajo na Schrödera wuprajił. „Wšitko, štož runje pomha surowu wójnu skónčić, je witane“, wón rjekny. Hač wopyt něšto wunjese, ma so wočaknyć. Na kóždy pad je kóžda rozmołwa „najprjedy raz něšto rozumne“.
Preč ze škarakami
Kónc małych stron w Brüsselu
Strasbourg (dpa/SN). Přewšo małe strony w Němskej, kaž Swobodni wolerjo abo satiriska strona Die Partei, dyrbja z tym ličić, zo njejsu noweje móžneje delnjeje hranicy hłosow dla po přichodnych europskich wólbach wjace w parlamenće EU zastupjene. Nawodźa jednanjow najwjetšich frakcijow w parlamenće EU su so na zhromadnu poziciju k reformje europskeho wólbneho prawa dojednali. Wona předwidźi postajić delnju hranicu hłosow w krajach, kotrež su najbohatše na wobydlerjow, mjez druhim w Němskej. Strona Piratow mjenuje plany „nadpad na demokratiju“.
Delnja hranica by rěkała, zo njejsu strony z mjenje hač 3,5 procentami hłosow wjace w Strasbourgskim parlamenće zastupjene. Najprjedy pak dyrbjał parlament EU planam přihłosować, potom měli čłonske staty rozsudźić. Njeje tuž jasne, hač reformu do přichodnych wólbow schwala. Zapósłanc Piratow Patrick Breyer na to skedźbnja, zo je při zašłych wólbach 3,1 milion wolerjow swój hłós šěsć małym stronam, kaž Piratam, dał. Te hłosy bychu z reformu spadnyli, štož by na dobro wulkich stron było.
