Wjeselu so kaž mały hólc, zo směm lětsa skónčnje tajku prawu zymu dožiwić. Dołho trajacy „mróžak“ z dosć sněhom je zmóžnił, zo móžach samo w Drježdźanach při Łobju ze swojimi jednorymi deskami sněhakować. Aktualne prognozy su tohorunja wjele lubjace. Snano dosaha přichodny tydźeń samo za dospołny sněhowy přikryw. A hdyž so dosć sněha njenańdźe, su srjedźne horiny derje docpějomne. W Sakskej skića regiony kaž Rudne ho­riny, ale tež kroma Sakskeje Šwicy mnohe lojpy a zymske pućowanske šćežki.

Přihotuja Slaviamarš 2026

Zajimcy móža so wotnětka za 50 kilometrow dołhe pućowanje, 13. junija, po serbskej Łužicy přizjewić. Start a cil je znowa w Hórkach. Ličbu wobdźělnikow su lětsa na 350 wobmjezowali, po tym zo bě loni 300 běharjow móžnych. (www.slaviamarsch.de)

Terminaj koparskeho zwjazka

Zamołwići Zapadołužiskeho koparskeho zwjazka skedźbnja na dwaj terminaj kónc februara. Sobotu, 21. februara, přewjedźe so wot 17 do 21 hodź. w sportowej hali na droze Käthe-Kollwitz we Wojerecach halowy koparski masters starych knjezow. 28. februara zetkaja so nawodźa koparskeho dorosta jednotliwych towarstwow w Małym Wjelkowje, a to wot 9.30 do 13.30 hodź.

Testowe koparske hry

Za wšitkimi přihotowanskimi koparskimi hrami pod hołym njebjom steji stajnje prašak, dokelž su wuměnjenja na hrajnišćach husto špatne.

14.02.  13:00  Natw. Němske Pazlicy –

  VfL Pirna-Copitz

14.02.  13:30  SZ Hnašecy/Dobruša –

  Traktor Malešecy

15.02.  15:00  ST Lok Slepo –

  SC Grodk 1896

22.02.  10:30  ST 1922 Radwor –

  ST Drjewinica

Za prěnje běhi so přizjewić

Běharki a běharjo smědźa so za prěnje běhi lěta 2026 přizjewić. 8. měrca přewjedźe so Mužakowski parkowy běh a 15. apryla běhi na horu Mnišonc.

FSV Lokomotiwa Drježdźany –

SJ Chrósćicy 2:5 (1:2)

Zestawa hosći: Škoda – Graf (75. Donat), Dźisławk, Zynda, Wornar, G. Zahrodnik, Bogusz (46. Kral-Zahrodnik), Rätze, Hawš (50. M. Zahrodnik), Młynk, Mark