Opoziciska strona PiS wólby parlamenta w Pólskej republice dobyła

Waršawa. Pólske medije tele dny wuslědk njedźelnych wólbow parlamenta dokładnje a wobšěrnje analyzuja. Fakt je, zo je so politiska karta kraja porno wólbam před štyrjomi lětami dospołnje změniła. Tehdy bě narodnokonserwatiwna strona Prawo a sprawnosć (PiS) Jarosława Kaczyńskeho jenož na wuchodźe Pólskeje wuspěšna. Srjedźne a zapadne kónčiny su swój čas liberalno-konserwatiwnu Wobydlersku platformu (PO) wolili. Minjenu njedźelu bě połoženje dospołnje hinaše: PO bě runje hišće w dwěmaj wojewódstwomaj na sewjeru kraja wuspěšna. Wšitke tamne kónčiny su bjez wuwzaća PiS wolili a so tak wo zasadnu politisku změnu postarali. Po oficialnym hamtskim wólbnym wuslědku je PiS 235 mandatow w sejmje zdobyła a móže tam přichodnje bjez koaliciskeho partnera sama­ knježić. Dotal knježaca PO ma 138 sydłow a dyrbi nětko do opozicije. Kedźbyhódny je tež wuspěch rockoweho hudźbnika Paweła Kukiza. Jeho strona Kukiz’15 změje 42 sydłow. W stronje hromadźa so předewšěm nacionalistiske a prawicarske mocy.