Wokrjesny sportowy zwjazk je njedawno najbóle sportowsku šulu wokrjesa Budyšin wuznamjenił. Jedyn z pokalow přija za Serbsku wyšu šulu „Michał Hórnik“ Worklecy sportowy wučer Křesćan Bejmak. Šulerjo-sportowcy wudobychu sej w swojej kategoriji 3. městno.
Dohromady je so loni 24 šulow z wokrjesa na šulerskim wubědźowanju wobdźěliło. Z 5 500 wobdźělnikow zaruči sej wjac hač 3 300 šulerjow złote, slěborne a bronzowe sportowe znamješko. Tak tež Worklečanska wyša šula. Mjez wobdźělenymi wyšimi šulemi a gymnazijemi Budyskeho wokrjesa wjesela so Worklečenjo nad 3. městnom a pjenježnym mytom 200 eurow. 160 Worklečanskich šulerjow-sportowcow wuwojowa sej 81 čestnych znamješkow – 27 złotych, 45 slěbornych a dźewjeć bronzowych. Druhe městno wobsadźi Lessingowy gymnazij Kamjenc, a dobył je Leona Foucaltowy gymnazij Wojerecy. Jednaćel wokrjesneho sportoweho zwjazka Lars Bauer počesći dobyćerjow w krajnoradnym zarjedźe zhromadnje z 1. přirjadnikom krajneho rady Udom Wićazom.