ANO zaso prědku

štwórtk, 02. septembera 2021
artikl hódnoćić
(0 )
Praha (ČŽ/K/SN). Bychu-li w Čěskej nětko wólby do sejma byli, by je ANO ministerskeho prezidenta Andreja Babiša z 31,1 procentom jasnje dobyła. Na druhe měst­no by přišła ze stronow ODS, KDU-ČSL a Top 09 wobstejaca koalicija Spolu, kiž by 21,7 proc. nažnjała. Koalicija Piraća/Starosća wobsadźi z 18,7 procentami třeću poziciju. To wupokazuje wot agentury STEM zwěsćeny wólbny model. Wón zdobom wujewja, zo je ANO zamóhła tydźenje trajacy spad akceptancy wuspěšnje zawróćić a zo je nadźija koalicije Piraća/Starosća, stać so z najsylnišej politiskej mocu a tak premiera stajić, překrótkej nóžce měła. Do delnjeje komory parlamenta byštej hišće dwě dalšej stronje zaćah­nyłoj, a to SPD Tomija Okamury z 11,2 procentomaj a KSČM z 5,6 procentami. Za ČSSD by so jenož hišće 4,6 procentow wolerjow wuprajiło, na čož bychu socialdemokraća – dotalny koaliciski partner ANO – zaćah do sejma misnyli, dožiwjejo tež historiski debakl. Politologojo sćěhuja, zo móhło přichodne knježerstwo zestajeć wobćežna naležnosć być. Dobyćer budźe w kóždym padźe partnerow trjebać.
wozjewjene w: Słowjanski wukraj
Prošu přizjewće so, chceće-li komentar podać

nawěšk