London (B/SN). Bamž Franciskus je Davida Wallera za biskopskeho ordinariusa powołał. Anglikansku liturgiju a tradicije w přezjednosći z bamžom pěstować bě hakle Benedikt XVI. dowolił. W Jendźelskej a we Walesu je nětko prěni raz biskop předstejićel personalneho ordinariata, kiž bu něhdy jako anglikanski měšnik wuswjećeny a je pozdźišo ke katolskej cyrkwi přestupił.

Šokowace ličby

Tel Aviv (B/SN). Uniwersita w Tel Avivje a organizacija Anti-Defamation League (ADL) stej rozprawu wo antisemitizmje 2023 wudałoj. Direktor ADL Jonathan Greenblatt k tomu piše: „Po grawoćiwym nadpadźe Hamas na Israel 7. oktobra 2023 je so hida kaž tsunami přećiwo židam po cyłym swěće wukidała.“ W 150stronskej rozprawje dokumentuja podawki wosebje w arabskim swěće, w Turkowskej a Iranje.

Ruske jutry

Cziksereda (SN/MG). Na swoje kóždolětne schadźowanje bě zwjazk europskich dźenikow mjeńšinowych a regionalnych rěčow (MIDAS) lětsa do Rumunskeje přeprosył. Madźarska mjeńšina wučinja tam, w regionje Harghita, na wšěch 86 procentow ludnosće. Kónčina kraja, kotraž rěka Transilwaniska, bě historisce dołho dźěl Madźarskeje, doniž so po Prěnjej swětowej wójnje Rumunskej njepřirjadowaše. Najwjetša madźarska nowina w tutej kónčinje rěka Harghita Nepe, kotraž bě zdobom hosćićelka zetkanja. Žurnalisća ze wšeje Europy so na štyri­dnjowskim zetkanju wobdźělichu. Nimo madźarskeje mjeńšiny zaběrachu so woni wosebje tež ze situaciju dźenikow po wšej Europje, kaž tež z temu fake news. Kak hodźeli so młódši čitarjo tohorunja za dźeniki wabić, tež to woni diskutowachu. Jasne wuwidźeć bě, zo sćěhuje najwjace nowinow strategiju „online first“, štož woznamjenja, zo so powěsće najprjedy digitalnje a pozdźišo w ćišćanej nowinje wozjewjeja.