To a tamne (29.10.18)
Mału granatu namakał je wudźer w Hamburgu. Po informacijach policije bě muž z pomocu magneta w rěce Alster wudźił, zo by metaliske wěcy we wodźe namakał. Při tym wućahny dwaj centimetraj šěroku granatu, kajkuž běchu za čas Druheje swětoweje wójny k wotwobaranju lětadłow wužiwali. Policija je ju wotwjezć dała. Po měnjenju fachowcow bě granata hišće strašna.
Za swój spontany koncert na balkonje w Praze je popspěwar z USA Jason Derulo w socialnych medijach wjele chwalby žnjał. „Balkonowa serenada móže so legendarna stać“, pisa fan na portalu Instagram. Koncert 29lětneho we wjacezaměrowej hali w Praze dyrbjachu štwórtk wječor techniskich přičin dla krótkodobnje wotprajić. Na to stupi so Derulo na balkon, zo by čakacym fanam zaspěwał. Koncert chce pozdźišo nachwatać.
To a tamne (26.10.18)
Motorizowany piwowy kašćik je policija w badensko-württembergskim Berglenje zadźeržała. Młody pasler bě nastroj z dźesać PS sylnym motorom na štyrjoch koleskach tak konstruował, zo móžeše z nim hač do 50 km/h spěšnje jěć. Wězo njeměješe žanu dowolnosć za nadróžny wobchad, kaž policija w swojej rozprawje piše. 21lětny dyrbješe swoju jězbu ze spěšnym piwowym kašćikom přetorhnyć. Nimo toho hrozy jemu chłostanske jednanje.
Zemske worješki su prěni króć w Tirolu žnjeli. Horce a suche lěćo wšak je plahowanje subtropiskeje rostliny zmóžniło. Žně na 300 kwadratnych metrach wulkej pospytnej płoninje njedaloko Innsbrucka pak njeběchu scyła tak jednore, dokelž dyrbjachu kóždu jednotliwu rostlinu wuryć a pod zemju narosćene worješki wotšćipać. Přiwšěm nažnjachu 200 kg.
To a tamne (25.10.18)
Ze swojej mortwej mandźelskej, připasanej na zadnjej ławce awta, je Rusa spytał do Ukrainy jěć. Zastojnicy tamnišeho namjezneho škita pak muža na přechodźe Hoptiwka na wuchodźe kraja zajachu. Šofer bě spočatnje hišće twjerdźił, zo žona jeno spi. Při kontroli pak pokaza hranicarjam smjertne wopismo swojeje dwaj dnjej do toho zemrěteje žony. Zhromadnje ze swojim ukrainskim synom chcyše muž mandźelsku na Ukrainje pochować. Ruscy hranicarjo běchu jeho bjez problemow přepušćili, ukrainscy přepytuja nětko přećiwo njemu morjenja dla.
Wjele wusměšowanja žněje nowa kolesowarska šćežka w Berlinje. Runje dotwarjena čara w Friedrichshainje přicpěwa kolesowarjam chětro horbaty asfalt. Njedostatki bě měšćanske zarjadnistwo na přepodaću šćežki zwěsćiło. Twarska firma ma čaru přichodne tydźenje zrunać, přiwšěm wostanje wona tak dołho wotewrjena. „Dobra ideja to, prohi za pomjeńšenje spěšnosće tež na kolesowanskich šćežkach zatwarić“, wužiwar interneta žortuje.
To a tamne (24.10.18)
Plany za najwjetše hoberske koło swěta w New Yorku su doskónčnje zwrěšćili, kaž jeho planowarjo přesłapjeni zdźěleja. 190 metrow wysoke hoberske koło na kupje Staten Island měješe so poprawom hižo w lěće 2015 wjerćeć a turistam wulkotny napohlad na přistaw, Postawu swobody a Manhattansku skyline skićić. Spochi přiběrace kóšty a sudniske rozestajenja mjez inwestorami su pak projekt zadźerželi.
Hnydom šěsć awtow wobškodźiła je 78lětna šoferka wosoboweho awta w hornjofrankskim Breitengüssbachu při wuparkowanju. Najprjedy zjědźe při wróćostorkanju do parkowaceho awta, kotrež dalšej wozaj wobškodźi. Wustróžana jědźeše wona na to doprědka a wobškodźi před njej stejace awto. Te zrazy do dalšeju awtow. Škoda wučinja 47 000 eurow. Šokowanu žonu dyrbjachu lěkarsce zastarać.
To a tamne (23.10.18)
Dźěl nosa wotkusnył je kopar swojemu přećiwnikej w hrě wokrjesneje ligi w Essenje. Škodowany přisadźi tak dźěl praweje nosoweje połojcy. Kaž Essenske koparske towarstwo SG 99/06 zdźěli, dowjezechu jeho do chorownje. Skućićel dósta čerwjenu kartu a dyrbješe nablaku z hrajnišća. Koparjej běštaj so pozdatneho foula dla zwadźiłoj. Kusaty hrajer bě čłon mustwa SV Preußen Eiberg 11/31.
Direktnje před ćahom Pariskeje spěšnoželeznicy je so kołp na kolijach zadomił a tak dlěši čas železniski wobchad haćił. Tež na nastupišću čakacy ludźo njemóžachu jeho k wotlětej pohnuć. Jako někotři z nich fota kołpja w interneće wozjewichu a jemu tak hišće k wěstej populariće dopomhachu, přijědźechu wohnjowi wobornicy a ptaka zaso tam dowjezechu, zwotkelž bě přilećał, na někotre sta metrow zdalenu rěku Seine.
To a tamne (22.10.18)
Jenož hodźiny po kradnjenju kolesa je žona mountainbike swojeho muža na internetnej platformje wuhladała a předawarjej pasle stajiła. 40lětna skontaktowa poskićowarja kolesa, kotrež běchu njeznaći rano z ležownosće swójby w Düsseldorfje pokradnyli. Žona informowaše policiju a dorěča sej z předawarjom zetkanje na zastanišću. Tam ciwilna policija paduchow zaja. Štyrjo podhladni w starobje 14 do 16 lět su policiji hižo znate. Nětko přećiwo nim přepytuja.
Bosy a jenož w nócnym wobleku bě wosomlětny wčera rano we Wilkauwje-Haßlauwje w Zwickauskim wokrjesu na dróze po puću. Kaž wón policiji pozdźišo rjekny, nochcyše mać mylić, kiž hišće spaše, jako poda so na wopyt k swojej wowce, kotraž w samsnym měsće bydleše. Kedźbliwa wobydlerka bě policiju informowała, a ta hólca zaso k maćeri dowjeze.
To a tamne (19.10.18)
Na piwo a pomfritki so přeprosyć dała je zwjazkowa kanclerka Angela Merkel w Brüsselu. Turisća móžachu wobkedźbować, kak wona po prěnim dnju wjerškoweho zetkanja EU zhromadnje z francoskim prezidentom Emmanuelom Macronom, belgiskim knježerstwowym šefom Charlesom Michelom a luxemburgskim premierom Xavierom Bettelom w sławnym Brüsselskim Grand Place sedźeše. Zličbowanku zapłaćił je Xavier Bettel. Po njedźelnych wólbach w Luxemburgu wostanje wón drje premier.
Ze spodźiwnej maskeradu je muž w Dortmundźe spytał hosćenc wurubić. Po informacijach policije žadaše sej 33lětny w hosćencu pjenjezy. Maskěrowany bě ze spódnymi cholowami na hłowje. Korčmar a jedyn z hosći móžeštaj rubježnika přewinyć a přiwołanym zastojnikam přepodać, policija zdźěli.
To a tamne (18.10.18)
Njewočakowany pjenježny dar štyrjoch milionow je mała francoska gmejna Courville-sur-Eure dóstała. 93lětna něhdyša dźiwadźelnica je sumu swojej ródnej wsy sto kilometrow juhozapadnje Parisa zdźědźiła. Dar je pak z wukazom zwjazany, zo maja pjenjezy za twar dźiwadłoweje žurle nałožić, nowiny rozprawjeja. Gmejnska rada je dar mjeztym přiwzała, kotryž je dwójce tak wysoki kaž cyłolětny etat gmejny.
Wotjězdku awtodróhi blokować dał je měšćanosta nakromneje štwórće Parisa, dokelž njebě městačko Chatenay-Malabry na wobchadnej tafli noweje awtodróhi A 86 naspomnjene. Blokada ma trać, doniž mjeno města na tafli njesteji, měšćanosta nowinarjam rjekny. Wón je sej toho wědomy, zo ma zawrjenje wotjězdki njepřijomne sćěhi za wobydlerjow. „Dźe wo to, ćišć na zamołwitych wukonjeć.“
To a tamne (17.10.18)
Kamel při zwjazkowej dróze w Čornym lěsu je mnohich šoferow znjeměrnił. Zwěrjo steješe na parkowanišću bjezpo- srědnje při dróze w Freiburgu. „Wobsteješe strach, zo kamel na dróhu poběži“, policija zdźěli. Zwěrjo słušeše do pućowaceho cirkusa, kotryž bě w bliskosći swój stan natwarił. Wobsedźer bě zwěrjo na parkowanišću wotstajił, bjez toho zo by je přiwjazał. Wón bě sej wěsty, zo kamel na dróhu njepoběhnje. Policija jemu přikaza, zwěrjo na druhe městno dowjezć.
Z kolesom z Alaski do Južneje Ameriki dojěł je awstriski ekstremny sportowc Michael Strasser. Při tym je po swójskich informacijach nowy swětowy rekord nastajił. Wón trjebaše za 22 642 kilometrow dołhu čaru 84 dnjow, 11 hodźin a 50 mjeńšin, 15 dnjow mjenje hač při dotalnym rekordźe. Strasser bě minjene lěta hižo podobne wužadanja zmištrował.
To a tamne (16.10.18)
We wokolinje konopjowych wikow je policija w Awstriskej 114 šoferow lepiła, kotřiž stejachu pod wliwom drogow a njeběchu hižo jězdźenjakmani. „To je zrudźacy rekord a přiwšěm jeno snadny dźěl woprawdźitosće“, měnješe rěčnik policije. Policija kontrolowaše šoferow, kiž běchu po puću na wjacore dny trajace cannabisowe wiki njedaloko Wiena abo su wottam přijěli. Wiki wěnowachu so po informacijach zarjadowarja „hojenskej rostlinje konopi“.
Najstarši muž Němskeje swjećeše wčera 113. narodniny. Gustav Gerneth je strowy a duchownje čiły, rjekny měšćanosta saksko-anhaltskeho Havelberga Bernd Poloski. Jubilar bydli přeco hišće w swójskim bydlenju. Wnučki a prawnučki jeho zastaruja. Po zbožopřeću je Gustav Gerneth wjesnjanostu na swoje klětuše 114. narodniny přeprosył.
