To a tamne (28.09.16)
Štó praji, zo maja Japanjenjo ćeže z jendźelšćinu: Zastojnicy mobilneje policajskeje straže w starym kejžorskim měsće Kyotu móža so z wukrajnymi turistami wot najnowšeho hnydom we 28 rěčach rozmołwjeć. Za to wužiwaja policisća tabletowy kompjuter z wosebitej přełožowanskej app, kaž nowina Asahi Shimbun rozprawja. Mobilna straža je zaměstnjena w małobusu, kotryž steji na turistiskich ćežišćach.
Tójšto lubosćinskich zamkow na Železnej šćežce, nimale 150 lět starym mosće za pěškow přez Mohan w Frankfurće, su njeznaći spakosćili. Zamki, kotrež poriki jako wuraz swojeje lubosće powěšeja, su tam hižo lěta wisali. Ani město ani policija njewěstej, štó je jich wobstatk pomjeńšił. Wobě pak nochcytej zakročić. Wšako njeje móst žanu škodu poćerpjeł. Tež skoržił zamkow dla nichtó njeje.
To a tamne (27.09.16)
Sudniska zwada wo 15 eurow drohi kožany pas budźe za muža dosć droha naležnosć. Nětko dyrbi 300 eurow za sudniske kóšty zapłaćić. Wón bě sej we wobchodźe w Augsburgu pas kupił a so hóršił, dokelž měješe tón hižo po prěnim nošenju njedostatki. Dokelž nochcyše wikowar pas wróćo wzać, muž skoržeše. Sudnistwo skóržbu wotpokaza: Štóž sej kožany pas za 15 eurow kupi, njemóže tež hišće wuběrnu kwalitu wočakować.
Espreso do mjezwoča kidnył je rozmjerzany muž sobudźěłaćerce hosćenca na pozastawarni při awtodróze A 3 pola Passauwa. 34lětny muž bě sej do toho mylnje sól město cokora do kofeja sypnył. Jako sej nowy kofej skaza, dyrbješe jón zapłaćić. Na to dósta 40lětna espreso do mjezwoča. Nětko policija přećiwo rabiatnemu hosćej přepytuje. Nimo toho ma wón tam zakaz domu.
To a tamne (26.09.16)
Swojeju staršeju ze spanskeje stwy wuzamknył je 13 měsacow stary hólčk w Magdeburgu. Jemu bě so minjeny pjatk poradźiło swoje łóžko přestorčić a mjez łožo staršeju a durje sunyć. Durje hodźachu so jenož hišće škałbu wotewrěć. Bjezradnaj staršej wołaštaj na to wohnjowu woboru, kotraž durje wusadźi. Kak je hólčk łóžko přestorčić móhł, bě tež wobornikam wulke hódančko.
Z črjewami swojeho zemrěteho mandźelskeho je Marokkočanka do Graza přilećała, zo by je tam na móžne zajědojćenje přepytować dała. Při kontroli wuhladachu zastojnicy „najkurioznišu namakanku minjenych lět na lětanišću“. Žona rozkładźe, zo bě jeje mandźelski po operaciji w Marokku zemrěł. Nětko chce wona dopokazać, zo bu wón zajědojćeny. Kaž medije rozprawjeja, wšak njeje naležnosć chłostajomna.
To a tamne (23.09.16)
Jědnaćelětna šulska holca je zabłudźenu štyrilětnu kilometer daloko na chribjeće do wěstoty njesła. Štyrilětna bě so při hrajkanju w měsće Kashima a kupje Kyeshu zaběžała, jako ju šulerka wuhlada. Dokelž swójbni holčki doma njeběchu, wza ju šulerka na chribjet a donjese ju na policajski rewěr. Tola tež tam nichtó njebě. Jědnaćelětna prošeše tuž w susodnym běrowje, hač směła z policajskej centralu telefonować. Ta móžeše holčku staršimaj skónčnje přepodać. Zmužitu šulerku počesćichu z wopismom.
Hoberski, 550 kilogramow ćežki kirbs je muž w Braniborskej plahował. Tón dóstawa wšědnje 600 litrow wody kaž tež kumštny a přirodny hnój, měni zahrodkar Oliver Langheim z Fürstenwalde. 42lětny chce so nětko z hoberskim płodom na Berlinsko-braniborskich mišterstwach wo najćeši kirbs wobdźělić.
To a tamne (22.09.16)
Pomocnika w starobje 45 do 55 lět wupytać a wotnajeć móža sej zajimcy nětko w Japanskej. Tam poskića Takanobu Nishimoto tak mjenowanych wotnajenskich wujow, kotřiž ludźi w najwšelakorišich žiwjenskich situacijach podpěruja, a to za dźewjeć eurow na hodźinu. Hač su to problemy na dźěle, ćeže w lubosći abo cyle prosće samotnosć, tajki wotnajaty wuj ma přeco wotewrjene wucho. Serwis pak njepomha jenož wužiwarjam tejele posłužby, ale tež pomocnikam samym.
Zapalak je turistej z USA na Mnichowskim lětanišću mjerzanje načinił. Jako chcyše 25lětny muž wčera wěstotnu kontrolu přeńć, pokazowaše roentgenowy nastroj nadobo alarm. Po wšěm zdaću bě we wačoku ručnu granatu spóznał. Fachowcy pak móžachu skónčnje wujasnić, zo jedna so jeničce wo zapalak. Přiwšěm dyrbješe jón Američan wotedać.
To a tamne (21.09.16)
Inwazija muchow w cyrkwi hornjopfalcskeje wsy Reifenberga zaběra wobydlerjow kaž tež medije. Dokelž muchi po tysacach na ławkach, wołtarju a pišćelach sydaja a tež kemšerjow wobćežuja, su Bože słužby nachwilnje na farsku žurlu přełožili. „Je mi to dospołne hódančko“, rjekny wjesnjanostka Michaela Hütter. Jutře ma fachowc za zaničowanje škódnikow inwaziju skónčić.
Na tuchwilnych swětowych mišterstwach płunowych balonow, cupje Gordona Bennetta, su wjacore mustwa wubědźowanje wopušćili. W nocy na póndźelu bě w poruhrskim Gladbecku 24 z wodźikom pjelnjenych balonow startowało. Z nich bě dźensa jenož hišće dźewjeć po puću. Najlěpše wuhlady ma balon ze Šwicarskeje. Tón je mjeztym 1 400 kilometrow zmištrował a wčera Rom a Neapel přeprěčił, kaž rěkaše.
To a tamne (20.09.16)
Dokelž dyrbješe štyri dny při puću na awto čakać, kotrež by jeho sobu wzało, je so po Nowoseelandskej pućowacy Francoz roznjemdrił a wjacore nadróžne tafle wobškodźił. 27lětneho su mjeztym sudnikej předstajili, a jemu hroža hač do tři měsacy jastwa. Njemdrosć muža budźe tež dosć droha naležnosć: Zhotowjer taflow žada sej 2 000 eurow za porjedźenje. A tysac eurow pokuty je Francozej nimo toho sudnistwo napołožiło.
Dospołnje pjana muska trójka je sej w Bremerhavenje z trašawku w ruce wot pěškow pjenjezy žadała a runje 20 centow wuzbytkowała. 40lětny, kiž měješe pistolu w ruce, bě tak wopity, zo jemu bróń z ruki padny. Wustróženi pasanća pak móžachu ćeknyć. Policija muži w starobje 38 do 42 lět zaja. Woni běchu hižo do toho ludźi w hosćencu a tobakowym wobchodźe wohrozyli.
To a tamne (19.09.16)
Sobu najnaročniše wubědźowanje płunowych balonow su minjenu nóc w porynskim Gladbecku startowali. Cyłkownje 26 dwuwosobowych mustwow z dwanaće krajow je wobdźělenych. Woni wostanu wjacore dny w powětře, zo bychu telko kilometrow kaž móžno zmištrowali. Rekord 3 400 kilometrow běchu lěta 2005 w USA nastajili.
14lětny je w Kölnje z awtom nana před policiju ćěkał. Zastojnikam bě njewěste wašnje jězdźenja napadnyło. Jako chcychu wóz kontrolować, hólc na płun stupi a smaleše bjez swěcy po měsće. Po někotrych kilometrach pak so wón dalšeje honjeńcy wzda. Policisća přepodachu jeho maćeri. Klučiki awta bě sej 14lětny skradźu wzał, jako nan spaše.
To a tamne (16.09.16)
Fota wo kóčkach njejsu jenož rjany přinošk za wobrazowe galerije w interneće, to znajmjeńša měnja aktiwisća w Londonje. Tak su staciju podzemskeje z wobrazami tychle zwěrjatow plakatowali. Nimale 700 podpěraćelow je we wobłuku crowdfundinga přeličene nimale 27 000 eurow darowało. Z pjenjezami je skupina z mjenom Glimpse wšitke wabjenske płoniny stacije Clapham Common na dwě njedźeli wotnajała.
Na přewšo zdwórliwe wašnje je njeznaty rubježnik w Poruhrskej dźesać discounterowych filialow nadpadnył. Minjenej dwě lěće bě wón maskěrowany dźesać króć rano při zachodźe na šofera łakał, kiž twory dodawaše. Sobudźěłaćerjow je z pistolu wohrozył a jich sputał. Kaž wopory měnjachu, je muž často měrnje, přećelnje a zdwórliwje postupował. Wospjet so je prašeše, hač „njejsu překruće sputane“.
To a tamne (15.09.16)
Wbohe to zahrodkowe palčiki! Přehusto so wone politisce, rasistisce a samo seksistisce znjewužiwaja, štož ma so nuznje změnić! Tole měnja přiwisnicy wosebiteje specije, kotřiž chcedźa so kónc tydźenja w durinskim Trusetalu na palčikowym kongresu schadźować. Přećiwo znjewužiwanju mužikow z módrej abo čerwjenej čapku ma so zakročić, woni praja. Tak lěta 2006 załožena Mjezynarodna palčikowa strona z něhdźe 100 sobustawami planuje, nastajić rezoluciju Zwjazkowej antidiskriminaciskej instancy.
Za trochu njeradźeny postrow policistam bu 26lětny wodźer awta w Ludwigshafenje pochłostany. Tak je wón zastojnikow nimojěducy z piwom w ruce strowił a sej samo hišće lunk popřał. Zastojnicy muža hnydom zadźeržachu a zwěsćichu 0,7 promilow alkohola w jeho kreji, za čož ma nětko pokutu płaćić.
