To a tamne (17.08.16)
Zbožo měło je 182 turistow, kotřiž běchu na dnjowym wulěće w kónčinje grjekskeje kupy Lefkada. Jich wulětniski čołm wosta wosrjedź morja stejo, dokelž bě kapitan do wotjězda zabył jón natankować. Jako motor dźěłać přesta, běchu njedaloko dowoloweje kupy, hdźež kótwicu pušćichu. Na zbožo bě morjo měrne. Tak móžeše pobrjóžna straža čołm do přichodneho přistawa ćahnyć.
Staplowane kaminowe drjewo na ležownosći Kupoweho hotela Hermannswerder móhło hižo bórze Podstupimskich sudnikow zaběrać. Šef hotela Burkhard Scholz je přećiwo žadanju města, zo měł stapl drjewa na swojej ležownosći wotstronić, skóržbu zapodał. Město argumentuje, zo by Scholz za kaminowe drjewo dowolnosć trjebał, dokelž leži hotel w přirodoškitnym pasmje. Wjacore medije mjeztym wo skurilnej zwadźe rozprawjeja.
To a tamne (16.08.16)
Nimale 13 hodźin na 30 metrow wysokim štomje wutrać dyrbješe pilot znjezboženeho ultralochkeho lětadła njedaloko Schwäbisch Gmünda, doniž jeho wohnjowa wobora njewuchowa. Muž bě wčera wokoło 20 hodź. znjezbožił a so we wjeršku štoma zapopadnył. Pomocnicy dyrbjachu lětadło najprjedy stabilizować, štož bě při nahłej skłoninje dosć naročne. Hakle dźensa rano móžachu znjezboženeho wuswobodźić. Byrnjež wonkownje njezranjeny był, dowjezechu jeho do chorownje. Lětadło su w běhu dnja ze štoma wzali. Přičina njezboža njeje znata.
30 centimetrow dołhu twjerdu kołbasu je 49lětny w Neubrandenburgu do awta 47lětneho ćisnył, po tym zo běštaj so zaparkowanja dla zwadźiłoj a sej wudma nadawałoj. Při tym so zadnje durje awta wobškodźichu. Policija nětko wosobinskeho ranjenja, hroženja a wobškodźenja wěcow dla přećiwo woběmaj přepytuje.
To a tamne (15.08.16)
Chětro hejaty třilětny hólc je w Brandenburgu nad Habolu zasadźenje policije zawinił. Swědcy běchu wobkedźbowali, kak muž škrěčace dźěćo do awta sadźi a na to wotjědźe. Hnydom za dźěsćom pytajo policija mać wopyta. Ta móžeše połoženje rozkłasć: Nan bě třilětnemu w 20 hodź. kazał, z hrajkanišća domoj přińć. Hólc pak so z cyłeje šije wobaraše, tež jako jeho nan najebać to do awta sadźi.
Štóž sej w Španiskej z pomocu trjenja, lěhadła abo słónčnika městno na pobrjohu rezerwuje, dyrbi z tym ličić, zo jemu tele wěcy wozmu. Nimo toho hrozy pokuta hač do 720 eurow. Zamołwići nochcedźa dlěje ćerpjeć, zo sej turisća rano zahe najlěpše městna při morju rezerwuja, zo bychu hakle hodźiny pozdźišo na pobrjóh přišli. Wotpowědny wukaz płaći mjeztym w mnohich dowolnišćach kraja a pječa skutkuje, kaž nowiny pišu.
To a tamne (12.08.16)
Wjace hač 400 awtow je wopak zastajeny błyskač jako přespěšne fotografował. Technikar bě błyskač při zwjazkowej dróze B 82 njedaloko delnjosakskeho Langelsheima we wokrjesu Goslar po planje přehladał. Při tym pak zaměni nastajenja za wosobowe a nakładne awta: Nětko błyskač šoferow awtow, kotřiž běchu z dowolenymi 100 km/h po puću, hižo wot 60 km/h fotografowaše. Lkw-je, kotrež smědźa tam najspěšnišo 60 km/h jěć, pak nastroj hakle wot 100 km/h měrješe. Po hodźinomaj wšak zmylk pytnychu. Wšitke fota su mjeztym zničili.
Swětowy rekord w jězdźenju z awtoskooterom staj telewizijnaj reporteraj Manuela Benus a Jan Spekker w Hamburgu nastajiłoj. Cyłkownje 26 hodźin a 41 minutow wonaj we wuskimaj jězdźidłomaj wutraštaj, najebać bolosće w nohomaj a mučnotu. Nětko stejitaj jeju mjenje w Guinnessowej knize rekordow.
To a tamne (11.08.16)
Přiběžaneho psa wobsedźerjej wróćić dyrbitaj mandźelskaj z Bayerskeje. Tole je Podstupimske krajne sudnistwo wčera po lěta trajacej sudniskej zwadźe doskónčnje rozsudźiło. Mnichowčanaj běštaj dakla lěta 2012 při awtodróze zapadnje Berlina našłoj a sobu wzałoj. Wot toho časa so spjećowaštaj jeho wróćić. Sudnistwo mandźelskimaj wumjetowaše, zo njeběštaj tehdy zamołwite instancy informowałoj. Za nachwilne zastaranje psa wšak smětaj sej 3 271,16 eurow žadać.
Třilětny hólc je w bayerskim Bad Wörishofenje we wobchodźe debjenkow zasadźenje policije zawinił. Po informacijach policije bě so mać hólčka tam poradźować dała. Tón w tym času po wobchodźe dundaše. Při tym namaka alarmowy knefl a na njón stłóči. Mjeńšiny pozdźišo steješe policija w durjach – smědźeše pak změrowana zaso wotjěć.
To a tamne (10.08.16)
Na betonowej pisće Madridskeho lětanišća Barajas je muž za lětadłom spěchał, kotrež bě do toho zapasł. Na wideju je widźeć, kak wón z wačokom w ruce na nastupnym mosće steji, jako je lětadło hižo wotjěło. Skoči tuž na pistu a běži za mašinu, doniž jeho sobudźěłaćer njezadźerži. Tón mužej rozłoži, zo za wopačnym lětadłom běži a zo jeho mašina hišće na lětanišću čaka. Kaž španiske medije rozprawjeja, hrozy jemu přiwšěm pokuta hač do 45 000 eurow.
Fatalneho pisarskeho zmylka dla je klinika w westfalskim Halle pacientku za mortwu deklarowała. W zdźělence chorobnej kasy bě sekretariat wotličenske čisło za zaprajenje wutroby město praweje diagnozy zapisał. Kasa přiwuznym na to zdźěli, zo je ze smjerću žony chorobne zawěsćenje skónčene. Klinika chce so nětko pola pacientki zamołwić.
To a tamne (09.08.16)
Z ćěkancom stał je so chinski turist w Němskej. Muž, kiž měješe jenož nachribjetnik sobu, bě po přizemjenju na Stuttgartskim lětanišću móšeń zhubił. Pytajo za policiju pak narěča wón sobudźěłaćerjow, kotřiž so wo ćěkancow staraja. Předpołožichu jemu próstwowy formular a zapokazachu jeho do domu požadarjow azyla w münsterlandskim Dülmenje. Z pomocu tołmačerja móžeše wón po tydźenjomaj skónčnje swoje połoženje rozjasnić a dale jěć.
Dospołnje pjany hladar starownje ma nětko mjerzanje z policiju. Muž bě w schleswigsko-holsteinskim Oststeinbeku z 83lětnej wobydlerku hladarnju wopušćił. Při tym koleskaty stoł staruški powróći. Pěšk wobkedźbowaše, kak so hladar podarmo prócuje stoł zaso stajić. Policisća naměrichu w jeho kreji štyri promile alkohola.
To a tamne (08.08.16)
Dospołnje nahi a pod wliwom drogow stejacy je muž w Magdeburgu awto pokradnyć spytał. Wobsedźer awta bě sobotu wječor policiju wołał, dokelž nahi muž w jeho wozu sedźeše. Ta nańdźe tam chětro zamyleneho 27lětneho. Drasty ležachu w bliskosći awta. Test drogow pola njeho wunjese konop a amfetaminy. Muža dowjezechu do chorownje.
45 metrow hłuboko padnyła a tole přežiwiła je psyca w Sakskej Šwicy. Zwěrjo bě ze swojej wobsedźerku po horach po puću, jako so na nahłej a hładkej skaliznje wobsuny a do hłubiny padny. Po 25 metrach štomy a kerki spad trochu borzdźachu. Pomocnicy so z powjazami po skaliznje dele pušćichu a žałosćacu psycu skónčnje w skalnej škałbje namakachu. Akcija, při kotrejž su dalši pućowarjo pomhali, traješe dlěje hač dwě hodźinje.
To a tamne (05.08.16)
Amtěrowacy swětowy mišter w mjetanju ručnych tobołkow, 44lětny Andreas Ruland, chce jutře w Bottropje titul zakitować. Při tym spušća so na swoju mjetansku techniku: wupřestrětu ruku dale a spěšnišo w kole wjerćeć a tobołku skónčnje pušćić. Swětowe mišterstwa wotměwaja so wo lěta 2012.
Dźiwadłowy kruch je w Allgäuju zasadźenje policija zawinił. Žona bě zastojnikow alarmowała, po tym zo bě w lěsu wutřěle a škrěčenje słyšała. Zastojnicy wšak zwěsćichu, zo słušeše to do dźiwadłoweho krucha, w kotrymž nadpad a nastatu paniku napodobnjeja. Najebać wopačny alarm policija žonu chwaleše, prajo: Radšo jónu wjace zazwonić hač jónu přemało.
To a tamne (04.08.16)
Chětro njezbožowny dźeń měješe 42lětny wčera w porynsko-pfalcskim Frankenthalu. Najprjedy přizemi zapozdźeny a bjez wačoka na lětanišću. Doma so při telefonje z přećelku zwadźi, na čož roznjemdrjeny do špihela dyri a sej ruku rozrěza. Tak sydny so do awta a jědźeše do chorownje. Spodźiwne wašnje jězdźenja pak pěškej napadny, kiž zawoła policiju. Ta zwěsći 0,9 promilow alkohola. Jězbna dowolnosć je tuž na měsac fuk. Doma muž pytny, zo bě so sam wuzamknył. Tuž dyrbješe pinčne wokno rozbić, zo by do swojeho bydlenja přišoł.
Z busom je jědnaćelětny samlutki po Ingolstadće jězdźił. Po informacijach policije bě so za wodźidło parkowaceho busa sydnył a wotjěł. Pěšcy wołachu policiju, kotraž małeho busoweho šofera zadźerža a maćeri přepoda. Zastojnikam hólčec rjekny, zo bě klučik busa namakał a sej jón za „wulki dźeń“ wobchował.
