W Trjebinje nazymu 1945 Domowinsku skupinu załožili
Beno Knop († 2005) z Hórkow je jako młody wučer do Trjebina přišoł a 44 lět skupinje předsydarił. Angelika Balccyna je wot lěta 2008 předsydka Trjebinskeje Domowinskeje skupiny.Pytaš-li w srjedźnej Łužicy přikład za to, zo je Domowinska skupina we wsy wažny stołp towaršnostneho žiwjenja, da podaj so do Trjebina w župje „Jakub Lorenc-Zalěski“. Tajki wopyt wudani so wosebje na wjerškach, přetož wone posrědkuja cuzemu zaćišće wo mjezsobnosći w komprinowanej formje. Kónc awgusta su tajki hromadźe z hosćimi z gmejny a Slepjanskeje wosady swjećili, zhladujo na 70. róčnicu załoženja swojeje Domowinskeje skupiny. Žadyn z tych, kotřiž wot samoho spočatka nazymu 1945 narodnej organizaciji přisłušachu, wjace žiwy njeje. „Ja zastupich 1948 jako wučomnik pola Pawoła Lejnika w Slepom“, dopomina so Hinc Šuca. 66 lět je wón w Domowinje, runje tak kaž Waltraud Fryšcyna, kotraž bě 1980 z Wochoz do Trjebina přišła.