K 200. narodninam narodneho zbudźićela, wědomostnika a wudawaćela Serbskich Nowin Jana Arnošta Smolerja
Sławny serbski narodowc Jan Arnošt Smoler narodźi so 3. nalětnika 1816 we Łuću jako najstarše ze štyrjoch dźěći wjesneho wučerja Jana Korle Smolerja. Po maturiće na Budyskim gymnaziju studowaše wón najprjedy ewangelsku teologiju we Wrócławju, pozdźišo ze stipendiatom pruskeho krala Bjedricha Wylema IV. słowjansku filologiju (rěčespyt a literarnu wědomosć). Čěski narodowc a profesor fiziologije Purkyně jeho spěchowaše. Smoler bě we Wrócławju tež wědomostny pomocnik znateho němskeho basnika a profesora germanistiki Hoffmanna von Fallerslebena. Smolerjowe najwuznamniše dźěło je dwuzwjazkowa serbsko-němska zběrka „Pjesnički hornych a delnych Łužiskich Serbow“, kotruž zhromadnje z Leopoldom Hauptom w lětomaj 1841 a 1843 wuda. Smoler bě Maćicu Serbsku 1847 sobu wutworił, bě pozdźišo jeje předsyda, nimo toho redaktor jeje časopisa kaž tež dalšich serbskich a słowjanskich medijow.